លទ្ធផលល្អផ្ទួនៗ! ស្របពេលដែលការបិទបញ្ចប់ស៊ីហ្គេមជាមួយលទ្ធផលដ៏ត្រចះត្រចង់ កំណើនសេដ្ឋកិច្ចកម្ពុជាមានសម្ទុះរហូតដល់៥.៥%

សេដ្ឋកិច្ចរបស់កម្ពុជាកំពុងស្ថិតនៅលើផ្លូវឆ្ពោះទៅរកការងើបឡើងវិញយ៉ាងរឹងមាំ ដែលគាំទ្រដោយផលិតកម្មនាំចេញ កំណើនសេវាកម្ម និងកសិកម្ម។ នេះបើយោងតាមបច្ចុប្បន្នភាពសេដ្ឋកិច្ចកម្ពុជារបស់ធនាគារពិភពលោក។ ការស្ទុះងើបឡើងវិញដ៏រឹងមាំនៃសេវាកម្ម ជាពិសេសពាណិជ្ជកម្ម ការធ្វើដំណើរ និងបដិសណ្ឋារកិច្ច បានជួយនាំប្រទេសកម្ពុជាត្រលប់ទៅរកស្ថានភាពមុនកូវីដ-១៩ ជាមួយនឹងសម្ទុះកំណើនទេសចរអន្តរជាតិ ខណៈដែលប្រទេសនេះធ្វើជាម្ចាស់ផ្ទះកីឡាអាស៊ីអាគ្នេយ៍ និងអាស៊ានប៉ារ៉ាហ្គេម។

វិស័យកសិកម្មត្រូវបានពង្រីល ដោយសារតែការធ្វើឱ្យប្រសើរឡើងនូវលទ្ធភាពចូលទៅកាន់ទីផ្សារក្នុងតំបន់បន្ទាប់ពីកិច្ចព្រមព្រៀងពាណិជ្ជកម្មដែលបានផ្តល់សច្ចាប័នថ្មី កំណើនសេដ្ឋកិច្ចត្រូវបានព្យាករណ៍ថានឹងកើនឡើងដល់ ៥.៥%នៅឆ្នាំ២០២៣។ ទោះជាយ៉ាងណាក៏ដោយ ការថយចុះជាបន្តបន្ទាប់នៃតម្រូវការខាងក្រៅអាចធ្វើឱ្យផលិតកម្មដែលផ្តោតលើការនាំចេញចុះខ្សោយ ខណៈដែលការបន្តរឹតបន្តឹងហិរញ្ញវត្ថុសកល អាចបង្ហាញពីហានិភ័យនៅក្នុងវិស័យហិរញ្ញវត្ថុដែលមានអានុភាពខ្ពស់របស់កម្ពុជា។

យ៉ាងណាមិញ លោក Ly Sodeth សេដ្ឋវិទូជាន់ខ្ពស់របស់ធនាគារពិភពលោកបាននិយាយថា អតិផរណា របស់ រាជាណាចក្រ បាន វិល មក រក កម្រិត មុន កូវីដ វិញ គឺ ២,២ ភាគរយ ក្នុង ខែ កុម្ភៈ ឆ្នាំ នេះ ដោយសារ តម្លៃ ម្ហូប អាហារ និង ប្រេង បាន ធ្លាក់ ចុះ។

ដោយឡែក លោកស្រី Maryam Salim ប្រធានធនាគារពិភពលោកប្រចាំកម្ពុជា មានប្រសាសន៍ថា “ដើម្បីការពារការងើបឡើងវិញនៃសេដ្ឋកិច្ចរបស់ខ្លួន កម្ពុជាចាំបាច់ត្រូវធ្វើពិពិធកម្មផលិតផលទេសចរណ៍ និងទិសដៅនានា និងធ្វើឲ្យប្រសើរឡើងនូវការប្រកួតប្រជែងពាណិជ្ជកម្មរបស់ខ្លួន ដោយជំរុញការតភ្ជាប់ កាត់បន្ថយរបាំងពាណិជ្ជកម្ម និងសម្រួលនីតិវិធីគយ”។

ក្នុងរយៈពេលមធ្យម កំណើនត្រូវបានគេរំពឹងថានឹងកើនឡើងដល់ ៦ភាគរយ ដែលជំរុញដោយការនាំចេញទំនិញ និងសេវាកម្មដ៏រឹងមាំ និងការកើនឡើងយ៉ាងខ្លាំងនៃការវិនិយោគ ជាពិសេសក្រោមភាពជាដៃគូសាធារណៈ និងឯកជនសម្រាប់គម្រោងហេដ្ឋារចនាសម្ព័ន្ធធំៗ ដូចជាកំពង់ផែសមុទ្រ និងផ្លូវថ្នល់ជាដើម។ កម្ពុជាអាចជំរុញដល់កំណើននេះ តាមរយៈការវិនិយោគលើហេដ្ឋារចនាសម្ព័ន្ធតភ្ជាប់ និងការអភិវឌ្ឍន៍មនុស្ស ការការពារស្ថិរភាពហិរញ្ញវត្ថុ និងការលើកកម្ពស់ការធ្វើពិពិធកម្មនៃការនាំចេញ ដើម្បីបង្កើនភាពធន់ និងការប្រកួតប្រជែងរបស់សេដ្ឋកិច្ច។

ជាមួយគ្នានេះ កម្ពុជាអាចបង្កើនការចំណាយក្នុងវិស័យសង្គមក្នុងរយៈពេលប៉ុន្មានឆ្នាំចុងក្រោយនេះ ជាពិសេសលើវិស័យសុខាភិបាល និងការអប់រំ ស្របពេលដែលកត់សម្គាល់ថាគុណភាពនៃការចំណាយនោះអាចត្រូវបានកែលម្អ។ បច្ចុប្បន្នភាពសេដ្ឋកិច្ចកម្ពុជាផ្តោតលើការអភិវឌ្ឍន៍ម៉ាក្រូសេដ្ឋកិច្ចរយៈពេលខ្លី និងមធ្យម ហើយត្រូវបានបោះពុម្ពពីរដងក្នុងមួយឆ្នាំផងដែរ៕

ប្រភព: Investing.com, Devdiscourse