ByteDance សម្រេចកិច្ចព្រមព្រៀងថ្មីជាមួយលោក ដូ ណាល់ត្រាំ ដើម្បីបញ្ចៀសការបិទកម្មវិធី TikTok នៅសហរដ្ឋអាម៉េរិក

នាថ្ងៃទី ២៣ ខែមករា ឆ្នាំ ២០២៦ នៅក្នុងការវិវត្តន៍ដ៏សំខាន់មួយសម្រាប់វិស័យបច្ចេកវិទ្យា ក្រុមហ៊ុន ByteDance ដែលជាក្រុមហ៊ុនមេរបស់ TikTok បានឈានដល់កិច្ចព្រមព្រៀងជាគោលការណ៍ជាមួយរដ្ឋបាលលោក ដូណាល់ ត្រាំ ក្នុងការបង្កើតក្រុមហ៊ុនរួមគ្នា (Joint Venture) ថ្មីមួយដែលមានមូលដ្ឋាននៅសហរដ្ឋអាមេរិក។ ការសម្រេចចិត្តនេះធ្វើឡើងក្នុងគោលបំណងបញ្ចៀសការបិទចោលកម្មវិធី TikTok ទាំងស្រុងនៅលើទឹកដីអាមេរិក ដែលជាបញ្ហាចម្រូងចម្រាសយ៉ាងខ្លាំងរវាងទីក្រុងវ៉ាស៊ីនតោន និងទីក្រុងប៉េកាំងនាពេលកន្លងមក។ ក្រោមរចនាសម្ព័ន្ធថ្មីនេះ ប្រតិបត្តិការរបស់ TikTok ក្នុងសហរដ្ឋអាមេរិក នឹងត្រូវគ្រប់គ្រងដោយអង្គភាពថ្មីមួយ ដែលមានវិនិយោគិនអាមេរិកកាន់កាប់ភាគហ៊ុនភាគច្រើន។

ពាក់ព័ន្ធនឹងសេចក្ដីលម្អិតនៃកិច្ចព្រមព្រៀងនេះ ក្រុមហ៊ុនថ្មីដែលត្រូវបានគេស្គាល់ជាបណ្តោះអាសន្នថា “TikTok USA” នឹងត្រូវគ្រប់គ្រងដោយក្រុមប្រឹក្សាភិបាលឯករាជ្យមួយ ដែលត្រូវបានយល់ព្រមដោយរដ្ឋាភិបាលសហរដ្ឋអាមេរិក។ ចំណុចសំខាន់បំផុតគឺរាល់ទិន្នន័យរបស់អ្នកប្រើប្រាស់អាមេរិក និងកូដដំណើរការ (Algorithms) ទាំងអស់ នឹងត្រូវរក្សាទុក និងគ្រប់គ្រងក្នុងមូលដ្ឋានទិន្នន័យនៅអាមេរិកផ្ទាល់ ដើម្បីធានាថាមិនមានការលេចធ្លាយ ឬការលូកដៃពីសំណាក់រដ្ឋាភិបាលចិន។ ប្រធានាធិបតី ដូណាល់ ត្រាំ បានមានប្រសាសន៍ថា នេះគឺជា “ជ័យជម្នះដ៏ធំសម្រាប់សន្តិសុខជាតិអាមេរិក” និងជាការការពារឯកជនភាពរបស់ពលរដ្ឋអាមេរិកបានយ៉ាងល្អប្រសើរ។

ទោះជាយ៉ាងណាក៏ដោយ ប្រតិកម្មពីខាងប្រទេសចិនហាក់នៅមានភាពចម្រុះនៅឡើយ។ ខណៈដែលក្រុមហ៊ុន ByteDance បង្ហាញក្តីរំភើបដែលអាចរក្សាទីផ្សារដ៏ធំបំផុតរបស់ខ្លួនបាន ប៉ុន្តែក្រសួងពាណិជ្ជកម្មចិនបានព្រមានថា ពួកគេនឹងពិនិត្យមើលកិច្ចព្រមព្រៀងនេះឱ្យបានល្អិតល្អន់ ដើម្បីធានាថាគ្មានបច្ចេកវិទ្យាសំខាន់ៗរបស់ចិនត្រូវបានបង្ខំឱ្យផ្ទេរចេញដោយខុសច្បាប់។ អ្នកជំនាញយល់ថា គំរូនៃ “ក្រុមហ៊ុនរួមគ្នា” នេះ អាចនឹងក្លាយជាស្តង់ដារថ្មីសម្រាប់ក្រុមហ៊ុនបច្ចេកវិទ្យាបរទេសដទៃទៀតដែលចង់រកស៊ីនៅអាមេរិក ក្នុងសម័យកាលនៃជម្លោះភូមិសាស្ត្រនយោបាយដ៏តានតឹងនេះ។ ទោះបីជាការគំរាមបិទចោលត្រូវបានដកចេញ ប៉ុន្តែព័ត៌មានលម្អិតផ្នែកច្បាប់មួយចំនួនទៀត នៅតែបន្តពិភាក្សា រហូតដល់មានការចុះហត្ថលេខាជាផ្លូវការចុងក្រោយ៕

ប្រភព៖ Reuters