តំបន់សេដ្ឋកិច្ចដែលគាំទ្រដោយ BRI បានជំរុញកំណើនពាណិជ្ជកម្មកម្ពុជាដល់ ៣៨,៣% ត្រឹម ២ ខែដំបូងនៃឆ្នាំ២០២៤

ប្រតិបត្តិករតំបន់នេះ បាននិយាយនៅក្នុងសេចក្តីប្រកាសព័ត៌មានថា តម្លៃនៃការនាំចូល និងការនាំចេញឆ្លងកាត់តំបន់សេដ្ឋកិច្ចពិសេសក្រុងព្រះសីហនុ (SSEZ) នៅកម្ពុជា បានកើនឡើងដល់ ៦២៨ លានដុល្លារក្នុងរយៈពេលពីរខែដំបូងនៃឆ្នាំ ២០២៤ កើនឡើង ៣៨,៣ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២៣។

ការបណ្តាក់ទុនរួមគ្នាដោយវិនិយោគិនចិន និងកម្ពុជា SSEZ គឺជាគម្រោងដ៏លេចធ្លោមួយក្រោមគំនិតផ្តួចផ្តើមខ្សែក្រវ៉ាត់ និងផ្លូវ (BRI) របស់ប្រទេសចិន។

សេចក្តីប្រកាសព័ត៌មានបានបន្តថា៖ «កំណើននេះបង្ហាញថាតំបន់សេដ្ឋកិច្ចពិសេសគឺជាកាតាលីករដ៏សំខាន់មួយសម្រាប់ការអភិវឌ្ឍរបស់ប្រទេសកម្ពុជា។

ចាប់តាំងពីដើមឆ្នាំ ២០២៤ មក SSEZដែលមាន ១១ គីឡូម៉ែត្រការ៉េបានទាក់ទាញសហគ្រាសថ្មីចំនួន ៨ ដែលនាំឱ្យចំនួនសហគ្រាសសរុបនៅក្នុងតំបន់នេះកើនឡើងដល់ ១៨៨ រហូតមកដល់ពេលនេះ ជាមួយនឹងការងារជាង៣០,០០០ ត្រូវបានបង្កើតឡើង។

អ្នកស្រី នាគ ចាន់ដារិទ្ធ ប្រធានមជ្ឈមណ្ឌលស្រាវជ្រាវផ្លូវសូត្រសមុទ្រសតវត្សរ៍ទី ២១ កម្ពុជា បាននិយាយកាលពីថ្ងៃពុធថា SSEZ មានទីតាំងនៅជិតកំពង់ផែស្វយ័តក្រុងព្រះសីហនុដែលមានទឹកជ្រៅ ដែលមានភាពងាយស្រួលសម្រាប់ពាណិជ្ជកម្មរវាងកម្ពុជា និងពិភពលោក។

លោកស្រីបានមានប្រសាសន៍ថា “តំបន់សេដ្ឋកិច្ចនេះបានរួមចំណែកក្នុងការជំរុញកំណើនសេដ្ឋកិច្ចរបស់ប្រទេសកម្ពុជា និងបង្កើតការងារជាច្រើនដល់ប្រជាជនក្នុងស្រុក”។

SSEZ រួមជាមួយនឹងគម្រោង BRI សំខាន់ៗផ្សេងទៀត បាននិងកំពុងដើរតួនាទីយ៉ាងសំខាន់ក្នុងការជួយកម្ពុជាសម្រេចបាននូវគោលដៅដ៏មានមហិច្ឆតារបស់ខ្លួនក្នុងការក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។

គួរបញ្ជាក់ថា SSEZ ត្រូវបានបង្កើតឡើងក្នុងឆ្នាំ ២០០៨ រំពឹងថានឹងអាចផ្ទុកសហគ្រាសរហូតដល់ ៣០០ ដែលរំពឹងថានឹងបង្កើតការងាររហូតដល់ ១០០,០០០ កន្លែងសម្រាប់ប្រជាជនក្នុងតំបន់។

ប្រភព៖ CGTN, Xinhuo