កងទ័ពជប៉ុន ចូលរួមសមយុទ្ធយោធានៅហ្វីលីពីន ជាលើកដំបូងក្នុងប្រវត្តិសាស្រ្ត ចាប់តាំងពីបញ្ចប់សង្គ្រាមលោកលើកទី២ មក!

សមយុទ្ធយោធារួម និងពហុជាតិសាសន៍ដែលមានការចូលរួមពីកងកម្លាំងជប៉ុននៅប្រទេសហ្វីលីពីន បានចាប់ផ្តើមជាផ្លូវការនៅថ្ងៃចន្ទ ខណៈកងកម្លាំងការពារខ្លួនលើដីរបស់ជប៉ុន (GSDF) បានចូលរួមជាលើកដំបូងក្នុងសមយុទ្ធប្រចាំឆ្នាំ “Salaknib” ដែលរៀបចំរួមគ្នារវាងសហរដ្ឋអាមេរិក និងហ្វីលីពីន។

កងកម្លាំង GSDF ប្រមាណ ៤២០ នាក់ បានចូលរួមក្នុងសមយុទ្ធនេះ ក្រោមការគ្រប់គ្រងរបស់មជ្ឈមណ្ឌលហ្វឹកហាត់ពហុជាតិអាស៊ី-ប៉ាស៊ីហ្វិក (JPMRC) លេខ ២៦ ដែលដឹកនាំដោយសហរដ្ឋអាមេរិក។ កងកម្លាំងនេះរួមមានកងពលតូចទី១២ និងអង្គភាពពិសេសផ្សេងៗ រួមទាំងវេជ្ជសាស្ត្រ សង្គ្រាមអេឡិចត្រូនិក និងអាវុធពិសេស។

តាមការបញ្ជាក់របស់ GSDF សមយុទ្ធក្រោម JPMRC ដែលនឹងបន្តរហូតដល់ថ្ងៃទី២០ ខែឧសភា មានគោលបំណងបង្កើនសមត្ថភាពប្រតិបត្តិការ និងការសហការយោធាជាមួយសហរដ្ឋអាមេរិក និងដៃគូក្នុងតំបន់ ក្នុងបរិបទសន្តិសុខថ្មីដែលរួមមានវិស័យប្រយុទ្ធទំនើប។ សកម្មភាពហ្វឹកហាត់រួមមានទាំងការបាញ់គ្រាប់ពិត និងលំហាត់យោធាប្រកបដោយបច្ចេកទេសខ្ពស់។

ចំពោះសមយុទ្ធ “Salaknib” កងកម្លាំង GSDF បានសហការជាមួយកងទ័ពហ្វីលីពីនប្រមាណ ៤,៤០០ នាក់ កងទ័ពអាមេរិក ២,៨០០ នាក់ ព្រមទាំងកងកម្លាំងពីប្រទេសអូស្ត្រាលី និងនូវែលសេឡង់។ សមយុទ្ធនេះជាដំណាក់កាលដំបូងនៃសកម្មភាពយោធាពហុជាតិសាសន៍ដែលនឹងបន្តអនុវត្តនៅតំបន់កោះហ្វីលីពីនក្នុងសប្តាហ៍បន្ទាប់។

ដំណាក់កាលដំបូងនៃសមយុទ្ធនេះ នឹងប្រព្រឹត្តទៅរហូតដល់ថ្ងៃទី១៧ ខែមេសា នៅតំបន់ហ្វឹកហាត់សំខាន់ៗ រួមមាន Fort Magsaysay ក្នុងខេត្ត Nueva Ecija និងតំបន់ផ្សេងៗនៅភាគខាងជើងកោះ Luzon។

គួរបញ្ជាក់ថា ការចូលរួមរបស់ជប៉ុនក្នុងសមយុទ្ធនេះ ត្រូវបានចាត់ទុកថាជាជំហានប្រវត្តិសាស្ត្រមួយ ព្រោះវាជាលើកដំបូងចាប់តាំងពីបញ្ចប់សង្គ្រាមលោកលើកទី២ ដែលជប៉ុនបានបញ្ជូនកងកម្លាំងដែលមានសមត្ថភាពប្រយុទ្ធចូលទៅក្នុងប្រទេសហ្វីលីពីន ក្នុងនាមជាដៃគូសន្តិសុខ មិនមែនជាអ្នកកាន់កាប់ដូចអតីតកាលទេ។

មន្ត្រីហ្វីលីពីន ក៏បានឲ្យដឹងថា អាចមានកងកម្លាំងជប៉ុនប្រមាណ ១,០០០ នាក់ ចូលរួមក្នុងសមយុទ្ធ “Balikatan” ជាមួយកងកម្លាំងពីប្រទេសជាច្រើន រួមមានសហរដ្ឋអាមេរិក កាណាដា អូស្ត្រាលី បារាំង និងនូវែលសេឡង់ ដែលបង្ហាញពីការពង្រីកកិច្ចសហប្រតិបត្តិការសន្តិសុខក្នុងតំបន់។

ក្រៅពីនេះ កងកម្លាំងជប៉ុនក៏ត្រូវបានរំពឹងថានឹងចូលរួមសមយុទ្ធ “Kamandag” ជាមួយកងម៉ារីនអាមេរិក និងហ្វីលីពីននៅខែមិថុនា និងកក្កដា ខណៈសហរដ្ឋអាមេរិកកំពុងពង្រីកការដាក់ពង្រាយប្រព័ន្ធមីស៊ីល និងបច្ចេកវិទ្យាយោធាទំនើបផ្សេងៗនៅហ្វីលីពីន ដើម្បីពង្រឹងសមត្ថភាពទប់ស្កាត់ក្នុងតំបន់។

ការចូលរួមកងកម្លាំងជប៉ុនត្រូវបានគាំទ្រដោយកិច្ចព្រមព្រៀងចូលប្រើប្រាស់ទៅវិញទៅមក (Reciprocal Access Agreement) រវាងជប៉ុន និងហ្វីលីពីន ដែលបានចូលជាធរមានកាលពីខែកញ្ញាឆ្នាំមុន ដោយបង្កើតមូលដ្ឋានច្បាប់សម្រាប់កិច្ចសហប្រតិបត្តិការយោធាដែលកាន់តែជិតស្និទ្ធរវាងប្រទេសទាំងពីរ។

ប្រភព៖ The Japan Times