ឯកឧត្តមហ៊ុន ម៉ានី ថ្លែងអំណរគុណដល់គណបក្សកម្លាំងជាតិ សម្រាប់សាររំលែកទុក្ខ

នាថ្ងៃទី២៩ ខែមីនា ឆ្នាំ២០២៥នេះ គណៈបក្សកម្លាំងជាតិ បានចេញលិខិតរំលែកទុក្ខ និងសម្ដែងការសោកស្ដាយចំពោះមរណភាពរបស់ អ្នកឧកញ៉ា ឧត្តមមេត្រីវិសិដ្ឋ ហ៊ុន សាន។

ឆ្លើយតបទៅនឹងការចូលរួមរំលែកទុក្ខនេះ ឯកឧត្តម ហ៊ុន ម៉ានី បានបង្ហោះលិខិតចូលរួមរំលែកទុក្ខរបស់គណបក្សកម្លាំងជាតិតាមរយៈទំព័រផ្លូវការ ដោយភ្ជាប់ជាមួយខ្លឹមសារថា «តាមរយៈលិខិតចូលរួមរំលែកទុក្ខខាងលើ ក្នុងនាមក្រុមគ្រួសារនៃសព ខ្ញុំសូមថ្លែងអំណរគុណ ដល់គណបក្សកម្លាំងជាតិ ដែលបានចែករំលែកសារ រំលែកទុក្ខ សម្រាប់ ឯកឧត្តម អ្នកឧកញ៉ា ឧត្តមមេត្រីវិសិដ្ឋ ហ៊ុន សាន ដែលត្រូវជាអ៊ំប្រុសបង្កើតរបស់ខ្ញុំ។ សារជាថ្មីក្នុងនាមក្រុមគ្រួសារ ខ្ញុំសូមអរគុណសម្រាប់សាររំលែកទុក្ខ។»

គួរបញ្ជាក់ថា ឯកឧត្តម អ្នកឧកញ៉ា ឧត្តមមេត្រីវិសិដ្ឋ ហ៊ុន សាន បងប្រុសបង្កើតរបស់ សម្តេចតេជោ ហ៊ុន សែន បានទទួលមរណភាព នៅវេលាម៉ោង ២៖២៧នាទីព្រឹក ថ្ងៃទី២៨ ខែមីនា ឆ្នាំ២០២៥នេះ ក្នុងជន្មាយុ៧៨ឆ្នាំ ដោយរោគាពាធ។