កូរ៉េខាងត្បូង ថ្កោលទោសកូរ៉េខាងជើងដែលដាក់ពាក្យបណ្ដឹងទៅUN ជុំវិញបញ្ហានៃការបង្ហោះដ្រូន
ប្រទេសកូរ៉េខាងត្បូងកាលពីថ្ងៃអង្គារបានរិះគន់កូរ៉េខាងជើងដែលដាក់ពាក្យបណ្ដឹងទៅកាន់ទីភ្នាក់ងារអាកាសចរណ៍អង្គការសហប្រជាជាតិ ដោយចោទប្រកាន់កូរ៉េខាងត្បូងជុំវិញការលុកលុយតាមរយៈយន្តហោះគ្មានមនុស្សបើក។ កូរ៉េខាងត្បូង បានជំរុញឱ្យទីក្រុងព្យុងយ៉ាងកុំធ្វើនយោបាយចំពោះឧបទ្ទវហេតុនេះដោយមិនផ្តល់ភស្តុតាងច្បាស់លាស់។
របបកូរ៉េខាងជើង ដែលសង្ស័យថាយោធាកូរ៉េខាងត្បូងជាអ្នកនៅពីក្រោយការលុកលុយរបស់យន្តហោះគ្មានមនុស្សបើកដែលបានកើតឡើងក្នុងខែតុលាថ្មីៗនេះ បានដាក់សំណើទៅអង្គការអាកាសចរណ៍ស៊ីវិលអន្តរជាតិ (ICAO) ដើម្បីស៊ើបអង្កេតឧបទ្ទវហេតុនេះ។
មន្ត្រីក្រសួងការបរទេសបាននិយាយក្នុងលក្ខខណ្ឌសុំមិនបញ្ចេញឈ្មោះថា “ជំហររបស់យើងគឺយើងប្រឆាំងនឹងការប៉ុនប៉ងរបស់កូរ៉េខាងជើងក្នុងការធ្វើនយោបាយលើបញ្ហា ICAO ដោយមិនបង្ហាញភស្តុតាងច្បាស់លាស់។
ខណៈពេលដែល ICAO មិនបានបញ្ជាក់ថាតើទីក្រុងព្យុងយ៉ាងបានធ្វើសំណើឬយ៉ាងណានោះ មន្ត្រីនៅទីក្រុងសេអ៊ូលត្រូវបានគេរាយការណ៍ថាកំពុងពិចារណាវិធានការឆ្លើយតបក្នុងការរៀបចំសម្រាប់ការស៊ើបអង្កេតដែលអាចធ្វើទៅបានដោយអង្គការអន្តរជាតិ។
អ្នកនាំពាក្យក្រសួងការបរទេសលោក Lee Jae-woong បាននិយាយថា “យើងជឿថាវាមិនមែនជាពេលសមរម្យសម្រាប់ពួកយើងក្នុងការនិយាយលើបញ្ហាដែលមិនត្រូវបានដោះស្រាយជាផ្លូវការដោយអង្គការអន្តរជាតិពាក់ព័នោះទេន្ធ” ។
ទោះជាយ៉ាងណាក៏ដោយ លោក Lee បានកត់សម្គាល់ថា ក្រោមបទប្បញ្ញត្តិ និងការអនុវត្តរបស់ ICAO អង្គការត្រូវបានតម្រូវឱ្យពិនិត្យមើលបញ្ហាណាមួយដែលបានលើកឡើងដោយរដ្ឋជាសមាជិករបស់ខ្លួន។
គួរបញ្ជាក់ថា ការចោទប្រកាន់អំពីការលុកលុយរបស់យន្តហោះគ្មានមនុស្សបើក មានតាំងពីខែតុលា នៅពេលដែលទីក្រុងព្យុងយ៉ាងបានអះអាងថា យន្តហោះគ្មានមនុស្សបើករបស់កូរ៉េខាងត្បូងបានទម្លាក់ខិត្តប័ណ្ណប្រឆាំងទីក្រុងព្យុងយ៉ាងនៅលើរដ្ឋធានីរបស់ខ្លួនក្នុងឱកាសបីផ្សេងគ្នាកាលពីដើមខែនោះ។ ឆ្លើយតបទៅនឹងសកម្មភាពនេះ កូរ៉េខាងជើងបានបង្ហាញការវិភាគរបស់ខ្លួនលើកំណត់ហេតុហោះហើររបស់យន្តហោះគ្មានមនុស្សបើក ដោយចោទប្រកាន់ថាពួកគេបានហោះចេញពីកោះ Baengnyeong ក្នុងសមុទ្រខាងលិច។ កូរ៉េខាងជើងបានពិពណ៌នាសកម្មភាពនេះថាជា “ការបង្កហេតុដោយអៀនខ្មាសដោយក្រុមក្មេងទំនើងយោធាកូរ៉េខាងត្បូង” និងបានគំរាមកំហែងការសងសឹកភ្លាមៗក្នុងករណីមានការឈ្លានពានបន្ថែមទៀត។
ជុំវិញបញ្ហានេះ យោធាកូរ៉េខាងត្បូងបានបដិសេធមិនធ្វើអត្ថាធិប្បាយដោយផ្ទាល់លើការអះអាងរបស់កូរ៉េខាងជើងឡើយ” ខណៈដែលអ្នកនាំពាក្យក្រសួងការពារជាតិ លោក Jeon Ha-kyou បាននិយាយនៅក្នុងសន្និសីទសារព័ត៌មានមួយកាលពីថ្ងៃអង្គារថា “យើងមិនមានយោបល់ជាក់លាក់ណាមួយលើបញ្ហានេះទេ” ។
ប្រភព៖ The Korea Time
