ប៉ូលិសថៃ បង្ហាញភិនភាគឃាតករដែលបាញ់សម្លាប់អតីតសមាជិកគណបក្សប្រឆាំងនៅកម្ពុជា

អតីតសមាជិកសភាគណបក្សប្រឆាំងកម្ពុជាម្នាក់ត្រូវបានអ្នកជិះម៉ូតូបាញ់សម្លាប់នៅក្បែរវត្ត Bowonniwet Vihara ក្នុងសង្កាត់ Phra Nakhon នៃទីក្រុងបាងកកកាលពីល្ងាចថ្ងៃអង្គារ។

លឹម គឹមយ៉ា អាយុ៧៣ឆ្នាំ ស្លាប់នៅកន្លែងកើតហេតុ។ មន្ត្រីការិយាល័យប៉ូលិសក្រុងបានបើកការតាមប្រមាញ់ឃាតករ។ ប៉ូលិសបាននិយាយថា វីដេអូកាមេរ៉ាឃ្លាំមើលពីកន្លែងកើតហេតុ បានបង្ហាញបុរសម្នាក់ ជិះម៉ូតូម៉ាកហុងដា វ៉េវ 100 ពណ៌ក្រហម ពាក់ស្លាកលេខ 845 ពាក់មួកសុវត្ថិភាព ខោខូវប៊យវែង និងអាវដៃខ្លី ពណ៌ប្រផេះ មានកាបូបខាងមុខ ដោយគេជឿថា មានកាំភ្លើងមួយដើមលាក់ទុកក្នុងកាបូប។

លឹម គឹមយ៉ា មានសញ្ជាតិខ្មែរ និងបារាំង ត្រូវបានគេរាយការណ៍ថា បានធ្វើដំណើរទៅទីក្រុងបាងកកតាមរថយន្តក្រុងពីខេត្តសៀមរាប ប្រទេស កម្ពុជាជាមួយប្រពន្ធជនជាតិបារាំង និងឪពុកមាជាជនជាតិខ្មែរម្នាក់។

យោងតាមប៉ូលិសបានឱ្យដឹងថា ការបាញ់ប្រហារនេះបានកើតឡើងភ្លាមៗបន្ទាប់ពីពួកគេមកដល់កន្លែងកើតហេតុ។

គួរបញ្ជាក់ថា លោក លឹម គឹមយ៉ា ជាសមាជិកគណបក្សសង្គ្រោះជាតិដែលជាគណបក្សប្រឆាំងដ៏សំខាន់ក្នុងប្រទេសកម្ពុជាមុនពេលដែលគណបក្សនេះ ត្រូវបានតុលាការកំពូលរំលាយកាលពីខែវិច្ឆិកា ឆ្នាំ២០១៧។ ទោះបីជាគាត់កាន់លិខិតឆ្លងដែនបារាំង ហើយអាចតាំងទីលំនៅថ្មីបានយ៉ាងងាយស្រួលក៏ដោយ ក៏គាត់គឺជាសមាជិកសភាបក្សមួយក្តាប់តូច ដែលនៅតែនៅពីក្រោយនៅកម្ពុជា បន្ទាប់ពីមនុស្សជាច្រើននាក់ទៀតបានភៀសខ្លួនទៅនិរទេសខ្លួនក៏ដោយ។ លោកក៏ធ្លាប់បានប្រាប់អ្នកសារព័ត៌មាននៅពេលនោះថា “ខ្ញុំនឹងមិនបោះបង់នយោបាយឡើយ”។

ប្រភព៖ Bangkok Post