ឯកឧត្តម នួន ផារ័ត្ន អញ្ជើញជាអធិបតីភាពក្នុងពិធីប្រារព្ធខួបលេីកទី១៧ ទិវាអតីតយុទ្ធជនកម្ពុជា

នៅស្នងការដ្ឋាននគរបាលរាជធានីភ្នំពេញ នារសៀលថ្ងៃទី២១ ខែមិថុនា ឆ្នាំ២០២៤ បានរៀបចំ អបអរសាទរ ពិធីសំណេះសំណាល និងប្រារព្ធខួបលើកទី១៧ ទិវាអតីតយុទ្ធជនកម្ពុជា ក្នុងគោលបំណងរំលឹកដឹងគុណ នូវវីរភាពអង់អាចក្លាហានរបស់បងប្អូនអតីតយុទ្ធដែលជាគំរូនៃឆន្ទៈស្នេហាជាតិពិតប្រាកដ។

ពិធីនេះប្រព្រឹត្តទៅក្រោមអធិបតីភាព ឯកឧត្តម នួន ផារ័ត្ន អភិបាលរងនៃគណៈអភិបាលរាជធានីភ្នំពេញ ដែលជាតំណាង ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ជាប្រធានកិត្តិយស សមាគមអតីតយុទ្ធជនកម្ពុជា រាជធានីភ្នំពេញ និង ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ជាប្រធានសមាគមអតីតយុទ្ធជនកម្ពុជា រាជធានីភ្នំពេញ ។

ជាមួយគ្នានោះមានការអញ្ជើញចូលរួមពីលោកលោកស្រីជាអនុប្រធានសមាគមអតីតយុទ្ធជនកម្ពុជា រាជធានីភ្នំពេញ លោកលោកស្រីប្រធានកិត្តិយស ប្រធានសមាគមអតីតយុទ្ធជនកម្ពុជា តាមបណ្តាខណ្ឌទាំង១៤ និងសមាជិកសមាជិកាសមាគមអតីតយុទ្ធជនកម្ពុជា រាជធានីភ្នំពេញសរុប៣២០នាក់។

ក្នុងឱកាសនោះ គណៈអធិបតីក៏បានឧបត្ថម្ភថវិកាដែលជាអំណោយដ៏ថ្លៃថ្លារបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ជាអនុប្រធានទី១ សមាគមអតីតយុទ្ធជនកម្ពុជា ជូនដល់សមាជិកសមាជិកាសមាគមអតីតយុទ្ធជនកម្ពុជា រាជធានីភ្នំពេញ៣២០នាក់ ក្នុង០១នាក់ទទួលបានថវិកា១០ម៉ឺនរៀល៕

ប្រភព៖ ស្នងការដ្ឋាននគរបាលរាជធានីភ្នំពេញ