ទើបតែមកកម្ពុជាបានប៉ុន្មានថ្ងៃ សមាជិកគណៈកម្មាធិការប្រតិបត្តិនៃក្រុមប្រឹក្សាអូឡាំពិកជាតិសិង្ហបុរី បានបង្ហាញការពេញចិត្តយ៉ាងខ្លាំងនឹងការរៀបចំរបស់ម្ចាស់ផ្ទះកម្ពុជា
បន្ទាប់ពីពិធីស្វាគមន៍ក្រុមកីឡានៅពហុកីឡដ្ឋានជាតិមរតកតេជោ ក្នុងរាជធានីភ្នំពេញ នៅថ្ងៃពុធ ទី០៣ ខែឧសភានេះ លោកបណ្ឌិត Hing Siong Chen បានថ្លែងប្រាប់ទៅកាន់សារព័ត៌មានអន្តរជាតិដ៏ល្បីមួយ ដោយលើកឡើងថា ម្ចាស់ផ្ទះកម្ពុជា ពិតជារៀបចំបានល្អណាស់។
![](https://media.brandbodia.com/wp-content/uploads/2023/05/IMG_6069.jpg)
លោកបណ្ឌិត Hing ដែលជាសមាជិកគណៈកម្មាធិការប្រតិបត្តិនៃក្រុមប្រឹក្សាអូឡាំពិកជាតិសិង្ហបុរី (SNOC) និងជាប្រធានសហព័ន្ធកីឡាជិះកង់សិង្ហបុរីបានមានប្រសាសន៍ថា សម្រាប់ការធ្វើជាម្ចាស់ផ្ទះនាឱកាសនេះ កម្ពុជាបានរៀបចំទទួលអត្តពលិក និងប្រតិភូកីឡាមកពីបណ្ដាប្រទេសនានាយ៉ាងកក់ក្ដៅ។ នៅបន្ទប់ស្នាក់នៅ មានម៉ាស៊ីនត្រជាក់ទាំងអស់ មានទឹករត់ មានទឹកក្តៅសម្រាប់ងូត មានសេវាបោកអ៊ុតសម្រាប់ពួកគេ ព្រមទាំងមានលេខាធិការដ្ឋាននៅទីនោះ ដើម្បីឱ្យប្រាកដអ្វីៗផ្សេងទៀតដែលពួកគេត្រូវការ នឹងត្រូវរៀបចំនៅទីនោះ។ ដោយឡែក លោកក៏បានកោតសរសើរចំពោះការរៀបចំម្ហូបអាហារដ៏សម្បូរបែប ទាំងរសជាតិ និងអនាម័យសម្រាប់ក្រុមអត្តពលិកផងដែរ។
![](https://media.brandbodia.com/wp-content/uploads/2023/05/IMG_6070-1024x683.jpg)
ជាមួយគ្នានេះ លោកបានបន្តថា កម្ពុជាមានកន្លែងហាត់ប្រាណដ៏ធំសម្បើមសម្រាប់អត្តពលិក ទាំងកន្លែងវាយកូនគោល អាងហែលទឹកជាដើម ដែលអាចឱ្យអត្តពលិកអាចហ្វឹកហាត់បានយ៉ាងងាយស្រួល។ រាល់ការរៀបចំ គឺកម្ពុជាដឹងពីអ្វីដែលអត្តពលិកត្រូវការ ព្រោះកម្ពុជាក៏មានអត្តពលិករបស់ខ្លួនដែរ ដូច្នេះកម្ពុជាបានបានគ្រោងទុកវាយ៉ាងល្អ សម្រាប់ការប្រកួត។
លោកវេជ្ជបណ្ឌិត ហ៊ីង បាននិយាយថា «វាពិតជាល្អណាស់ដែលបាននៅទីនេះជាមួយក្រុមទាំងមូល» ។ ពួកគេទាំងអស់គ្នាពិតជារំភើបណាស់ និងបានត្រៀមខ្លួនរួចរាល់ហើយសម្រាប់ការហ្វឹកហាត់ និងការប្រកួត ហើយឥឡូវនេះពួកគេទាំងអស់គ្នារីករាយណាស់ដែលបានមកទីនេះ។ លោកបានបន្ថែមថា រហូតមកដល់ពេលនេះ អត្តពលិករបស់ក្រុមសិង្ហបុរីបានសម្របខ្លួនបានយ៉ាងល្អ។
![](https://media.brandbodia.com/wp-content/uploads/2023/05/IMG_6071.jpg)
គួរបញ្ជាក់ថា នេះជាលើកដំបូងរបស់កម្ពុជាដែលធ្វើជាម្ចាស់ផ្ទះព្រឹត្តិការណ៍ថ្នាក់តំបន់។ ស៊ីហ្គេមលើកទី៣២ នឹងមាន ៣៦ប្រភេទកីឡា ដោយព្រឹត្តិការណ៍បើកកីឡាស៊ីហ្គេមជាផ្លូវការ នឹងប្រព្រឹត្តទៅនៅថ្ងៃសុក្រទី០៥ ខែមេសា ឆ្នាំ២០២៣នេះ ប៉ុន្តែព្រឹត្តិការណ៍កីឡាមួយចំនួនរួមមានបាល់ទាត់ ទូកក្តោង និងវាយកូនគោលកំពុងដំណើរការហើយ៕
ប្រភព៖ CNA