មនុស្សជាង ៧,០០០ នាក់មកពីមជ្ឈមណ្ឌលឆបោកក្នុងប្រទេសមីយ៉ាន់ម៉ាកំពុងរង់ចាំការធ្វើមាតុភូមិនិវត្តន៍បន្ទាប់ពីការបង្ក្រាបក្នុងតំបន់

ការបង្រ្កាបថ្មីលើមជ្ឈមណ្ឌលបោកប្រាស់តាមអ៊ីនធឺណិតបាននាំឱ្យមនុស្សជាង ៧,០០០នាក់ មកពីជុំវិញពិភពលោកត្រូវបានឃុំខ្លួននៅព្រំដែនមីយ៉ាន់ម៉ាដែលកំពុងរង់ចាំការធ្វើមាតុភូមិនិវត្តន៍ ជាចំនួនដែលមិនធ្លាប់មានពីមុនមក និងអាចឈានដល់ការពន្យាពេលក្នុងការអនុវត្ត។

ការចាកចេញដ៏ច្រើននេះកើតឡើងបន្ទាប់ពីប្រទេសថៃបានអនុវត្តវិធានការយ៉ាងចាស់ដៃកាលពីថ្ងៃទី៥ខែកុម្ភៈ ដោយកាត់ផ្តាច់ចរន្តអគ្គិសនី ការលក់ប្រេង និងសេវាអ៊ីនធឺណិតទៅតំបន់ព្រំដែន។ បន្ទាប់ពីចំណាត់ការនេះម្ចាស់អចលនៈទ្រព្យជាច្រើនរាយការណ៍ថា អ្នកជួលជនជាតិចិនបានបញ្ឈប់ការជួល និងបានដកឧបករណ៍ចេញពីបរិវេណទីតាំងដែលធ្លាប់មានបុគ្គលិករាប់រយនាក់។ បើតាមឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ លោក Phumtham Wechayachai បាននិយាយថា នៅមានជនរងគ្រោះអន្តរជាតិប្រមាណ៧០០០នាក់ទៀត កំពុងរង់ចាំការធ្វើមាតុភូមិនិវត្តន៍។ ថៃកំពុងសម្របសម្រួលជាមួយស្ថានទូតមកពីទ្វីបអាហ្រ្វិក អាមេរិកឡាទីន អឺរ៉ុប និងអាស៊ី ដើម្បីរៀបចំជើងហោះហើរជម្លៀសដោយផ្ទាល់។

ជារឿយៗពួកគេត្រូវបានល្បួងក្រោមការក្លែងបន្លំដើម្បីធ្វើការនៅក្នុងមជ្ឈមណ្ឌលឆបោកក្នុងប្រទេសមីយ៉ាន់ម៉ា និងឡាវ ជាកន្លែងដែលពួកគេកេងប្រវ័ញ្ចផ្នែកហិរញ្ញវត្ថុតាមរយៈការវិនិយោគក្លែងក្លាយ និងគម្រោងល្បែងស៊ីសងខុសច្បាប់។

មន្ត្រីមកពីប្រទេសថៃ មីយ៉ាន់ម៉ា និងចិន ត្រូវបានគេរំពឹងថានឹងជួបប្រជុំគ្នានៅសប្តាហ៍ក្រោយ ដើម្បីដោះស្រាយការដឹកជញ្ជូននៃការបង្រ្កាប ខណៈដែលការភ័យខ្លាចកើនឡើងអំពីវិបត្តិមនុស្សធម៌ដែលអាចកើតមាន។ អ្នកនាំពាក្យក្រសួងការពារជាតិថៃ លោក Thanathip Sawangsang បានប្រាប់សារព័ត៌មាន The Associated Press ថា ពួកគេមានបំណងបង្កើតគោលការណ៍ណែនាំសម្រាប់ការធ្វើមាតុភូមិនិវត្តន៍ ដើម្បីជៀសវាងការភ័ន្តច្រឡំ។

ឧបនាយករដ្ឋមន្ត្រីថៃ លោក Phumtham Wechayachai កាលពីថ្ងៃអង្គារបានទទួលស្គាល់ការព្រួយបារម្ភ ហើយបាននិយាយថា ភ្នាក់ងារពាក់ព័ន្ធកំពុងធ្វើការលើស្ថានភាពនេះឱ្យបានលឿនតាមដែលអាចធ្វើទៅបាន ដើម្បីសម្របសម្រួលការធ្វើមាតុភូមិនិវត្តន៍។

ប្រភព៖ NBC News