ឯកឧត្តម ហ៊ុន ម៉ានី៖ ទំនាក់ទំនងការទូតរយៈពេល៦៦ ឆ្នាំ និងបទពិសោធពីទស្សនកិច្ចប្រាំថ្ងៃនេះ បានឱ្យខ្ញុំ និងគណៈប្រតិភូកម្ពុជា ស្វែងយល់កាន់តែច្បាស់នូវព្រះរាជបន្ទូលរបស់ព្រះបរមរតនកោដ្ឋ ប្រសាសន៍របស់សម្តេចតេជោ និងសម្តេចធិបតី

នេះជាការគូសបញ្ជាក់របស់ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បន្ទាប់ពីដំណើរទស្សនកិច្ចរយៈពេល ០៥ ថ្ងៃ នៅសាធារណរដ្ឋប្រជាមានិតចិន

តាមរយៈសំណេរនៅលើទំព័រផ្លូវការ ឯកឧត្តម ហ៊ុន ម៉ានី បានលើកឡើងថា «តបតាមសំណើរបស់ភាគីក្រសួងចាត់តាំងនៃគណៈមជ្ឈឹមបក្សកុម្មុយនីស្តចិន និងស្ថាប័នរដ្ឋបាលមុខងារសាធារណៈចិន ខ្ញុំបានដឹកនាំគណៈប្រតិភូកម្ពុជា ក្នុងក្របខណ្ឌក្រសួងមុខងារសាធារណៈ និងក្របខណ្ឌគណបក្ស ទៅបំពេញទស្សនកិច្ចផ្លូវការនៅសារធារណរដ្ឋប្រជាមានិតចិនចាប់ពីថ្ងៃទី២៦ ដល់ថ្ងៃទី៣០ ខែសីហា ឆ្នាំ២០២៤។ សម្រាប់ដំណើរទស្សនកិច្ចនេះ ទោះមានរយៈពេលខ្លី តែទទួលបានការស្វាគមន៍ រាក់ទាក់ ផ្តល់ឱកាសពិគ្រោះយោបល់ ត្រង់ទៅត្រង់មក ដើម្បីផលប្រយោជន៍រួមក្នុងការបង្កើតកិច្ចសហប្រតិបត្តិការក្របខណ្ឌបក្ស រដ្ឋ (កិច្ចការរដ្ឋបាលសាធារណៈ) និងប្រជាជន (យុវជន និងយុវជន)។

គួររំឭកផងដែរពីទំនាក់ទំនងកម្ពុជា-ចិន ដែលចាប់ផ្តើមចេញពីកិច្ចខិតខំប្រឹងប្រែងរបស់ថ្នាក់ដឹកនាំជំនាន់មុនរវាង ព្រះបរមរតនកោដ្ឋ ជាមួយ ឯកឧត្តមប្រធាន ម៉ៅ សេទុង និង ឯកឧត្តម ជូ អេងឡាយ។ តាមព្រះរាជសុវណ្ណីរបស់ ហ្លួងយាយ ជំនួបដំបូងគឺនៅឆ្នាំ១៩៥៥ រវាងសម្តេចតា និងឯកឧត្តម ជូ អេងឡាយ ក្នុងឱកាសនៃសន្និសីទទីក្រុងបានឌុង (Bandung) នៅប្រទេសឥណ្ឌូណេស៊ី។ សម្តេចតា ធ្លាប់បានលើកឡើងថា បើទោះប្រទេសចិនជាប្រទេសធំ កម្ពុជាជាប្រទេសតូច តែទំនាក់ទំនង គឺផ្អែកលើភាពស្មើភាពគ្នា និងគោរពគ្នាទៅវិញ ទៅមក។

មូលដ្ឋានគ្រឹះនៃទំនាក់ទំនងនេះ បានរីកលូតលាស់ជាបន្ទបន្ទាប់រហូតដល់ដំណាក់កាលសម្តេចតេជោ និង ឯកឧត្តម ហូ ជីនតាវ ក្នុងការអនុវត្តក្របខណ្ឌនៃ «កិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ» និង សម្តេចតេជោ ជាមួយឯកឧត្តម ស៊ី ជីនពីង រហូតក្លាយជា «មិត្តដែកថែបកម្ពុជា-ចិន» ហើយឈានដល់ការដាក់ចេញនូវ «ក្របខណ្ឌកិច្ចសហប្រតិបត្តិការត្បូងពេជ្រ» ដែលបន្តអនុវត្តដោយ សម្តេចធិបតី ជាមួយនិង ឯកឧត្តម ស៊ី ជីនពីង ជាពិសេសទំនាក់ទំនងលើគ្រប់វិស័យក្នុងទិសដៅឆ្ពោះទៅការរួមគ្នាកសាងសហគមន៍វាសនារួមកម្ពុជា-ចិនក្នុងយុគសម័យថ្មី។ ទំនាក់ទំនងទាំងអស់នេះ គឺក្នុងគោលដៅអភិវឌ្ឍន៍ជាតិ ដោយប្រែទំនាក់ទំនងទៅជាផលប្រយោជន៍ជាក់ស្តែងសម្រាប់ប្រជាជន។

តាមរយៈទំនាក់ទំនងការទូតដែលឈានដល់ខួប៦៦ ឆ្នាំ និងបទពិសោធ ពីទស្សនកិច្ចប្រាំថ្ងៃនេះ បានឱ្យខ្ញុំ និងគណៈប្រតិភូកម្ពុជា ដែលជាកម្មាភិបាលជំនាន់ក្រោយ ស្វែងយល់កាន់តែច្បាស់បន្ថែមនូវអ្វីជាព្រះរាជបន្ទូលរបស់ ព្រះបរមរតនកោដ្ឋ ប្រសាសន៍របស់សម្តេចតេជោ និងសម្តេចធិបតី ដែលតែងលើកឡើងជាប្រចាំថា ទំនាក់ទំនងកម្ពុជា-ចិន គឺជាទំនាក់ទំនងពិសេសដោយការគោរពគ្នា និងការជឿទុកចិត្តគ្នា។»