ភាពតានតឹងរវាងប៉ាគីស្ថាន និងអាហ្វហ្គានីស្ថានឈានដល់កម្រិត «សង្គ្រាមចំហ» បន្ទាប់ពីការវាយប្រហារតាមអាកាសឆ្លងដែន

ភាពតានតឹងផ្នែកសន្តិសុខនៅតាមបណ្តោយព្រំដែនរវាងប្រទេសប៉ាគីស្ថាន និងប្រទេសអាហ្វហ្គានីស្ថាន បានផ្ទុះឡើងយ៉ាងខ្លាំងក្លានៅថ្ងៃសុក្រនេះ បន្ទាប់ពីយន្តហោះចម្បាំងរបស់ប៉ាគីស្ថានបានបើកប្រតិបត្តិការវាយប្រហារតាមអាកាសជាទ្រង់ទ្រាយធំ ទៅលើគោលដៅយោធា និងមូលដ្ឋានសកម្មប្រយុទ្ធនៅតាមបណ្តាទីក្រុងសំខាន់ៗនៃប្រទេសអាហ្វហ្គានីស្ថាន រួមមានរដ្ឋធានីកាប៊ុល និងទីក្រុងកានដាហារ។ មន្ត្រីជាន់ខ្ពស់នៃក្រសួងការពារជាតិប៉ាគីស្ថាន បានប្រកាសជាផ្លូវការថា សកម្មភាពយោធានេះគឺជាការឆ្លើយតបទៅនឹងការវាយប្រហាររបស់កងកម្លាំងអាហ្វហ្គានីស្ថានមកលើប៉ុស្តិ៍ត្រួតពិនិត្យព្រំដែនរបស់ប៉ាគីស្ថានកាលពីយប់ថ្ងៃព្រហស្បតិ៍ ដែលបានបង្កឱ្យមានការខាតបង់ជីវិតកងកម្លាំងសន្តិសុខជាច្រើននាក់ ហើយបច្ចុប្បន្នស្ថានការណ៍ទាំងមូលបានឈានចូលដល់កម្រិត «សង្គ្រាមចំហ» រវាងប្រទេសជិតខាងទាំងពីរ។

រដ្ឋាភិបាលប៉ាគីស្ថានបានអះអាងថា ខ្លួនមានភស្តុតាងរឹងមាំបង្ហាញថា ក្រុមសកម្មប្រយុទ្ធបានយកទឹកដីអាហ្វហ្គានីស្ថានជាមូលដ្ឋានសម្រាប់រៀបចំផែនការ និងបើកការវាយប្រហារភេរវកម្មជាបន្តបន្ទាប់ចូលមកក្នុងប្រទេសប៉ាគីស្ថាន ដែលជាកត្តាជំរុញឱ្យទីក្រុងអ៊ីស្លាម៉ាបាតសម្រេចចិត្តអនុវត្តវិធានការយោធាដ៏តឹងរ៉ឹងនេះ។ បើតាមការឱ្យដឹងពីប្រភពសន្តិសុខប៉ាគីស្ថាន ប្រតិបត្តិការវាយប្រហារតាមអាកាសនេះ បានកម្ទេចជម្រក ស្នាក់ការកណ្តាល និងឃ្លាំងរំសេវរបស់ក្រុមសកម្មប្រយុទ្ធជាច្រើនកន្លែង ដោយបណ្តាលឱ្យខ្មាន់កាំភ្លើងសកម្មប្រយុទ្ធប្រមាណជាង ១៣០ នាក់ត្រូវបានសម្លាប់។ ទោះបីជាយ៉ាងណាក៏ដោយ អង្គការសហប្រជាជាតិ និងមន្ត្រីរដ្ឋាភិបាលតាលីបង់ បានរាយការណ៍ថា ការវាយប្រហារនេះក៏បានបង្កឱ្យមានការបាត់បង់ជីវិតជនស៊ីវិលយ៉ាងហោចណាស់ ១៣ នាក់ និងបណ្តាលឱ្យស្ត្រីព្រមទាំងកុមារជាច្រើននាក់ផ្សេងទៀតរងរបួសផងដែរ។

ជាការឆ្លើយតបចំពោះសកម្មភាពខាងលើ នាយករដ្ឋមន្ត្រីប៉ាគីស្ថាន លោក Shehbaz Sharif បានព្រមានយ៉ាងមុតស្រួចថា កងកម្លាំងប្រដាប់អាវុធប៉ាគីស្ថានមានសមត្ថភាពពេញលេញក្នុងការការពារអធិបតេយ្យភាពជាតិ និងកម្ទេចរាល់មហិច្ឆតាឈ្លានពានទាំងអស់។ ចំណែកឯរដ្ឋាភិបាលតាលីបង់អាហ្វហ្គានីស្ថានវិញ បានចេញសេចក្តីថ្លែងការណ៍ថ្កោលទោសយ៉ាងដាច់អហង្ការចំពោះការវាយប្រហារនេះ ដោយចាត់ទុកថាជាការរំលោភបំពានអធិបតេយ្យភាពជាតិយ៉ាងធ្ងន់ធ្ងរ ហើយបានព្រមានថានឹងមានការឆ្លើយតបយ៉ាងសមស្របទៅតាមពេលវេលាជាក់ស្តែង។ ក្នុងពេលជាមួយគ្នានេះ សហគមន៍អន្តរជាតិ រួមទាំងប្រទេសអ៊ីរ៉ង់ បានបង្ហាញការព្រួយបារម្ភយ៉ាងខ្លាំងចំពោះជម្លោះទ្រង់ទ្រាយធំនេះ ហើយបានអំពាវនាវដល់ភាគីទាំងពីរឱ្យប្រើប្រាស់យន្តការការទូត ដើម្បីជៀសវាងការធ្លាក់ចូលទៅក្នុងវិបត្តិសង្គ្រាមតំបន់ដែលមិនអាចគ្រប់គ្រងបាន។

ប្រភព៖ Reuters