ឯកឧត្តមបណ្ឌិត សោម រតនា៖ «ការអប់រំដែលមានគុណភាពពិតប្រាកដ ទាមទារឱ្យមានការចូលរួមយ៉ាងសកម្មពីគ្រប់ភាគីពាក់ព័ន្ធ ជាពិសេសការប្តេជ្ញាចិត្តរបស់គ្រឹះស្ថានផ្ទាល់»

ភ្នំពេញ៖ នាព្រឹកថ្ងៃទី២១ ខែកញ្ញា ឆ្នាំ២០២៦ ឯកឧត្តមបណ្ឌិត សោម រតនា អនុរដ្ឋលេខាធិការ ក្រសួងអប់រំ យុវជន និងកីឡា និងជាថ្នាក់ដឹកនាំទទួលបន្ទុកគណៈកម្មាធិការទទួលស្គាល់គុណភាពអប់រំនៃកម្ពុជា (ACC) បានអញ្ជើញជាអធិបតីក្នុងកម្មវិធីបើក «ការចុះវាយតម្លៃផ្ដល់ការទទួលស្គាល់គុណភាពអប់រំកម្រិតគ្រឹះស្ថានឧត្តមសិក្សា» នៅសាកលវិទ្យាល័យពាណិជ្ជសាស្ត្រអេស៊ីលីដា ដែលកម្មវិធីនេះមានការអញ្ជើញចូលរួមពីសំណាក់ លោកបណ្ឌិត សាកលវិទ្យាធិការ គណៈគ្រប់គ្រងសាកលវិទ្យាល័យ ព្រមទាំងសមាជិកនៃក្រុមមន្ត្រីវាយតម្លៃផងដែរ។

មានប្រសាសន៍ ទៅកាន់អង្គពិធីនាឱកាសនោះ ឯកឧត្តមបណ្ឌិត សោម រតនា បានបញ្ជាក់ជូនអំពីគោលបំណងសំខាន់ៗនៃការចុះវាយតម្លៃ និងបានសង្កត់ធ្ងន់ថា ការចុះវាយតម្លៃនេះ គឺជាយន្តការដ៏ចាំបាច់មួយរបស់ក្រសួង ក្នុងការធានាថាគ្រឹះស្ថានឧត្តមសិក្សាបានអនុវត្តយ៉ាងខ្ជាប់ខ្ជួននូវស្តង់ដាគុណភាពអប់រំកម្រិតខ្ពស់។ ឯកឧត្តមបណ្ឌិត បានបន្ថែមថា ការអប់រំដែលមានគុណភាពពិតប្រាកដ ទាមទារឱ្យមានការចូលរួមយ៉ាងសកម្មពីគ្រប់ភាគីពាក់ព័ន្ធ ជាពិសេសការប្តេជ្ញាចិត្តរបស់គ្រឹះស្ថានផ្ទាល់ ក្នុងការបន្តកែលម្អគុណភាពនៃការបង្រៀន ហេដ្ឋារចនាសម្ព័ន្ធ និងសេវាគាំទ្រនិស្សិត ដើម្បីធានាថាធនធានមនុស្សដែលបណ្តុះបណ្តាលរួច គឺពិតជាមានសមត្ថភាពពេញលេញ អាចឆ្លើយតបទៅនឹងតម្រូវការទីផ្សារការងារ និងចូលរួមចំណែកដល់ការអភិវឌ្ឍជាតិប្រកបដោយចីរភាព។

ទន្ទឹមនឹងនោះ ឯកឧត្តមបណ្ឌិត សាកលវិទ្យាធិការ ក៏បានធ្វើការរាយការណ៍សង្ខេបពីទិដ្ឋភាពរួម និងវឌ្ឍនភាពរបស់សាកលវិទ្យាល័យពាណិជ្ជសាស្ត្រអេស៊ីលីដា ជូនដល់អង្គពិធីផងដែរ។ ដោយឡែក បន្ទាប់ពីបានដំណើរការកិច្ចពិភាក្សាផ្លាស់ប្តូរមតិយោបល់យ៉ាងផុលផុស និងទទួលបាននូវមតិយោបល់ចុងក្រោយពីឯកឧត្តមបណ្ឌិត អនុរដ្ឋលេខាធិការ រួចមក គណៈអធិបតី រួមជាមួយក្រុមមន្ត្រីវាយតម្លៃ និងគណៈគ្រប់គ្រងសាកលវិទ្យាល័យ បានបន្តអញ្ជើញចុះធ្វើទស្សនកិច្ចដោយផ្ទាល់នៅតាមទីតាំងសំខាន់ៗក្នុងបរិវេណសាកលវិទ្យាល័យ ដើម្បីពិនិត្យមើលហេដ្ឋារចនាសម្ព័ន្ធ និងបរិក្ខារសិក្សាជាក់ស្តែងបន្ថែមទៀត។