CDC បានឱ្យដឹងថា មេរោគកូវីដ-១៩ បម្លែងថ្មី មានសមត្ថភាពចម្លងខ្លាំងជាងវីរុសប្រភេទចាស់ៗ

មជ្ឈមណ្ឌលគ្រប់គ្រង និងបង្ការជំងឺឆ្លងរបស់សហរដ្ឋអាមេរិក (CDC) កាលពីពេលថ្មីៗនេះបាននិយាយថា ខ្សែសង្វាក់ថ្មី BA.2.86 នៃមេរោគឆ្លងអាចមានសមត្ថភាពចម្លងខ្លាំងជាងវីរុសប្រភេទចាស់ៗ និងអាចឆ្លងទាំងចំពោះអ្នកដែលធ្លាប់ឆ្លងកូវីដ-១៩  និងអ្នកបានទទួលវ៉ាក់សាំងរួចហើយក៏ដោយ។

យ៉ាងណាមិញ គេនៅមិនទាន់សន្និដ្ឋានបានច្បាស់នៅឡើយទេថា វាអាចបណ្តាលឱ្យមានជំងឺធ្ងន់ធ្ងរខ្លាំងឬយ៉ាងណា បើប្រៀបធៀបទៅនឹងការប្រែប្រួលពីមុន។ ប៉ុន្តែដោយសារតែចំនួននៃការផ្លាស់ប្តូរដ៏ច្រើននៃ BA.2.86 ដែលត្រូវបានរកឃើញ មានការព្រួយ និងសញ្ញាគួរឱ្យបារម្ភអំពីផលប៉ះពាល់របស់វាទៅលើភាពស៊ាំពីវ៉ាក់សាំង និងការឆ្លងពីមុន។

អ្នកវិទ្យាសាស្ត្រកំពុងតាមដាន BA.2.86 ព្រោះវាមានការផ្លាស់ប្តូររហូតដល់ទៅ ៣៦ លើកពីមេរោគបម្លែងថ្មី XBB.1.5 ដែលកំពុងរីករាលដាលនាពេលបច្ចុប្បន្ន។

ទោះជាយ៉ាងណាក៏ដោយ CDC បាននិយាយថាសំណាកមេរោគមិនទាន់អាចរកបានយ៉ាងទូលំទូលាយ សម្រាប់ការធ្វើតេស្តមន្ទីរពិសោធន៍ដែលអាចទុកចិត្តបានបន្ថែមទៀត អំពីអង្គបដិប្រាណនោះទេ។

ទីភ្នាក់ងារនេះបាននិយាយកាលពីដើមខែនេះថា ខ្លួនកំពុងតាមដានពូជពង្ស BA.2.86 ដែលបានផ្លាស់ប្តូរយ៉ាងខ្លាំងនេះ យ៉ាងយកចិត្តទុកដាក់ បន្ទាប់មានការរកឃើញនៅក្នុងសហរដ្ឋអាមេរិក ដាណឺម៉ាក និងអ៊ីស្រាអែល។

 ប្រភព: CNA

រូបភាព: FDA