មនុស្សស្លាប់ដោយសាររញ្ជួយដីក្នុងប្រទេសថៃកើនឡើងដល់ ១៨ នាក់ ខណៈ ៧៨ នាក់ផ្សេងទៀត នៅមិនទាន់បានរកឃើញនៅឡើយ

រដ្ឋបាលក្រុងបាងកកបាននិយាយថា យ៉ាងហោចណាស់មនុស្ស ១៨ នាក់បានស្លាប់នៅក្នុងប្រទេសថៃ ដែលជាលទ្ធផលនៃគ្រោះរញ្ជួយដីដ៏ខ្លាំងដែលបានវាយប្រហារប្រទេសមីយ៉ាន់ម៉ាកាលពីថ្ងៃសុក្រ ខណៈដែលមនុស្សចំនួន ៧៨ នាក់ទៀត នៅតែមិនទាន់បានរកឃើញ បើគិតត្រឹមថ្ងៃអាទិត្យនេះ។

សាកសពជនរងគ្រោះទី ១០ត្រូវបានទាញចេញពីគំនរបាក់បែកកាលពីថ្ងៃសៅរ៍ ខណៈមនុស្សប្រាំបីនាក់កំពុងទទួលការព្យាបាលរបួសដែលបានរងរបួសពីការបាក់អគារកម្ពស់ ៣០ ជាន់។

អ្នកស្លាប់ចំនួនប្រាំបីនាក់ទៀតត្រូវបានគេរាយការណ៍ថានៅរកឃើញនៅកន្លែងផ្សេងទៀតក្នុងរដ្ឋធានី រួមទាំងការដ្ឋានសំណង់ខុនដូ ដែលរថយន្តស្ទូចបានដួលរលំដោយសារតែកម្លាំងរញ្ជួយ។ ជាមួយគ្នានេះមនុស្សបីនាក់ក៏បានរងរបួសដែរនៅអគារមួយក្បែរផ្លូវស៊ីឡំក្នុងពេលរញ្ជួយដី។

អភិបាលក្រុងបាងកក លោក Chadchart Sittipunt បាននិយាយថា ប្រតិបត្តិការស្វែងរក និងជួយសង្គ្រោះនៅអគារការិយាល័យសវនកម្មរដ្ឋបានបន្តកាលពីថ្ងៃអាទិត្យ ដោយក្រុមអ្នកជួយសង្គ្រោះបានដាក់ពង្រាយឧបករណ៍ស្កែនដែលផ្តល់ដោយស្ថានទូតអ៊ីស្រាអែលប្រចាំប្រទេសថៃ ដើម្បីជួយស្វែងរកអ្នកដែលនៅតែជាប់នៅក្រោមគំនរបាក់បែក។

លោកបានបន្តថា អាជ្ញាធរបានបោសសម្អាតបានប្រមាណ ៨០ ភាគរយនៃកម្ទេចកម្ទីដែលបានបិទផ្លូវចេញដ៏មមាញឹកនៅតាមបណ្តោយផ្លូវ Din Daeng។ ប្រសិនបើប្រតិបត្តិការនេះមិនត្រូវបានបញ្ចប់នៅចុងសប្ដាហ៍នោះ សាលាក្រុងនឹងចេញសេចក្តីជូនដំណឹងឱ្យប្រជាពលរដ្ឋទាំងអស់ធ្វើការពីផ្ទះ ក្នុងគោលបំណងទប់ស្កាត់ការបិទផ្លូវធំនៅកណ្តាលទីក្រុង។

ការរញ្ជួយដីក៏បានរំខានដល់បណ្តាញផ្លូវដែកអគ្គិសនីរបស់ទីក្រុងផងដែរ។ គិតត្រឹមថ្ងៃអាទិត្យនេះ ខ្សែរថភ្លើងអគ្គិសនីទាំងអស់ក្នុងទីក្រុងបានដំណើរការឡើងវិញហើយ លើកលែងតែរថភ្លើង MRT Pink Line monorail ដែលនៅតែបិទដោយសារតែខូចការផ្គត់ផ្គង់ថាមពល។ឭ៕

ប្រភព៖ Bangkok Post