អត្តពលិកជាតិ និងអន្តរជាតិជាង ១ ម៉ឺននាក់ ចូលរួមព្រឹត្តិការណ៍រត់ប្រណាំងអបអរសាទរ «ទេសចរណ៍វប្បធម៌ និងពាណិជ្ជកម្ម» នៅខេត្តព្រះសីហនុ

ក្រោមស្មារតី «រត់ដើម្បីក្តីស្រឡាញ់! រត់ដើម្បីទេសចរណ៍! រត់ដើម្បីសប្បុរសធម៌!» ព្រឹត្តិការណ៍រត់ប្រណាំងដ៏ធំអស្ចារ្យដើម្បីអបអរសាទរ «ព្រឹត្តិការណ៍ទេសចរណ៍វប្បធម៌ និងពាណិជ្ជកម្ម» ត្រូវបានរៀបចំឡើងយ៉ាងកុះករ ដោយមានការចូលរួមពីអត្តពលិកជាតិ និងអន្តរជាតិជាង ១២,០០០នាក់ ដែលជាចំនួនដ៏ច្រើនលើសពីការរំពឹងទុក។

ព្រឹត្តិការណ៍ដ៏មានអត្ថន័យនេះ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ រួមជាមួយ ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ។ ក្រោមប្រធានបទ «កីឡាដើម្បីសុខភាព និងឯកភាពជាតិតែមួយ» ព្រឹត្តិការណ៍នេះមិនត្រឹមតែជាការប្រកួតកីឡាប៉ុណ្ណោះទេ ប៉ុន្តែគឺជាវេទិកាដ៏សំខាន់ក្នុងការលើកកម្ពស់សុខុមាលភាព បណ្តុះទម្លាប់ហាត់ប្រាណ និងកាត់បន្ថយភាពតានតឹងជូនដល់សាធារណជន។

ឯកឧត្តមរដ្ឋមន្ត្រីបានគូសបញ្ជាក់ថា ការជួបជុំដ៏មហិមានេះបានបង្ហាញយ៉ាងច្បាស់ពីកម្លាំងឯកភាពជាតិ និងស្មារតីចេះជួយគ្នាទៅវិញទៅមកក្នុងនាមជាមហាគ្រួសារខ្មែរតែមួយ។ ទន្ទឹមនឹងនេះ ព្រឹត្តិការណ៍នេះដើរតួជាកម្លាំងចលករយ៉ាងសំខាន់ក្នុងការជំរុញវិស័យទេសចរណ៍ និងសេដ្ឋកិច្ចមូលដ្ឋាន តាមរយៈការទាក់ទាញភ្ញៀវទេសចរឱ្យមកកម្សាន្តនៅខេត្តព្រះសីហនុ កាន់តែច្រើនឡើង។

ក្រៅពីសកម្មភាពកីឡា ព្រឹត្តិការណ៍នេះក៏មានគោលបំណងអបអរសាទរនូវវប្បធម៌ដ៏សម្បូរបែប និងគាំទ្រដល់វិស័យពាណិជ្ជកម្មក្នុងតំបន់ផងដែរ។ វត្តមានរបស់អត្តពលិក និងភ្ញៀវទេសចររាប់ម៉ឺននាក់ បានជួយផ្សព្វផ្សាយពីភាពរីកចម្រើននៃទីក្រុងមាត់សមុទ្ររបស់កម្ពុជា ទៅកាន់ពិភពលោក បង្ហាញពីសក្តានុពលនៃទីក្រុងដែលរួមបញ្ចូលគ្នារវាងការរស់នៅទំនើប ទេសចរណ៍ធម្មជាតិ និងព្រឹត្តិការណ៍កីឡាលំដាប់អន្តរជាតិ។

គួរបញ្ជាក់ផងដែរថា ជោគជ័យនៃព្រឹត្តិការណ៍រត់ប្រណាំងនាពេលនេះ គឺជាសក្ខីភាពមួយបង្ហាញពីការងើបឡើងវិញយ៉ាងខ្លាំងក្លានៃវិស័យទេសចរណ៍ក្នុងខេត្តព្រះសីហនុ និងជាការត្រៀមលក្ខណៈសម្រាប់ទទួលស្វាគមន៍ព្រឹត្តិការណ៍អន្តរជាតិធំៗជាច្រើនទៀតនាពេលអនាគត៕

ប្រភព៖ ក្រសួងទេសចរណ៍