ថៃជំរុញឱ្យមីយ៉ាន់ម៉ាពង្រឹងវិធានការសន្តិសុខ ដើម្បីទប់ស្កាត់ការរីករាលដាលនៃជម្លោះប្រដាប់អាវុធចូលក្នុងទឹកដីរបស់ខ្លួន

ប្រទេសថៃ និងមីយ៉ាន់ម៉ា បានព្រមព្រៀងគ្នាលើវិស័យសំខាន់ៗចំនួនបីនៃកិច្ចសហប្រតិបត្តិការគឺ ការបើកច្រកទ្វារព្រំដែន Myawaddy-Mae Sot ឡើងវិញ ការដោះស្រាយផលប៉ះពាល់ពីជម្លោះផ្ទៃក្នុងរបស់មីយ៉ាន់ម៉ា និងការបង្កើនកិច្ចខិតខំប្រឹងប្រែងរួមគ្នាដើម្បីដោះស្រាយបញ្ហាអ័ព្ទឆ្លងដែន បន្ទាប់ពីដំណើរទស្សនកិច្ចជាផ្លូវការរបស់ឧបនាយករដ្ឋមន្ត្រី និងរដ្ឋមន្ត្រីការបរទេសថៃ Sihasak Phuangketkeow។

បន្ថែមពីនេះស្តីពីសន្តិសុខ ប្រទេសថៃបានលើកឡើងពីការព្រួយបារម្ភអំពីផលប៉ះពាល់នៃការប្រយុទ្ធគ្នាដែលកំពុងបន្តនៅក្នុងប្រទេសមីយ៉ាន់ម៉ា និងបានជំរុញឱ្យមានវិធានការដើម្បីទប់ស្កាត់ការរីករាលដាលចូលទៅក្នុងទឹកដីថៃ ខណៈពេលដែលបានបញ្ជាក់ជាថ្មីថា ខ្លួននឹងឆ្លើយតបទៅនឹងការរំលោភបំពានណាមួយលើអធិបតេយ្យភាពរបស់ខ្លួន។ ភាគីទាំងពីរក៏បានព្រមព្រៀងគ្នាក្នុងការបង្កើនកិច្ចសហប្រតិបត្តិការប្រឆាំងនឹងឧក្រិដ្ឋកម្មឆ្លងដែន ជាពិសេសបណ្តាញបោកប្រាស់ដែលភ្ជាប់ទៅនឹងការងារបង្ខំ។

ជាមួយគ្នានេះ​ លោក Sihasak បាននិយាយថា ប្រទេសថៃគាំទ្រការចូលរួមឡើងវិញរបស់មីយ៉ាន់ម៉ានៅក្នុងអាស៊ាន ខណៈពេលដែលជំរុញឱ្យមានវឌ្ឍនភាពលើសន្តិភាព និងការផ្សះផ្សាជាតិ ដោយបន្ថែមថា ដំណើរទស្សនកិច្ចនេះមានគោលបំណងការពារផលប្រយោជន៍ជាតិរបស់ប្រទេសថៃ ជាពិសេសស្ថិរភាពព្រំដែន និងការតភ្ជាប់សេដ្ឋកិច្ច។

ប្រភព៖ Thai Requirer