ទស្សនៈអ្នកនិពន្ធ៖ គោលគំនិតនៅពីក្រោយស្នាដៃនៃការនិពន្ធ
អត្ថបទដោយ ៖ ង៉ុយ សារិកា
បច្ចុប្បន្នយើងសង្កេតឃើញថាកំណើនអ្នកអានសៀវភៅនៅប្រទេសកម្ពុជាបានធ្វើឲ្យវិស័យតែងនិពន្ធកាន់តែរីកដុះដាលពីមួយឆ្នាំទៅមួយឆ្នាំ។ វិស័យតែងនិពន្ធក៏ដូចជាវិស័យអំណានគឺ ជាផ្នែកមួយដ៏សំខាន់ក្នុងការជំរុញឱ្យមានការកកើតធនធានមនុស្សដើម្បីចូលរួមក្នុងការអភិវឌ្ឍប្រទេសជាតិឱ្យកាន់តែមានការរីកចម្រើនទៅមុខជាលំដាប់។
ដោយមើលឃើញយ៉ាងដូច្នេះ BRANDMEDIA នឹងនាំប្រិយមិត្តនិយមការអានទាំងអស់គ្នាទៅជួប និងស្គាល់ជាមួយនឹងអ្នកនិពន្ធចំនួនពីររូបដែលជាអ្នកនិពន្ធស្ថិតនៅក្នុងបេះដូងអ្នកគាំទ្រផងដែរ នោះគឺអ្នកនិពន្ធ ឈឿន សុជាតិ និង អ្នកនិពន្ធរតនា។ អ្នកនិពន្ធទាំងពីររូប គឺសុទ្ធសឹងតែជាអ្នកមានសមត្ថភាពស្រឡាញ់លើការតែងនិពន្ធ និងការចែករំលែក។ សៀវភៅដែលផ្ដល់តម្លៃ និងប្រយោជន៍ទៅដល់អ្នកអាន វាគឺជាហេតុផលដ៏សំខាន់ដែលជំរុញឱ្យមានសន្ទុះអ្នកគាំទ្រស្នាដៃរបស់គាត់ជាច្រើន។
តើមានគោលគំនិតអ្វីខ្លះដែលស្ថិតនៅពីក្រោយស្នាដៃនៃការនិពន្ធរបស់អ្នកនិពន្ធទាំងពីររូប?
អ្នកនិពន្ធ ឈឿន សុជាតិ បង្ហាញពីគោលគំនិតនៅពីក្រោយស្នាដៃនិពន្ធរបស់ខ្លួនយ៉ាងដូច្នេះថា៖
«ខ្ញុំស្រឡាញ់ចូលចិត្តការអានតាំងពីនៅក្មេងមកម៉្លេះ ប៉ុន្តែខ្ញុំទើបចាប់ផ្ដើមរៀនសរសេរនៅក្នុងឆ្នាំ២០១៨នេះទេ។» លោកបានបន្ថែមទៀតថា៖ «ខ្ញុំបានកំពុងតែរៀបចំបោះពុម្ភសៀវភៅថាមពលជីវិត (ភាគពីរ) ចេញជាលើកទីមួយ។ កន្លងមកស្នាដៃរបស់ខ្ញុំគឺ សៀវភៅថាមពលជីវិត (ភាគមួយ) និង និទានទស្សនៈ គឺបានចេញផ្សាយរួចមកហើយ ក្រោមការជួយជ្រោមជ្រែងរបស់គ្រឹះស្ថាន Heart Book Cambodia។»
អ្នកនិពន្ធវ័យក្មេងខាងលើបន្តមានប្រសាសន៍ថា៖ «ចំពោះសៀវភៅថាមពលជីវិតភាគពីរ គឺផ្តោតសំខាន់ទៅលើជីវិត ការផ្ដល់គុណតម្លៃជូនជីវិត និងសកម្មភាពមួយដែលអាចជះឥទ្ធិពលវិជ្ជមានដល់ខ្លួនឯងផង និងសង្គមផង។ ក្រៅពីសៀវភៅ ថាមពលជីវិត (ភាគពីរ) នោះគឺមានសៀវភៅ ថាមពលជីវិត (ភាគមួយ) គឺជាអ្នកដែលធ្វើឱ្យមិត្តអ្នកអានស្គាល់ និងស្រឡាញ់ចូលចិត្តខ្ញុំ។»
