រដ្ឋាភិបាលថៃ ព្រមានពីការឈប់នាំចូលពោតពីប្រទេសជិតខាងនៅឆ្នាំក្រោយ

ការហាមឃាត់លើការនាំចូលពោតពីប្រទេសជិតខាងនៅឆ្នាំក្រោយកំពុងត្រូវបានពិចារណាដោយរដ្ឋាភិបាលថៃ ដើម្បីដោះស្រាយបញ្ហាដែលកើនឡើងនៃការបំពុលធូលីល្អ PM2.5 នៅក្នុងតំបន់ភាគខាងជើង។

កាលពីពេលថ្មីៗនេះ នាយករដ្ឋមន្ត្រីថៃ ស្រីថា ថាវីស៊ីន បានធ្វើទស្សនកិច្ចទៅកាន់ទីក្រុងឈៀងម៉ៃ ដើម្បីវាយតម្លៃសកម្មភាពបង្ការ និងបច្ចុប្បន្នភាពដែលផ្តល់ដោយទីភ្នាក់ងាររដ្ឋាភិបាល ទាក់ទងនឹងវិធានការបង្ការភ្លើងឆេះព្រៃ និងអ័ព្ទ។

នាយករដ្ឋមន្ត្រី បានទទួលស្គាល់ការពិភាក្សាជាមួយក្រសួងកម្ពុជា និងឡាវ រួមជាមួយអគ្គមេបញ្ជាការនៃកងទ័ពមីយ៉ាន់ម៉ាទាក់ទងនឹងបញ្ហានេះ។ លោកបានសម្តែងក្តីកង្វល់ ដោយចោទជាសំណួរថា តើមានវិធានការបែបណា ទើបអាចអនុវត្តបាន ដើម្បីទប់ស្កាត់កុំឱ្យប្រទេសជិតខាងដុតព្រៃដើម្បីធ្វើកសិកម្ម ដោយមិនបំពានលើអធិបតេយ្យភាពរបស់ខ្លួន។

នាយករដ្ឋមន្ត្រីថៃ បានគូសបញ្ជាក់ថា ដំណោះស្រាយស្ថិតក្នុងការហាមឃាត់ការនាំចូលពោតពីប្រទេសជិតខាង។ លោកថែមទាំងបានស្នើឱ្យមានការបង្កើនប្រព័ន្ធពន្ធដារ ប៉ុន្តែបានសម្តែងការព្រួយបារម្ភថា បញ្ហានេះអាចត្រូវបានច្រានចោលដោយភ្នាក់ងាររដ្ឋដែលពាក់ព័ន្ធ។ទោះជាយ៉ាងណាក៏ដោយ លោកបានសង្កត់ធ្ងន់លើតម្រូវការបន្ទាន់ក្នុងការអនុវត្តវិធានការទាំងនេះឱ្យបានហ្មត់ចត់ ហើយបានប្រកាសថាការនាំចូលពោតនឹងត្រូវហាមឃាត់ចាប់ពីខែមករាដល់ខែមេសាឆ្នាំក្រោយ។

នាយករដ្ឋមន្ត្រីវ័យ ៦២ ឆ្នាំរូបនេះ បានទទួលស្គាល់ថា បញ្ហាបំពុលធូលី PM2.5 កើតចេញពីបញ្ហាសេដ្ឋកិច្ចហើយកសិករងាកមកដុតចោលកាកសំណល់កសិកម្ម និងរៀបចំដីសម្រាប់ធ្វើស្រែចម្ការថ្មីខណៈអ្នកភូមិជនបទខ្លះក៏ដុតព្រៃដើម្បីស្វែងរកសត្វព្រៃផងដែរ។

ប្រភព៖ Tiger