ប្រធានាធិបតីឥណ្ឌូនេស៊ីបានបញ្ជាក់ថា ឥណ្ឌូនេស៊ី មិនធ្លាប់សន្យាបរិច្ចាគ ១ ពាន់លានដុល្លារដល់ក្រុមប្រឹក្សាសន្តិភាពដឹកនាំដោយ លោក Donald Trumpទេ!
ប្រធានាធិបតីនៃឥណ្ឌូនេស៊ី លោក Prabowo Subianto បានបញ្ជាក់ថា ប្រទេសឥណ្ឌូនេស៊ី មិនដែលសន្យាផ្តល់ជំនួយហិរញ្ញវត្ថុចំនួន ១ ពាន់លានដុល្លារអាមេរិកទៅកាន់ក្រុមប្រឹក្សាសន្តិភាពដឹកនាំដោយ Donald Trump នោះទេ ខណៈដែលលោកបានសង្កត់ធ្ងន់ថា តួនាទីរបស់ឥណ្ឌូនេស៊ីមានកំណត់ត្រឹមការគាំទ្រការថែរក្សាសន្តិភាពប៉ុណ្ណោះ។
ក្នុងសេចក្តីថ្លែងការណ៍មួយដែលត្រូវបានផ្សព្វផ្សាយតាមបណ្តាញ YouTube ផ្លូវការ លោក Prabowo បានបញ្ជាក់ថា មានការលើកឡើងអំពីប្រភេទសមាជិកភាពផ្សេងៗ ដែលអាចទាមទារឱ្យបរិច្ចាគប្រាក់ចំនួន ១ ពាន់លានដុល្លារអាមេរិក ប៉ុន្តែលោកមិនធ្លាប់បញ្ជាក់ពីឆន្ទៈក្នុងការបង់ប្រាក់ចំនួននេះឡើយ។
លោកបានមានប្រសាសន៍ថា ឥណ្ឌូនេស៊ីមិនមាននៅក្នុងបញ្ជីអ្នករួមចំណែកហិរញ្ញវត្ថុទេ ព្រោះមិនបានបរិច្ចាគប្រាក់ណាមួយ ប៉ុន្តែប្រទេសនេះត្រៀមខ្លួនរួចជាស្រេចក្នុងការផ្តល់កងទ័ពរក្សាសន្តិភាពតាមតម្រូវការ។
ការបញ្ជាក់នេះមានគោលបំណងបំបាត់ការព្រួយបារម្ភសាធារណៈអំពីបន្ទុកថវិការដ្ឋ បន្ទាប់ពីមានការលើកឡើងពីមន្ត្រីរដ្ឋាភិបាលមួយចំនួនថា ការចូលរួមវិភាគទានអាចយកចេញពីថវិកាក្រសួងការពារជាតិ។
ជាមួយគ្នានេះ Sugiono រដ្ឋមន្ត្រីការបរទេសឥណ្ឌូនេស៊ី ក៏បានបញ្ជាក់ថា សមាជិកក្រុមប្រឹក្សាសន្តិភាពមិនមានកាតព្វកិច្ចចូលរួមវិភាគទានជាចំនួនកំណត់នោះទេ ទោះបីជាប្រទេសមួយចំនួនបានសន្យាផ្តល់ជំនួយហិរញ្ញវត្ថុក៏ដោយ។
តាមការរាយការណ៍ កិច្ចប្រជុំដែលពាក់ព័ន្ធនឹងផែនការសន្តិភាពនៅតំបន់ ហ្គាហ្សា បាននាំឱ្យមានការសន្យាផ្តល់ជំនួយសរុបប្រមាណ ១៧ ពាន់លានដុល្លារអាមេរិក សម្រាប់ការកសាងឡើងវិញ និងស្ថិរភាពសន្តិសុខ ខណៈដែលសហរដ្ឋអាមេរិក និងបណ្តាប្រទេសមជ្ឈិមបូព៌ាមួយចំនួនបានចូលរួមវិភាគទានយ៉ាងសំខាន់។
ទោះយ៉ាងណា លោក Prabowo បានបញ្ជាក់ថា ការចូលរួមរបស់ឥណ្ឌូនេស៊ីក្នុងបេសកកម្មរក្សាសន្តិភាព នឹងអាស្រ័យលើការយល់ព្រមពីភាគីពាក់ព័ន្ធទាំងអស់ រួមទាំងភាគីប៉ាឡេស្ទីន និងក្រុម Hamas ផងដែរ។
លោកក៏បានបន្ថែមថា ប្រសិនបើគោលដៅសន្តិភាពមិនអាចសម្រេចបាន ឥណ្ឌូនេស៊ីអាចពិចារណាចាកចេញពីក្រុមប្រឹក្សាសន្តិភាពដោយឯករាជ្យ ដោយមិនចាំបាច់ពិគ្រោះជាមួយប្រទេសសមាជិកផ្សេងទៀត។
គួរបញ្ជាក់ថា ក្រុមប្រឹក្សាសន្តិភាពនេះ ត្រូវបានបង្កើតឡើងក្នុងគោលបំណងគាំទ្រការកសាងឡើងវិញក្រោយជម្លោះនៅតំបន់ហ្គាហ្សា ហើយត្រូវបានគេរាយការណ៍ថានឹងដឹកនាំដោយលោក Donald Trump ក្នុងនាមជាតំណាងសហរដ្ឋអាមេរិក។
ប្រភព៖ CNA
