អេស្ប៉ាញ ប្រកាសកាន់ទុក្ខជាតិ ៣ថ្ងៃ បន្ទាប់ពីគ្រោះថ្នាក់រថភ្លើងល្បឿនលឿនផ្តាច់ជីវិតមនុស្ស ៦៩នាក់

រដ្ឋាភិបាលអេស្ប៉ាញ បានប្រកាសកាន់ទុក្ខជាផ្លូវការរយៈពេល ៣ថ្ងៃ នៅទូទាំងប្រទេស បន្ទាប់ពីគ្រោះថ្នាក់បុកគ្នានៃរថភ្លើងល្បឿនលឿនដ៏រន្ធត់នៅខេត្ត Toledo បានផ្តាច់ជីវិតមនុស្សយ៉ាងហោចណាស់ ៦៩នាក់ និងបង្កឱ្យមនុស្សជាច្រើននាក់ផ្សេងទៀតរងរបួស ខណៈក្រុមសង្គ្រោះកំពុងបន្តប្រតិបត្តិការស្វែងរកជនរងគ្រោះយ៉ាងសស្រាក់សស្រាំ ក្នុងចំណោមកម្ទេចកាត់ផ្តាច់នៃទូរថភ្លើង។

យោងតាមសេចក្តីរាយការណ៍ពីទីភ្នាក់ងារព័ត៌មាន Reuters មហន្តរាយផ្លូវដែកដ៏ប្រល័យបំផុតនៅអឺរ៉ុប គិតចាប់តាំងពីឆ្នាំ២០១៣ មកនេះ បានកើតឡើងបន្ទាប់ពីប្រព័ន្ធសញ្ញាបញ្ជាមានការរអាក់រអួល ធ្វើឱ្យរថភ្លើងរបស់ក្រុមហ៊ុន Renfe ទទួលបានការអនុញ្ញាតឱ្យបើកបរក្នុងល្បឿនធម្មតា រហូតទៅបុកជាមួយរថភ្លើងរបស់ក្រុមហ៊ុន Iryo ដែលកំពុងឈប់ស្ងៀមនៅខាងមុខ។ ក្នុងចំណោមជនរងគ្រោះដែលបានបាត់បង់ជីវិត ក៏មានវត្តមានលោកស្រី Fatima Banez អតីតរដ្ឋមន្ត្រីក្រសួងការងារអេស្ប៉ាញផងដែរ។

គ្រោះថ្នាក់ដ៏រន្ធត់នេះ បានបង្កឱ្យមានរលកនៃការតវ៉ាចោទប្រកាន់រដ្ឋាភិបាលជុំវិញកង្វះខាតថវិកាវិនិយោគលើប្រព័ន្ធសុវត្ថិភាពផ្លូវដែក។ ជាមួយគ្នានេះ នាយករដ្ឋមន្ត្រីលោក Pedro Sanchez បានប្តេជ្ញាស៊ើបអង្កេតស្វែងរកការពិតនៃមហន្តរាយនេះឱ្យដល់ឫសគល់ ខណៈសម្តេចប៉ាប លេអូ (Pope Leo) ក៏បានផ្ញើសាររំលែកទុក្ខយ៉ាងក្រៀមក្រំដល់គ្រួសារជនរងគ្រោះផងដែរ។

ប្រភព៖ Reuters