ចិនបដិសេធព័ត៌មានដែលថា កំពុងរៀបគម្រោង លក់មីស៊ីលការពារដែនអាកាស រាប់រយគ្រឿង ឱ្យអ៊ីរ៉ង់

ប៉េកាំង៖ រដ្ឋាភិបាលចិន កាលពីថ្ងៃព្រហស្បតិ៍ បានច្រានចោលយ៉ាងដាច់អហង្ការចំពោះរបាយការណ៍ដែលអះអាងថា ចិនមានផែនការគ្រោងទុក ក្នុងការលក់ប្រព័ន្ធមីស៊ីលការពារដែនអាកាសប្រភេទ QW-12 និង FN-16 ចន្លោះពី ៣០០ ទៅ ៤០០ គ្រឿង ឱ្យប្រទេសអ៊ីរ៉ង់។

អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) បានបញ្ជាក់ថា ព័ត៌មានទាំងនេះ «គ្មានមូលដ្ឋានទាល់តែសោះ» ហើយបានសង្កត់ធ្ងន់ថា ចិនតែងតែប្រកាន់ខ្ជាប់នូវគោលនយោបាយលើកកម្ពស់សន្តិភាព និងស្ថិរភាពក្នុងតំបន់។

ទន្ទឹមនឹងនេះ ចិនក៏បានការពារសកម្មភាពរបស់នាវាចម្បាំងពិឃាតប្រភេទ Type 052D របស់ខ្លួនផងដែរ បន្ទាប់ពីក្រុមហ៊ុនផលិតយានលើផ្ទៃទឹកគ្មានមនុស្សបើករបស់សហរដ្ឋអាមេរិក Seasats បានបញ្ចេញវីដេអូបង្ហាញពីសកម្មភាពនាវាចិននៅក្នុងតំបន់សេដ្ឋកិច្ចផ្តាច់មុខ (EEZ) របស់ហ្វីលីពីន។

ក្រៅពីនេះ ចិនក៏បានបង្ហាញការគាំទ្រយ៉ាងពេញទំហឹងចំពោះប្រទេសឥណ្ឌា ក្នុងនាមជាប្រធានប្តូរវេននៃកិច្ចប្រជុំកំពូល BRICS ដែលគ្រោងនឹងប្រារព្ធធ្វើនៅទីក្រុង ញូវដេលី នាខែកញ្ញាខាងមុខ។ ទោះជាយ៉ាងណា លោកស្រី ម៉ៅ នីង មិនទាន់បញ្ជាក់ថា ប្រធានាធិបតី ស៊ី ជីនពីង នឹងចូលរួមកិច្ចប្រជុំនេះឬយ៉ាងណានោះទេ ប៉ុន្តែបានអះអាងថា BRICS គឺជាយន្តការកិច្ចសហប្រតិបត្តិការពហុភាគីដ៏សំខាន់។

ទោះបីជាជម្លោះព្រំដែនរវាងប្រទេសទាំងពីរនៅមិនទាន់ដោះស្រាយបានទាំងស្រុងក៏ដោយ ភាគីទាំងពីរបានឯកភាពគ្នាបន្តរក្សាស្ថិរភាព និងពង្រឹងទំនាក់ទំនងទ្វេភាគីឱ្យកាន់តែរឹងមាំ ស្របតាមការឯកភាពដែលសម្រេចបានតាមរយៈកិច្ចពិភាក្សាកាលពីឆ្នាំ២០២៥។

ប្រភព៖ VIORY