សួនមុនីហទ័យ ក្នុងព្រឹត្តិការណ៍អង្គរសង្ក្រាន្តឆ្នាំ២០២៥ នឹងប្រមូលផ្ដុំទៅដោយទស្សនីយភាពសិល្បៈដ៏អស្ចារ្យ ជាពិសេសការប្រគំតន្រ្តីសម័យទសវត្សរ៍ឆ្នាំ១៩៦០

កាលពីព្រឹកថ្ងៃចន្ទ ៤រោច ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៧ ខែមីនា ឆ្នាំ២០២៥ ឯកឧត្ដម ហ៊ឺ វីរៈ សមាជិកគណៈកម្មការរៀបចំព្រឹត្តិការណ៍អង្គរសង្ក្រាន្តឆ្នាំ២០២៥ និងជាប្រធានក្រុមការងាររៀបចំកម្មវិធីសួនមុនីហទ័យ បានអញ្ជេីញជាអធិបតីភាពពិធីប្រុងពលីសុំសេចក្តីសុខសេចក្តីចម្រើន ដើម្បីចូលសាងសង់ទីតាំងសួនមុនីហទ័យ ត្រៀមសម្រាប់ព្រឹត្តិការណ៍អង្គរសង្ក្រាន្ត ព.ស.២៥៦៨-២៥៦៩ គ.ស.២០២៥ នៅសួនច្បារហ្រ្គង់ ក្រុងសៀមរាប ខេត្តសៀមរាប។ ពិធីប្រុងពលីនេះ ក៏មានការអញ្ជើញចូលរួមពី ឯកឧត្ដម ទិត ថាវរិទ្ធ រដ្ឋលេខាធិការក្រសួងវប្បធម៌និងវិចិត្រសិល្បៈ និងលោក លោកស្រី ក្រុមការងាររៀបចំកម្មវិធីសួនមុនីហទ័យជាច្រើនរូប។

កម្មវិធីសួនមុនីហទ័យ គឺជាកម្មវិធីមួយដែលបង្កើតឡើងក្នុងអត្ថន័យប្រមូលផ្តុំនូវសារៈសំខាន់ និងភាពដ៏អស្ចារ្យនៃសិល្បៈ ទំនៀមទម្លាប់ និងឥរិយាបទដ៏ប្រពៃរបស់ប្រជាជនខ្មែរ ក្នុងគោលបំណងបង្កើតបរិយាកាស ជូនដល់អ្នកចូលរួមឱ្យបានយល់ច្បាស់អំពីភាពថ្កើងថ្កាននៃសិល្បៈ វប្បធម៌ ទំនៀមទម្លាប់ ភាពទន់ភ្លន់ និងស្នាមញញឹមដ៏ថ្លៃថ្នូរប្រកបដោយភាពជឿជាក់ ដែលពោរពេញដោយក្តីស្រឡាញ់ដ៏សែនជ្រាលជ្រៅ និងភក្តីភាពរបស់ប្រជាជនខ្មែរដែលមិនអាចបំភ្លេចបាន។

ក្នុងនោះដែរ សួនមុនីហទ័យ បានរៀបចំកម្មវិធីកំសាន្ត សិល្បៈ និងអប់រំជាច្រើន ដោយឈរលើគោលគំនិតសំខាន់ៗចំនួន ៣ រួមមាន ម្ហូបអាហារ សម្លៀកបំពាក់ និងសិល្បៈ ស្ថិតក្នុងសម័យកាលទស្សវត្សរ៍ទី ៦០ ដែលអាចចាត់ទុកបានថាជាយុគមួយរបស់កម្ពុជា នៃការចាប់ផ្តើមសម័យទំនើបគួរជាទីមោទនៈ។ ប៉ុន្តែជាអកុសលក្រោយឆ្លងកាត់សង្គ្រាមស៊ីវិលរ៉ាំរ៉ៃជាច្រើនឆ្នាំ កម្ពុជាដ៏អភ័ព្វបានធ្លាក់ក្នុងរបបដ៏ខ្មៅងងឹត ហើយអ្វីៗ ក៏ត្រូវបាត់បង់។ ក្រោយពីរបបខ្មែរក្រហមបានដួលរលំទៅ រដ្ឋាភិបាលកម្ពុជាដែលកាលនោះមានសម្តេចទាំងបីរួមមាន៖ សម្តេចអគ្គ មហាពញាចក្រី ហេង សំរិន សម្តេចអគ្គមហាធម្មពោធិសាល ជា ស៊ីម
ជាពិសេសសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា បាននាំមកសន្តិភាព និងការស្តារអភិវឌ្ឍជាតិមាតុភូមិឡើងវិញធ្វើឱ្យយើងមានអ្វីៗដូចសព្វថ្ងៃ។

ព្រលឹងនៃសន្តិភាព បានស្ថិតក្នុងក្រអៅបេះដូងយើងឱ្យចេះទទួលស្គាល់ពីអតីតកាល ហើយញញឹមសាទរបន្តធ្វើឱ្យកម្ពុជា អស្ចារ្យ បន្ថែមទៀត។ ដូចនេះ ការជ្រើសយកទសវត្សរ៍ឆ្នាំ១៩៦០ ជាការឆ្លុះបញ្ចាំងពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាបច្ចុប្បន្ន កំពុងបន្តកសាងប្រទេសជាតិឡើងវិញ និងបន្តឆ្ពោះទៅកាន់អនាគតកាន់តែអស្ចារ្យ។

សូមបញ្ជាក់ជូនផងដែរថា សួនមុនីហទ័យ មានការរៀបចំដាក់តាំង និងលក់ម្ហូបអាហារ នំ បង្អែមខ្មែរមានរសជាតិឆ្ងាញ់ៗជាច្រើនមុខ និងសម្បូរបែបរបស់បងប្អូនប្រជាពលរដ្ឋក្នុងខេត្តសៀមរាប។ ក្រៅពីនោះក៏មានកម្មវិធីកំសាន្ត ដោយមានការសម្តែងសិល្បៈទស្សនីយភាពជាច្រើនទម្រង់ ការប្រគំតន្រ្តីសម័យទសវត្សរ៍ឆ្នាំ១៩៦០ ការសរសេរតាមអានក្នុងប្រព័ន្ធបច្ចេកវិទ្យាទំនើប និងជាពិសេសការថតរូបសម្លៀកបំពាក់ក្នុងទសវត្សរ៍ឆ្នាំ១៩៦០ ដែលបងប្អូនអាចទាញយករូបថតបានភ្លាមៗ ការដាក់តាំងពិព័រណ៍ស្នាដៃ រូបភាព ព្រមទាំងមានកម្មវិធីជាច្រើនទៀត។