ទាហានកូរ៉េខាងជើងដែលទើបចូលប្រឡូកក្នុងសមរភូមិជាមួយកងកម្លាំងអ៊ុយក្រែន បានទទួលរងគ្រោះប្រហែល ១,១០០ នាក់ ក្នុងរយៈពេលខ្លី!

អគ្គសេនាធិការចម្រុះរបស់កូរ៉េខាងត្បូងបាននិយាយកាលពីថ្ងៃចន្ទថា ទាហានកូរ៉េខាងជើងជាង ១,០០០ នាក់ត្រូវបានសម្លាប់ ឬរងរបួសក្នុងការប្រយុទ្ធគ្នាជាមួយកងទ័ពរុស្ស៊ីនៅក្នុងសង្គ្រាមអ៊ុយក្រែន។

តួលេខថ្មីនេះធ្វើឡើងបន្ទាប់ពីរបាយការណ៍របស់ទីភ្នាក់ងារចារកម្មរបស់ទីក្រុងសេអ៊ូលទៅកាន់សមាជិកសភាកាលពីសប្តាហ៍មុន ដែលបាននិយាយថាយ៉ាងហោចណាស់ទាហានកូរ៉េខាងជើង ១០០ នាក់ត្រូវបានសម្លាប់ចាប់តាំងពីចូលប្រយុទ្ធក្នុងខែធ្នូ។

យោធាកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា “តាមរយៈប្រភពព័ត៌មាន និងការស៊ើបការណ៍ផ្សេងៗ យើងវាយតម្លៃថា ទាហានកូរ៉េខាងជើងដែលទើបចូលប្រឡូកក្នុងសមរភូមិជាមួយកងកម្លាំងអ៊ុយក្រែន បានទទួលរងគ្រោះប្រហែល ១,១០០ នាក់” ។

របាយការណ៍ដដែលបានបន្ថែមថា “យើងចាប់អារម្មណ៍ជាពិសេសចំពោះលទ្ធភាពនៃការដាក់ពង្រាយបន្ថែម” របស់ទាហានកូរ៉េខាងជើង ដើម្បីជួយដល់កិច្ចខិតខំប្រឹងប្រែងធ្វើសង្គ្រាមរបស់រុស្ស៊ី។ ទីក្រុងព្យុងយ៉ាងត្រូវបានគេរាយការណ៍ថា “កំពុងរៀបចំដាក់ពង្រាយទាហានបន្ថែម”។

យោងតាមយោធាកូរ៉េខាងត្បូងបានឱ្យដឹងថា ទីក្រុងព្យុងយ៉ាងកំពុង ផលិត និងផ្តល់យន្តហោះគ្មានមនុស្សបើកដល់ប្រទេសរុស្ស៊ី ដើម្បីជួយដល់ទីក្រុងម៉ូស្គូ ក្នុងការប្រយុទ្ធប្រឆាំងនឹងអ៊ុយក្រែន។ នាយសេនាធិការចម្រុះរបស់កូរ៉េខាងត្បូងបាននិយាយថា កូរ៉េខាងជើងក៏បានផ្គត់ផ្គង់ “គ្រាប់រ៉ុក្កែត ២៤០ មីលីម៉ែត្រ និងកាំភ្លើងធំបាញ់ដោយខ្លួនឯង ១៧០ មីលីម៉ែត្រផងដែរ” ។

យោធារបស់ទីក្រុងសេអ៊ូលបានកត់សម្គាល់ថា ប្រទេសកូរ៉េខាងជើងមានគោលបំណងធ្វើទំនើបកម្មសមត្ថភាពសង្គ្រាមធម្មតារបស់ខ្លួនដោយផ្អែកលើបទពិសោធន៍ប្រយុទ្ធក្នុងសង្គ្រាមរុស្ស៊ី-អ៊ុយក្រែន។

ការរកឃើញចុងក្រោយនេះ ស្របនឹងរបាយការណ៍មួយរបស់ National Intelligence Service ដែលបានជូនដំណឹងដល់សមាជិកសភាថា “រុស្ស៊ីអាចផ្តល់អត្ថប្រយោជន៍ទៅវិញទៅមក” សម្រាប់ការរួមចំណែកខាងយោធារបស់កូរ៉េខាងជើង រួមទាំង “ការធ្វើទំនើបកម្មអាវុធធម្មតារបស់កូរ៉េខាងជើង”ផងដែរ៕

ប្រភព៖ The Moscow times