ប្លែកភ្នែក! ក្រសួងកសិកម្ម រុក្ខាប្រមាញ់ និងនេសាទ រៀបចំតាំងផលិតផលបន្លែខ្មែរជាបាច់និងកន្ត្រកជំនួសឱ្យផ្កាដើម្បី អបអរបុណ្យនៃក្ដីស្រលាញ់

កាលពីថ្ងៃទី១៤ ខែកុម្ភៈ ឆ្នាំ២០២៣ម្សិលមិញនេះ ក្រសួងកសិកម្ម រុក្ខាប្រមាញ់ និងនេសាទ បានរៀបចំឱ្យមានការតាំងផលិតផលបន្លែខ្មែរជាបាច់និងកន្ត្រកជំនួសឱ្យផ្កាដើម្បី អបអរថ្ងៃ១៤កុម្ភៈ ដែលត្រូវបានគេស្គាល់ជាទូទៅថាជាថ្ងៃទិវានៃក្តីស្រលាញ់។ ក្នុងឱកាសនេះ ផលិតផលខ្មែរជាច្រើនមុខកំពុងដាក់តាំងលក់ពិសេសបន្លែសុវត្ថិភាព អង្ករបាយឆ្ងាញ់ និងស្រាផ្លែឈើរសជាតិស្រទន់ ដែលបានវេចខ្ចប់យ៉ាងស្អាតសម្រាប់ជាកាដូថ្ងៃដ៏ពិសេសនេះ ដោយមានស្តង់ជាច្រើន ដូចជាសាកលវិទ្យាល័យភូមិន្ទកសិកម្ម និងមាសបៃតងជាដើម។

ម្ចាស់ស្តង់មួយកន្លែងដែលកំពុងដាក់លក់បានលើកឡើងថា “ថ្ងៃនេះជាថ្ងៃនៃក្តីស្រលាញ់ យើងបានយកផលិតផលសុវត្ថិភាពមកដាក់លក់ចែកជូនបងប្អូនអ្នកទទួលទានដើម្បីសុខភាពល្អ គឺយើងធ្វើការផ្សារភ្ជាប់ក្តីស្រលាញ់ និងសុខភាព” “ស្រលាញ់គ្រួសារ ពិសាអាហារសុវត្ថិភាព”។ ផលិតផលដែលតាំងលក់គឺផលិតផលស្រស់មានប្រមាណជាង ២០មុខ ហើយរបស់កែច្នៃមានប្រមាណជិត ២០មុខ ដែលជាផលិតផលសុវត្ថិភាព ល្អសម្រាប់សុខភាព ដោយមិនមានសារធាតុគីមីឡើយ។ សម្រាប់អតិថិជនវិញ បានបង្ហាញពីអារម្មណ៍រំភើបរីករាយដែលក្រសួងផ្តើមរៀបចំឱ្យមានការតាំងលក់បន្លែសុវត្ថិភាពនៅទីនេះ “ខ្ញុំមកទិញបន្លែ គឺដោយសារខ្ញុំស្រលាញ់បន្លែ និងស្រលាញ់អ្នកដែលខ្ញុំទិញបន្លែទៅឱ្យ”៕

ប្រភព: ក្រសួងកសិកម្ម រុក្ខាប្រមាញ់ និងនេសាទ