ក្រុមការងារទំនាក់ទំនងសាធារណៈ នៃព្រឹត្តការណ៍អង្គរសង្រ្កាន្តឆ្នាំ២០២៥ រៀបចំពិធីប្រុងពាលីសុំសេចក្តីសុខ និងបើកមជ្ឈមណ្ឌលព័ត៌មានជាផ្លូវការ នៅបរិវេណខាងមុខប្រាសាទអង្គរវត្ត

នាព្រឹកថ្ងៃទី១៣ ខែមេសា ឆ្នាំ២០២៥ ឯកឧត្តមបណ្ឌិត សោម រតនា ប្រធានក្រុមការងារទំនាក់ទំនងសាធារណៈ នៃព្រឹត្តការណ៍អង្គរសង្រ្កាន្តឆ្នាំ២០២៥ បានអញ្ជើញដឹកនាំក្រុមការងាររៀបចំពិធីប្រុងពាលីសុំសេចក្តីសុខ និងបើកមជ្ឈមណ្ឌលព័ត៌មានជាផ្លូវការ នៅបរិវេណខាងមុខប្រាសាទអង្គរវត្ត។ ពិធីនេះមានការអញ្ជើញចូលរួមពីសំណាក់ ឯកឧត្តម លោកជំទាវ ប្រធាន អនុប្រធាន និងសមាជិក សមាជិកា ក្រុមការងារ និងយុវជនស្ម័គ្រចិត្តក្រុមការងារទំនាក់ទំនងសាធារណៈ សរុបប្រមាណ ៦០នាក់។

ពិធីនេះធ្វើឡើងក្នុងគោលបំណងបួងសួងម្ចាស់ទឹកម្ចាស់ដី ទសបារមី ដើម្បីសុំសេចក្តីសុខ និងជោគជ័យសម្រាប់ការងារផ្សព្វផ្សាយ និងទំនាក់ទំនងសាធារណៈ នៃគណៈកម្មការរៀបចំព្រឹត្តិការណ៍អង្គរសង្រ្កាន្ត ក៏ដូចជាព្រឹត្តិការណ៍អង្គរសង្រ្កាន្តទាំងមូល។ សូមជម្រាបជូនថា មជ្ឈមណ្ឌលព័ត៌មានគឺជាកន្លែងក្រុមការងារទំនាក់ទំនងសាធារណៈអនុវត្តការងារបច្ចេកទេស និងផ្សព្វផ្សាយ ជាពិសេសនោះជាទីតាំងសម្រាប់បងប្អូនអ្នកសារព័ត៌មានមកទទួលកាត សាកសួរព័ត៌មាន និងជាទីតាំងដែលពួកគាត់អាចផលិតមាតិកា ខ្លឹមសារផងដែរ។

គួរបញ្ជាក់ផងដែរថា ឆ្នាំនេះជាឆ្នាំទី១២ នៃព្រឹត្តិការណ៍អង្គរសង្ក្រាន្ត ដែលជាព្រឹត្តិការណ៍នៃការលើកយកនូវកេរតំណែលអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមករំលេចឡើងជាផ្ទាំង ទស្សនីយភាពវប្បធម៌ជាច្រើនដូចជា៖ ល្បែងប្រជាប្រិយ របាំបុរាណ របាំប្រពៃណី និងរបាំប្រជាប្រិយ ការបង្ហាញពីជីវភាពរស់នៅរបស់ប្រជាជនកម្ពុជានៅតាមតំបន់ និងសិល្បៈទស្សនីយភាពជាច្រើនទៀត។