អតីតប្រធានាធិបតីប្រេស៊ីល Bolsonaro ត្រូវបានចោទប្រកាន់ពីបទធ្វើរដ្ឋប្រហារ

អតីតប្រធានាធិបតីប្រេស៊ីល លោក Jair Bolsonaro ត្រូវបានចោទប្រកាន់ដោយអគ្គរដ្ឋអាជ្ញារបស់ប្រទេស ពីបទប៉ុនប៉ងធ្វើរដ្ឋប្រហារ បន្ទាប់ពីលោកត្រូវបានចាញ់នៅក្នុងការបោះឆ្នោតប្រធានាធិបតីឆ្នាំ២០២២។

អតីតមេដឹកនាំវ័យ ៦៩ ឆ្នាំរូបនេះត្រូវបានចោទប្រកាន់ចំនួន ៥ ករណី ជុំវិញការរារាំងប្រធានាធិបតី Luiz Inacio Lula da Silva ពីការឡើងកាន់តំណែងបន្ទាប់ពីការប្រកួតប្រជែងការបោះឆ្នោតដ៏ជូរចត់។

សំណើរបស់ព្រះរាជអាជ្ញាឥឡូវនេះនឹងត្រូវពិចារណាដោយតុលាការកំពូល។ ប្រសិនបើសំណើរបស់ព្រះរាជអាជ្ញាត្រូវបានទទួលយកដោយតុលាការកំពូល នោះ Bolsonaro និងមនុស្ស ៣៣ នាក់ផ្សេងទៀតនឹងត្រូវបានចោទប្រកាន់ជាផ្លូវការ ហើយនឹងត្រូវប្រឈមមុខនឹងការកាត់ទោស។

យ៉ាងណាមិញ Bolsonaro បានបដិសេធចំពោះការចោទប្រកាន់នេះហើយនិយាយថាគាត់ជាជនរងគ្រោះនៃការធ្វើទុក្ខបុកម្នេញផ្នែកនយោបាយ។

គួររម្លឹកថា Bolsonaro ត្រូវបានហាមប្រាមមិនឱ្យឈរឈ្មោះក្នុងតំណែងរយៈពេលប្រាំបីឆ្នាំ បន្ទាប់ពីត្រូវបានចោទប្រកាន់ពីបទធ្វើឱ្យខូចលទ្ធិប្រជាធិបតេយ្យប្រេស៊ីល ការក្លែងបន្លំសន្លឹកឆ្នោត នៅក្នុងការបោះឆ្នោតឆ្នាំ ២០២២។
ប៉ុន្តែ Bolsonaro មិនដែលទទួលស្គាល់ការបរាជ័យរបស់គាត់ជាសាធារណៈទេ ហើយបានចាកចេញពីប្រេស៊ីលទៅកាន់សហរដ្ឋអាមេរិកពីរថ្ងៃមុនពេល Lula ស្បថចូលកាន់តំណែងជាប្រធានាធិបតី។

នៅថ្ងៃទី ៨ ខែមករា ឆ្នាំ២០២៣ អ្នកគាំទ្ររបស់គាត់បានសម្រុកចូលអគាររដ្ឋាភិបាលក្នុងរដ្ឋធានី Brasilia ។ ផ្នែកខ្លះនៃអគារត្រូវបានរឹបអូស ហើយប៉ូលិសបានចាប់ខ្លួនអ្នកបះបោរចំនួន ១,៥០០ នាក់។

លើសពីនេះ កាលពីបីខែមុន ប៉ូលីសសហព័ន្ធបានចេញផ្សាយរបាយការណ៍មួយ ដែលចោទប្រកាន់ Bolsonaro ថាបានដើរតួនាទីនាំមុខគេក្នុងការរៀបចំផែនការ និងរៀបចំការប៉ុនប៉ងធ្វើរដ្ឋប្រហារ រួមទាំងដោយស្នើគំនិតនេះដល់ឥស្សរជនសំខាន់ៗនៅក្នុងយោធា ដើម្បីបញ្ឈប់ Lula ឡើងកាន់អំណាច។

ទោះបីជាត្រូវបានហាមឃាត់មិនឱ្យឈរឈ្មោះក៏ដោយ Bolsonaro ត្រូវបានគេមើលឃើញថា នៅតែជាកម្លាំងនយោបាយដ៏រឹងមាំនៅក្នុងប្រទេសប្រេស៊ីល

ទោះជាយ៉ាងណាក៏ដោយ ប្រព័ន្ធផ្សព្វផ្សាយប្រេស៊ីលរាយការណ៍ថាតុលាការកំពូលត្រូវបានគេរំពឹងថានឹងដំណើរការសវនាការនៅចុងឆ្នាំនេះ៕

ប្រភព៖ BBC