រដ្ឋមន្ត្រីការបរទេសថៃ អះអាងថា កម្ពុជាមានសិទ្ធិប្ដឹងទៅ ICJ បើយល់ថាចាំបាច់ ប៉ុន្តែថៃក៏មានសិទ្ធិទាមទារឱ្យមានកិច្ចប្រជុំ JBC ដោយថៃមានឆន្ទៈធ្វើជាម្ចាស់ផ្ទះនៃកិច្ចប្រជុំនេះ ប្រសិនបើកម្ពុជាមិនទាន់ត្រៀមខ្លួនរួចរាល់!
រដ្ឋមន្ត្រីក្រសួងការបរទេស Maris Sangiampongsa បានបញ្ជាក់ថា ខណៈពេលដែលខ្លួនកំពុងនៅក្នុងប្រទេសបារាំងដើម្បីចូលរួមប្រជុំរបស់អង្គការសហប្រតិបត្តិការសេដ្ឋកិច្ច និងអភិវឌ្ឍន៍ (OECD) លោកបានបើកកិច្ចប្រជុំតាមប្រព័ន្ធអ៊ីនធឺណែតភ្លាមៗជាមួយរដ្ឋលេខាធិការអចិន្ត្រៃយ៍នៃក្រសួងការបរទេស និងទីភ្នាក់ងារពាក់ព័ន្ធ ដើម្បីដោះស្រាយបញ្ហានេះ ដោយអាទិភាពគឺត្រូវប្រើប្រាស់យន្តការការទូត ដើម្បីជៀសវាងការប្រឈមមុខដាក់គ្នា ឬជម្លោះបន្តទៀត។
លោក Maris អះអាងថា៖ «ប្រទេសថៃ និងកម្ពុជាជាប្រទេសជិតខាងដ៏យូរអង្វែង ហើយអ្វីដែលយើងត្រូវធ្វើគឺការស្វែងរកដំណោះស្រាយនោះគឺដោយសន្តិវិធី មិនមែនដោយបង្ខំទេនោះទេ។»
រដ្ឋមន្ត្រីការបរទេសរូបនេះ ក៏បានណែនាំដល់មន្ត្រីពាក់ព័ន្ធត្រូវប្រមូលទិន្នន័យចាំបាច់ទាំងអស់ រួមទាំងឯកសារច្បាប់ និងរូបថត ដើម្បីរៀបចំសម្រាប់ការចរចាក្រោមក្របខណ្ឌនៃគណៈកម្មាធិការព្រំដែនរួម (JBC) ដែលជាយន្តការផ្លូវការសម្រាប់ដោះស្រាយបញ្ហាព្រំដែន។
ទាក់ទងនឹងការជំរុញឱ្យមានកិច្ចប្រជុំ JBC លោក Maris បានបញ្ជាក់ជាថ្មីថា ប្រទេសថៃមានឆន្ទៈធ្វើជាម្ចាស់ផ្ទះនៃកិច្ចប្រជុំនេះ ប្រសិនបើកម្ពុជាមិនទាន់ត្រៀមខ្លួនរួចរាល់ ដោយចាត់ទុក JBC ជាវេទិកាដ៏សំខាន់សម្រាប់កាត់បន្ថយភាពតានតឹង និងពិភាក្សាអំពីកិច្ចព្រមព្រៀងជាក់ស្តែងស្តីពីការបោះបង្គោលព្រំដែន។
លោក Maris ក៏បានបង្ហាញបន្ថែមទៀតថា ប្រទេសថៃបានធ្វើការតវ៉ាជាផ្លូវការជាមួយកម្ពុជារួចហើយ ហើយសកម្មភាពរបស់ប្រទេសថៃគឺផ្អែកលើច្បាប់អន្តរជាតិ ដោយបញ្ជាក់ជាថ្មីអំពីអធិបតេយ្យភាព និងបូរណភាពទឹកដីរបស់ខ្លួនស្របតាមស្តង់ដារពិភពលោក។ លោក Maris ក៏គ្រោងនឹងកោះប្រជុំភ្លាមៗជាមួយមន្រ្តីជាន់ខ្ពស់នៃក្រសួងការបរទេសដើម្បីបង្កើតជំហរច្បាស់លាស់និងឆ្លើយតបទៅនឹងស្ថានភាពដែលកំពុងវិវត្ត។ លោកបានបញ្ជាក់ថា លោកបាននិងកំពុងវាយតម្លៃស្ថានភាពជាបន្តបន្ទាប់ និងជួបប្រជុំតាមប្រព័ន្ធអ៊ីនធឺណិតជាមួយមន្ត្រី សូម្បីតែពេលបំពេញភារកិច្ចនៅក្រៅប្រទេសក៏ដោយ។
Maris លើកឡើងថា ទាក់ទង់នឹងសំណើរបស់កម្ពុជាដែលស្នើឱ្យថៃពិចារណាបញ្ជូនរឿងនេះទៅតុលាការយុត្តិធម៌អន្តរជាតិ (ICJ) គឺកម្ពុជាមានសិទ្ធិយករឿងនេះទៅតុលាការ ICJ ប្រសិនបើយល់ថាចាំបាច់។ ទន្ទឹមនឹងនេះ ថៃក៏មានសិទ្ធិសម្រេចចិត្តលើដំណើរសកម្មភាពរបស់ខ្លួន មិនថាក្នុងកម្រិតទ្វេភាគី ឬតាមរយៈយន្តការអន្តរជាតិ ដោយសង្កត់ធ្ងន់ថា នេះជាបញ្ហាដាច់ដោយឡែកពីដំណើរការ JBC ដែលផ្តោតលើការចរចាដោយផ្ទាល់រវាងប្រទេសទាំងពីរ។
ប្រភព៖ The Nation
