រដ្ឋមន្ត្រីក្រសួងអប់រំ និងឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា ចុះហត្ថលេខាលើកិច្ចព្រមព្រាង (Letter of Agreement, LoA) ស្តីអំពីការពង្រឹង និងពង្រីកកិច្ចសហកាប្រតិបត្តិការរវាងគ្នាលើវិស័យអប់រំ

នាព្រឹកថ្ងៃទី២៣ ខែតុលា ឆ្នាំ២០២៤ នៅស្ថានទូតសាធារណរដ្ឋកូរ៉េប្រចាំកម្ពុជា ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបពិសាអាហារថ្ងៃត្រង់ និងពិភាក្សាការងារជាមួយ ឯកឧត្តម Park Jung-wook ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំ និងមន្ត្រីពាក់ព័ន្ធក្រោមឱវាទ។

ក្នុងឱកាសនេះដែរ ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី និង ឯកឧត្ដម ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា បានចុះហត្ថលេខាលើកិច្ចព្រមព្រាង (Letter of Agreement, LoA) ស្តីអំពីការពង្រឹង និងពង្រីកកិច្ចសហកាប្រតិបត្តិការរវាងគ្នាលើវិស័យអប់រំ ក្នុងគោលបំណង៖ ១). ផ្តល់ថ្នាក់ភាសាកូរ៉េជាមុខវិជ្ជាផ្លូវការនៅវិទ្យាល័យគោលដៅចំនួន១៥ នៅកម្ពុជា ២). បង្កើនប្រសិទ្ធភាពនៃការអនុវត្តគម្រោងតាមរយៈការជំរុញកិច្ចសហការរវាងស្ថាប័នអនុវត្តផ្ទាល់ និងភាគីពាក់ព័ន្ធ និង ៣). កំណត់លក្ខខណ្ឌ និងការប្តេជ្ញាចិត្តរបស់ភាគីនីមួយៗ ក្នុងការសម្របសម្រួលដល់ប្រតិបត្តិការថ្នាក់ភាសាកូរ៉េ ជាមុខវិជ្ជាផ្លូវការនៅវិទ្យាល័យគោលដៅក្នុងប្រទេសកម្ពុជា។

ជាថ្មីម្តងទៀត ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសសើរ និងថ្លែងអំណរគុណយ៉ាងជ្រាលជ្រៅចំពោះការប្តេជ្ញាចិត្តរបស់រដ្ឋាភិបាលសាធារណៈរដ្ឋកូរ៉េ ក្នុងការបន្តលើកកម្ពស់កិច្ចសហប្រតិបត្តិការជាមួយរាជរដ្ឋាភិបាលកម្ពុជាស្ទើរគ្រប់វិស័យ ជាពិសេសគឺគម្រោងជាច្រើនក្នុងវិស័យអប់រំ ដែលបានចូលរួមចំណែកយ៉ាងសំខាន់ក្នុងការអភិវឌ្ឍធនធានមនុស្សនៅកម្ពុជា ស្របតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ឆ្ពោះទៅសម្រេចចក្ខុវិស័យកម្ពុជា ២០៣០ និង ២០៥០៕