ឯកឧត្តមបណ្ឌិត សោម រតនា៖ “ការងារទំនាក់ទំនងសាធារណៈ​ គ្មានក្លិន គ្មានពណ៌ គ្មានរសជាតិ មើលមិនឃើញ តែមានសារៈសំខាន់​ និងមានឥទ្ធិពល”

ក្នុងបទបង្ហាញទី២ ក្នុងវគ្គបណ្តុះបណ្តាលដើម្បីអភិវឌ្ឍសមត្ថភាពជំនាញផ្សព្វផ្សាយនិងទំនាក់ទំនងសាធារណៈ ឯកឧត្តមបណ្ឌិត សោម រតនា អនុរដ្ឋលេខាធិការនៃក្រសួងអប់រំ យុវជន និងកីឡា បានអញ្ជើញជាវាគ្មិនកិត្តិយស ដើម្បីធ្វើបទបង្ហាញលើប្រធានបទស្តីពី«គន្លឹះសំខាន់ៗ លើការងារនិងវិជ្ជាជីវៈទំនាក់ទំនងសាធារណៈ»។

ឯកឧត្តមបណ្ឌិត លើកឡើងថា ការងារផ្សព្វផ្សាយ និងទំនាក់ទំនងសាធារណៈ គឺជាផ្នែកមួយដ៏សំខាន់នៃការគ្រប់គ្រង និងកសាងរូបភាពជាវិជ្ជមានរបស់បុគ្គល ឬស្ថាប័នណាមួយ ជាមួយសាធារណជន ដោយប្រើប្រាស់ទំនាក់ទំនង ជាមូលដ្ឋាន។ ឯកឧត្តមបណ្ឌិតបានបន្ថែមថា អ្នកផ្សព្វផ្សាយនិងទំនាក់ទំនងសាធារណៈ ត្រូវធ្វើការស្រាវជ្រាវ និងវិភាគទៅលើកំណត់ក្រុមគោលដៅ និងធ្វើការស្រាវជ្រាវអំពីទស្សនៈ និងការយល់ឃើញរបស់ពួកគេ ពីយើង ព្រមទាំងវិភាគកត្តាផ្សេងៗ ដែលអាចនឹងមានឥទ្ធិពលលើការយល់ឃើញបែបនោះ និងដែលអាចមានឥទ្ធិពលលើការកំណត់យុទ្ធសាស្រ្តសម្រាប់យុទ្ធនាការរបស់យើង។

លើសពីការងាររៀបចំខ្លឹមសារ ឯកឧត្តមបណ្ឌិត បានបញ្ជាក់ថា អ្នកផ្សព្វផ្សាយ និងទំនាក់ទំនងសាធារណៈ​ត្រូវមានវិធីសាស្រ្ត៖​ (១) ក្តាប់បញ្ហាឱ្យជាប់ និងយល់ស្នូលនៃបញ្ហា (២) ប្រមូលព័ត៌មាន តាមដែលអាចធ្វើទៅបាន (៣) លើកលែងតែកាលៈទេសៈតម្រូវ កុំឆាប់បញ្ចេញសារតប (៤) ត្រៀម​ប្រើប្រាស់មធ្យោបាយផ្សព្វផ្សាយ ដែលត្រឹមត្រូវនឹងទំហំបញ្ហា (៥) បន្តក្តាប់យកប្រតិកម្មតប ទៅនឹងសារដែលបានបញ្ចេញ។

ជាសារក្នុងបទបង្ហាញនេះ ឯកឧត្តមបណ្ឌិត បានផ្តាំផ្ញើរថា “ទំនាក់ទំនងសាធារណៈ​ គ្មានក្លិន គ្មានពណ៌ គ្មានរសជាតិ មើលមិនឃើញ តែមានសារៈសំខាន់​ និងមានឥទ្ធិពល។ ឥទ្ធិពលទាំងនោះ នឹងអាចផ្តល់ផលជះល្អផង និងបង្កហានិភ័យផង។”