អង្គការយូណេស្កូ និងអង្គការសហប្រជាជាតិ ធ្វើទស្សនកិច្ចស្វែងយល់ពីកិច្ចការអភិរក្ស និងការគ្រប់គ្រងរមណីយដ្ឋានប្រាសាទព្រះវិហារ
លោក Sardar Umar ALam ប្រធានការិយាល័យតំណាងអង្គការយូណេស្កូ(UNESCO) ប្រចាំនៅកម្ពុជា និងលោកJoseph Scheuer អ្នកសម្របសម្រួលអង្គការសហប្រជាជាតិប្រចាំនៅកម្ពុជា (UNRC) ព្រមទាំងសហការី ចំនួន៥រូប បានធ្វើទស្សនកិច្ចសិក្សាស្វែងយល់អំពីកិច្ចការអភិរក្ស ការជួសជុលប្រាសាទ និងការគ្រប់គ្រងរមណីយដ្ឋានប្រាសាទព្រះវិហារ កាលពីព្រឹកថ្ងៃទី៣០ ខែឧសភា ឆ្នាំ២០២៣នេះ។
![](https://media.brandbodia.com/wp-content/uploads/2023/05/IMG_4983-1024x683.jpg)
ក្នុងដំណើរទស្សនកិច្ចនេះ មានការសម្របសម្រួលដោយ ឯកឧត្តម ឃូ អៀងហួត អគ្គនាយករង អាជ្ញាធរជាតិព្រះវិហារ និងលោក ភិន សំណាង ប្រធាននាយកដ្ឋានស្រាវជ្រាវ បណ្តុះបណ្តាល និងតម្កល់ឯកសារ រួមទាំងមន្រ្តីជំនាញបុរាណវិទ្យា ដែលកំពុងអនុវត្តការងារលើភ្នំប្រាសាទព្រះវិហារ។
![](https://media.brandbodia.com/wp-content/uploads/2023/05/IMG_4980-1024x683.jpg)
![](https://media.brandbodia.com/wp-content/uploads/2023/05/IMG_4979-1024x683.jpg)
នៅក្នុងដំណើរទស្សនកិច្ចនេះ ប្រតិភូបានចុះទៅពិនិត្យការដ្ឋានជួសជុលជណ្តើរបុរាណខាងជើង ដែលគាំទ្រថវិកាដោយមូលនិធិឯកអគ្គរដ្ឋទូតសម្រាប់ការអភិរក្សវប្បធម៌របស់សហរដ្ឋអាមេរិក គោបុរៈទី៥ដែលកំពុងដំណើរការជួសជុលដោយអ្នកជំនាញការឥណ្ឌា និងបានបន្តសិក្សាស្វែងយល់អំពីការងារអភិរក្សតាមបណ្តាប្រាសាទនានាចាប់ពីគោបុរៈទី៥ ដល់គោបុរៈទី១។ បន្ទាប់ពីទស្សនៈកិច្ចនៅលើភ្នំប្រាសាទព្រះវិហាររួច ក្រុមការងារក៏បានស្វែងយល់ពីប្រវត្តិសាស្រ្ត រូបចម្លាក់បុរាណ វប្បធម៌ អរិយធម៌ខ្មែរ តាំងពីសម័យអតីតកាល ដែលបានតាំងបង្ហាញនៅក្នុងសារៈមន្ទីរធម្មជាតិសកលសម្តេចតេជោ ហ៊ុន សែន ផងដែរ។
![](https://media.brandbodia.com/wp-content/uploads/2023/05/IMG_4985-1024x683.jpg)
![](https://media.brandbodia.com/wp-content/uploads/2023/05/IMG_4981-1024x683.jpg)
នៅចុងបញ្ចប់នៃដំណើរទស្សនកិច្ចនេះ ប្រតិភូរបស់អង្គការUNESCO និង UNRC បានវាយតម្លៃខ្ពស់ពីភាពអស្ចារ្យនៃសំណង់ស្ថាបត្យកម្មប្រាសាទព្រះវិហារ និងបច្ចេកទេសជួសជុលសំណង់ប្រាសាទបុរាណប្រកបដោយវិជ្ជាជីវៈរបស់មន្រ្តីជំនាញអាជ្ញាធរជាតិ។
![](https://media.brandbodia.com/wp-content/uploads/2023/05/IMG_4984-1024x683.jpg)
ប្រភព: អាជ្ញាធរជាតិព្រះវិហារ