សម្រាកបានបន្តិច លោក ឈឿន សុជាតិ សង្កត់បន្ថែមទាក់ទងនឹងចំណុចដែលសំខាន់ស្ថិតនៅពីក្រោយការនិពន្ធ៖ «ខ្ញុំបានផ្ដោតទៅលើទស្សន:លើកទឹកចិត្ត និងអភិវឌ្ឍខ្លួន មនុស្សយើងត្រូវរៀនសូត្រពីជីវិតឱ្យយល់ ព្រោះបើមនុស្សមិនអាចយល់ពីជីវិតក៏មិនអាចដោះស្រាយបញ្ហាជីវិតបានឡើយ។ ជាពិសេសអ្នកនិពន្ធចង់ឱ្យមនុស្សត្រូវចេះផ្ដល់គុណតម្លៃជូនជីវិតពោលគឺផ្ដោតសំខាន់ទៅលើការរស់នៅប្រកបដោយគុណធម៌។ ខ្ញុំបានលើកយកគោលការណ៍ធម៌មួយចំនួន សម្រាប់ឱ្យមិត្តអ្នកអានយកទៅអនុវត្ត។»
តាមគំនិតរបស់លោកផ្ទាល់៖ «ដើម្បីនិពន្ធសៀវភៅមួយឱ្យបានល្អលុះតា្រតែសៀវភៅនោះត្រូវកើតចេញអំពីឆន្ទៈក្ដីស្រឡាញ់និងការប្រឹងប្រែងរបស់អ្នកនិពន្ធផ្ទាល់។ ពេលខ្លះវាអាចកើតចេញអំពីការរៀបរៀងការប្រែសម្រួល ឬយកចំណេះដឹង និងបទពិសោធដែលអ្នកនិពន្ធធ្លាប់ឆ្លងកាត់ផ្ទាល់មកធ្វើជាគោល។» ជាចុងក្រោយអ្នកនិពន្ធរូបនេះបានបន្ថែមនូវចំណុចសំខាន់មួយទៀតយ៉ាងដូច្នេះថា៖ «ក្នុងនាមជាអ្នកនិពន្ធដាច់ខាតត្រូវចៀសវាងឱ្យផុតពីការលួចចម្លងស្នាដៃរបស់អ្នកដទៃ៕»
បើយើងក្រឡេកមកមើលស្នាដៃរបស់អ្នកនិពន្ធរតនាឯណេះវិញ។ ដូចយើងបានដឹងហើយថាស្នាដៃទាំង៥ចំណងជើងរបស់អ្នកនិពន្ធរូបនេះ គឺពិតជាអាចទាញយកបេះដូងរបស់អ្នកគាំទ្រជាច្រើនផងដែរ។ ជាដំបូងអ្នកនិពន្ធរតនាមានប្រសាសន៍ថា៖ «បងចាប់ផ្តើមប្រឡូកវិស័យនិពន្ធដំបូងឡើយគ្រាន់តែសាកល្បងបង្ហោះអត្ថបទលើកទឹកចិត្ត និងដឹកនាំមនុស្សឱ្យគិតលើផ្លូវវិជ្ជមានរហូតបោះពុម្ពស្នាដៃទី០១ជាប្រភេទប្រលោមលោកចំណងជើងវិថីជីវិត។ គ្រាដំបូងបងគ្រាន់តែចង់ឃើញប្រលោមលោកវិថីជីវិតចេញជាសៀវភៅ ប៉ុន្តែក្រោយទទួលបានការគាំទ្រពីអ្នកអានក៏មានកម្លាំងចិត្តដើរលើផ្លូវនេះបន្តរហូតចេញបានស្នាដៃជាបន្តបន្ទាប់សរុប៥ស្នាដៃ។»
