មន្ត្រីជាន់ខ្ពស់ក្រសួងអប់រំ ជំរុញឱ្យនិស្សិតតាមបណ្ដាសាកលវិទ្យាល័យ គួរចូលរួមប្រកួតប្រជែងបញ្ចេញសមត្ថភាពក្នុងកម្មវិធីយុវជន២១
នាថ្ងៃទី២៤ ខែសីហា ឆ្នាំ២០២៣ នាយកដ្ឋានយុវជន នៃអគ្គនាយកដ្ឋានយុវជន ក្រសួងអប់រំ យុវជន និងកីឡា បានរៀបចំវគ្គប្រកួតជម្រុះយក ៣ក្រុម នៃកម្មវិធីយុវជន២១ ក្រោមប្រធានបទ “សហគ្រិនឌីជីថល៖ នវានុវត្តន៍អាជីវកម្ម” ឆ្នាំ២០២៣ ក្រោមអធិបតីភាព ឯកឧត្ដម សេរី ជំនះ រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា។
![](https://media.brandbodia.com/wp-content/uploads/2023/08/A608C3F2-32B4-4B49-BDE8-352558BEADD2-1024x576.jpeg)
ថ្លែងក្នុងឱកាសនេះ ឯកឧត្ដមរដ្ឋលេខាធិការបានកោតសរសើរ និងវាយតម្លៃខ្ពស់ ចំពោះអគ្គនាយកដ្ឋានយុវជន នាយកដ្ឋានយុវជន ដែលបានខិតខំ ប្រើប្រាស់អស់ថាមពលកម្លាំងកាយចិត្ត បញ្ញាស្មារតី ក្នុងការរៀបចំកម្មវិធី “យុវជន២១” ឆ្នាំ២០២៣ រដូវកាលទី៣ ក្រោមប្រធានបទ “សហគ្រិនឌីជីថល៖ នវានុវត្តន៍អាជីវកម្ម”»។ ឯកឧត្ដម ក៏បានលើកទឹកចិត្ត និងជំរុញដល់និស្សិតតាមបណ្ដាសាកលវិទ្យាល័យនានាគ្រប់រូប គួរគប្បីពង្រឹងសមត្ថភាព និងចូលរួមប្រកួតប្រជែងបញ្ចេញសមត្ថភាពក្នុងកម្មវិធីយុវជន២១ នាឆ្នាំបន្តបន្ទាប់ទៀត។
![](https://media.brandbodia.com/wp-content/uploads/2023/08/56087041-05F1-4320-99B1-DC3149359BEC-1024x683.jpeg)
![](https://media.brandbodia.com/wp-content/uploads/2023/08/90CF6D57-5CC3-488D-9B0C-594630F4E464-1024x683.jpeg)
![](https://media.brandbodia.com/wp-content/uploads/2023/08/059C57A3-BE10-438E-9538-CAE24411E095-1024x683.jpeg)
សូមជម្រាបថា ប្រធានបទសម្រាប់ឆ្នាំ២០២៣ មានខ្លឹមសារសំខាន់ផ្ដោតលើការបណ្តុះបណ្តាល និងអភិវឌ្ឍសមត្ថភាពយុវជនកម្ពុជា ឱ្យមានគំនិតផ្ដួចផ្ដើមអាជីវកម្មថ្មី និងអភិវឌ្ឍអាជីវកម្មឱ្យមានលក្ខណៈកាន់តែស៊ីជម្រៅប្រសើរជាងមុន ដើម្បីស្វែងរកដំណោះស្រាយបញ្ហានៅក្នុងបរិបទថ្មី និងមានបំណិនរៀបចំគម្រោងអាជីវកម្មបែបឌីជីថលដែលអនុវត្តបាននៅក្នុងសង្គមជាក់ស្ដែង៕
ប្រភព: MoEYS