ប្រទេសចិន បង្កើនឥទ្ធិពលលើឆាកអន្តរជាតិ ដោយអំពាវនាវឲ្យអាមេរិក-អ៊ីស្រាអែលបញ្ចប់សង្គ្រាមនៅអ៊ីរ៉ង់ និងអះអាងចូលរួមដោះស្រាយវិបត្តិថាមពលនៅអាស៊ីអាគ្នេយ៍!

ប្រទេសចិនបានអំពាវនាវឲ្យអាមេរិក-អ៊ីស្រាអែលបញ្ចប់សង្គ្រាមនៅអ៊ីរ៉ង់ក្នុងតំបន់ឈូងសមុទ្រ និងបានបញ្ជាក់ថា សុវត្ថិភាពនៃផ្លូវដឹកជញ្ជូនតាមសមុទ្រគួរត្រូវបានរក្សាឱ្យមានស្ថិរភាព មិនគួរត្រូវបានរំខានទេ។ ជាមួយគ្នានេះ ចិនក៏បានបង្ហាញពីការត្រៀមខ្លួនក្នុងការពង្រឹងកិច្ចសហប្រតិបត្តិការជាមួយបណ្តាប្រទេសអាស៊ីអាគ្នេយ៍ ដើម្បីដោះស្រាយបញ្ហាខ្វះខាតថាមពល ខណៈទីផ្សារប្រេងពិភពលោកកំពុងរងផលប៉ះពាល់ពីវិបត្តិផ្គត់ផ្គង់ថាមពល។

តាមការវិភាគ ស្ថានភាពតានតឹងនៅមជ្ឈិមបូព៌ា បានបង្កឱ្យមានភាពមិនប្រាកដប្រជានៅក្នុងទីផ្សារថាមពលសកល ខណៈដែលប្រទេសចិនកំពុងពឹងផ្អែកលើធនធានថាមពលដើម្បីគាំទ្រវិស័យផលិតកម្ម និងសេដ្ឋកិច្ចរបស់ខ្លួន។ ទោះជាយ៉ាងណា វិបត្តិនេះក៏ត្រូវបានមើលឃើញថា អាចបង្កើតឱកាសសម្រាប់ចិនក្នុងការពង្រឹងតួនាទី និងឥទ្ធិពលនៅលើឆាកអន្តរជាតិផងដែរ។

ការផ្តល់ជំនួយសម្រាប់ប្រជាជនប្រមាណ ៧០០ លាននាក់នៅអាស៊ីអាគ្នេយ៍ ត្រូវបានចាត់ទុកថាជាជំនួយដ៏សំខាន់សម្រាប់បណ្តាប្រទេសនាំចូលប្រេងនៅក្នុងតំបន់។ វាកើតឡើងបន្ទាប់ពីរដ្ឋាភិបាលចិនបានចេញវិធានការកំណត់ការនាំចេញប្រេងម៉ាស៊ូត សាំង និងប្រេងយន្តហោះ បន្ថែមពីនេះក៏មានការនាំចេញជី ដើម្បីធានាស្ថិរភាពទីផ្សារថាមពលក្នុងស្រុក។

អ្នកនាំពាក្យក្រសួងការបរទេសចិនបានបញ្ជាក់ថា ស្ថានភាពនៅមជ្ឈិមបូព៌ាបានរំខានដល់សន្តិសុខថាមពលសកល ហើយបានអំពាវនាវឱ្យភាគីពាក់ព័ន្ធបញ្ឈប់ប្រតិបត្តិការយោធាជាបន្ទាន់ ដើម្បីទប់ស្កាត់ការកើនឡើងនៃអស្ថិរភាពដែលអាចប៉ះពាល់ដល់សេដ្ឋកិច្ចពិភពលោក។ ការការពារសុវត្ថិភាពផ្លូវទឹក ត្រូវបានលើកឡើងថាជាកត្តាសំខាន់មួយក្នុងការរក្សាស្ថិរភាពពាណិជ្ជកម្ម និងការដឹកជញ្ជូនអន្តរជាតិ។

អ្នកវិភាគមួយចំនួនបានលើកឡើងថា វិបត្តិនេះអាចបង្កើតឱកាសថ្មីសម្រាប់ចិនក្នុងការពង្រីកទំនាក់ទំនងជាមួយប្រទេសផ្សេងៗ ជាពិសេសនៅតំបន់ដែលខ្លួនមិនទាន់មានឥទ្ធិពលខ្លាំង។ ជាមួយគ្នានេះ ការរំខានដល់ផ្លូវផ្គត់ផ្គង់ថាមពលតាមសមុទ្រ ក៏បានជំរុញឱ្យមានការយកចិត្តទុកដាក់កាន់តែច្រើនលើថាមពលកកើតឡើងវិញ និងវិស័យថាមពលបៃតង ដែលចិនកំពុងមានតួនាទីដឹកនាំនៅលើពិភពលោក។

ប្រភព៖ Reuters