អ្នកនិពន្ធរតនាបានបញ្ជាក់បន្តថា៖ «រាល់ស្នាដៃនីមួយៗដែលបងបានសរសេរ គឺសុទ្ធសឹងតែមានលាក់បង្កប់នូវអនុស្សាវរីយ៍រៀងៗខ្លួន ហើយបងបានផ្តល់ក្តីស្រឡាញ់ទៅលើស្នាដៃទាំងនេះស្មើៗគ្នា។ តួយ៉ាងដូចជាសៀវភៅវិថីជីវិត បងមានបំណងដាស់តឿនកុំឱ្យមនុស្សស្រីងប់ងល់ និងសេចក្តីស្នេហា តែត្រូវពុះពារហ៊ានទៅរកក្តីស្រមៃមិនថានាងចង់ធ្វើជាអ្នកណា តែយ៉ាងណាក៏បងបានដាស់តឿនមិនឱ្យមនុស្សគួរមានមហិច្ឆិតាច្រើនហួសដែរ។ ឯសំណោកអនុស្សាវរីយ៍ មកពីបងឃើញថាក្មេងៗសម័យថ្មីឆាប់មានស្នេហា ទើបបងសរសេរសារដាស់តឿន ឱ្យធ្វើការសម្រេចចិត្ត ឱ្យបានម៉ត់ចត់ ព្រោះស្នេហាដំបូងអាចជាការចងចាំមិនអាចបំភ្លេចបានតែស្នេហាក្មេងខ្ចីផុយស្រួយណាស់ អាចបន្សល់សំណោកអនុស្សាវរីយ៍ឱ្យគេយូរយារ។»
ដោយឡែករាល់ស្នាដៃនីមួយៗរបស់អ្នកនិពន្ធរតនាអាចបន្សល់អារម្មណ៍មោទកៈពេលដែលគាត់បានទទួលសារពីអ្នកអានថា៖ «គាត់បានរកឃើញកម្លាំងចិត្ត ភាពរឹងមាំ ឬការតាំងចិត្តថ្មី ឬដំណោះស្រាយផ្សេងៗដោយការអានសៀវភៅមួយណារបស់គាត់បាន។» សម្រាប់សារចុងក្រោយដែលចេញពីដួងចិត្តរបស់អ្នកនិពន្ធវ័យក្មេងរូបនេះគឺ៖ «មានតែពាក្យថាអរគុណណាស់សម្រាប់ប្រិយមិត្តអ្នកគាំទ្រ និងអ្នកដែលស្រឡាញ់ចូលចិត្តការអាន។ បើអត់មានអ្នកអានក៏អត់មានអ្នកសរសេរ ហើយពួកគាត់នៅតែបន្តស្វែងរកប្រយោជន៍ផ្សេងៗមកដាក់បញ្ចូលក្នុងស្នាដៃជាបន្តបន្ទាប់សម្រាប់អ្នកគាំទ្រគ្រប់គ្នា។»
សរុបជារួមមក យើងសូមធ្វើការលើកទឹកចិត្តឱ្យកូនខ្មែរទាំងអស់ចូលរួមអានសៀវភៅឱ្យបានច្រើនទៅតាមអ្វីដែលអាចធ្វើទៅបាន។ ក្នុងនាមយើងជាអ្នកអាន បើមិនបានអានសៀវភៅល្អ គឺជាកំហុសដ៏ធំមួយ។ ក្នុងនាមជាអ្នកនិពន្ធ បើមិនអាចរៀបរៀងឬនិពន្ធសៀវភៅឱ្យមានគុណភាព គឺជាកំហុសដ៏ធំមួយដូចគ្នា។ ក្ដីបំណងរបស់អ្នកនិពន្ធដែលបង្កប់នៅក្នុងស្នាដៃនីមួយៗ គឺរពឹងឱ្យស្នាដៃខ្លួនឯងបានជាប្រយោជន៍ដល់អ្នកអាន។ ម៉្លោះហើយសូមមិត្តអ្នកអានទាំងឡាយប្រឹងប្រែងឱ្យតម្លៃទៅលើការអាន ចំពោះអ្នកនិពន្ធគ្រប់រូបក៏នឹងប្រឹងអាន ប្រឹងផលិតស្នាដៃប្រកបដោយគុណភាពជូនបងប្អូនទាំងអស់គ្នាដូចគ្នា៕
