តើនេះជាសញ្ញានៃសង្គ្រាមលោកលើកទី៣ ដូចគេសង្ស័យមែនឬយ៉ាងណា? ចូ បៃដិន បើកភ្លើងខៀវឱ្យអ៊ុយក្រែនប្រើអាវុធអាមេរិក វាយប្រហារចូលក្នុងទឹកដីរុស្ស៉ី

រដ្ឋបាលរបស់លោកប្រធានាធិបតី Joe Biden បានអនុញ្ញាតឱ្យអ៊ុយក្រែន ប្រើប្រាស់មីស៊ីលរយៈចម្ងាយឆ្ងាយរបស់សហរដ្ឋអាមេរិក ប្រឆាំងនឹងគោលដៅនៅក្នុងប្រទេសរុស្ស៊ី ដែលជាសញ្ញាដ៏សំខាន់នៃគោលនយោបាយរបស់ទីក្រុងវ៉ាស៊ីនតោន ក្នុងជម្លោះអ៊ុយក្រែន និងរុស្ស៊ី។

អ៊ុយក្រែនគ្រោងនឹងធ្វើការវាយប្រហាររយៈចម្ងាយឆ្ងាយជាលើកដំបូងរបស់ខ្លួនក្នុងរយៈពេលប៉ុន្មានថ្ងៃខាងមុខ នេះបលតាមមន្ត្រីអាមេរិកពីររូប បាននិយាយកាលពីថ្ងៃអាទិត្យដោយមិនបង្ហាញព័ត៌មានលម្អិតដោយសារតែការព្រួយបារម្ភអំពីសុវត្ថិភាពប្រតិបត្តិការ។ ការសម្រេចចិត្តរបស់លោក Biden ក្នុងការអនុញ្ញាតឱ្យអ៊ុយក្រែនប្រើប្រាស់ប្រព័ន្ធមីស៊ីល Tactical Missile System (ATACMS) ដ៏មានអានុភាព ដើម្បីកំណត់គោលដៅលើទឹកដីរុស្ស៊ី គឺជាការផ្លាស់ប្តូរយ៉ាងម៉ឺងម៉ាត់ក្នុងប៉ុន្មានខែចុងក្រោយ មុនពេលលោកប្រគល់អំណាចឱ្យប្រធានាធិបតីជាប់ឆ្នោត Donald Trump នៅថ្ងៃទី២០ ខែមករា។

កាសែត New York Times និង The Washington Post បាននិយាយថាការផ្លាស់ប្តូររបស់លោក Biden បានធ្វើឡើងដើម្បីឆ្លើយតបទៅនឹងទាហានកូរ៉េខាងជើងដែលត្រូវបានដាក់ពង្រាយដើម្បីជួយដល់កិច្ចខិតខំប្រឹងប្រែងសង្រ្គាមរបស់ទីក្រុងម៉ូស្គូប្រឆាំងនឹងប្រទេសជិតខាង។កន្លងមក មន្ត្រីអាមេរិកមានការព្រួយបារម្ភអំពីគ្រោះថ្នាក់នៃជម្លោះជាមួយរុស្ស៊ីដែលមានអាវុធនុយក្លេអ៊ែ កាន់តែខ្លាំងឡើង ក៏ដូចជាហានិភ័យនៃការបំផ្លាញឃ្លាំងអាវុធដ៏មានតម្លៃរបស់ក្រុងវ៉ាស៊ីនតោន។

ការសម្រេចចិត្តរបស់ទីក្រុងវ៉ាស៊ីនតោន ក្នុងការអនុញ្ញាតឱ្យអ៊ុយក្រែន វាយប្រហារចូលជ្រៅទៅក្នុងប្រទេសរុស្ស៊ី ជាមួយនឹងមីស៊ីលរយៈចម្ងាយឆ្ងាយរបស់សហរដ្ឋអាមេរិក អាចនាំឱ្យមានសង្គ្រាមលោកលើកទី ៣។ នេះបើតាមលោក Vladimir Dzhabarov អនុប្រធានទីមួយនៃគណៈកម្មាធិការកិច្ចការអន្តរជាតិនៃសភាជាន់ទាបរុស្ស៊ី បាននិយាយ។

ដោយឡែក លោកពូទីនបានព្រមានថាការប្រើប្រាស់ ATACMS នៅក្នុងប្រទេសរុស្ស៊ីនឹងមានន័យថាសម្ព័ន្ធមិត្តណាតូកំពុង “មានសង្រ្គាម” ជាមួយប្រទេសរបស់គាត់ ដែលជាការគំរាមកំហែងដែលគាត់បានធ្វើពីមុន នៅពេលដែលអ្នកគាំទ្រលោកខាងលិចរបស់អ៊ុយក្រែនបង្កើនជំនួយយោធារបស់ពួកគេ។

យ៉ងណាមិញ មន្ត្រីអាមេរិកមួយចំនួនបានសម្តែងការសង្ស័យថា ការអនុញ្ញាតឱ្យមានការវាយប្រហាររយៈចម្ងាយឆ្ងាយនឹងផ្លាស់ប្តូរគន្លងទាំងមូលនៃសង្រ្គាម ការសម្រេចចិត្តនេះអាចជួយអ៊ុយក្រែនក្នុងពេលដែលកងកម្លាំងរុស្ស៊ីកំពុងទទួលបានផលចំណេញ ហើយអាចនឹងដាក់ទីក្រុង Kyiv ឱ្យស្ថិតក្នុងទីតាំងចរចាប្រសើរជាងពេលណាទាំងអស់ ប្រសិនបើការចរចាបទឈប់បាញ់កើតឡើង។

ទោះជាយ៉ាងណាក៏ដោយ គេមិនច្បាស់ទេថាតើលោក Trump នឹងបដិសេធការសម្រេចចិត្តរបស់លោក Biden នៅពេលគាត់ចូលកាន់តំណែងឬយ៉ាងណា។ លោក Trump បានរិះគន់ជាយូរណាស់មកហើយអំពីទំហំជំនួយផ្នែកហិរញ្ញវត្ថុ និងយោធារបស់សហរដ្ឋអាមេរិកដល់អ៊ុយក្រែន ហើយបានប្តេជ្ញាថានឹងបញ្ចប់សង្រ្គាមឱ្យបានឆាប់រហ័ស។

គួរបញ្ជាក់ថា ចាប់តាំងពីជ័យជម្នះថ្ងៃទី ៥ ខែវិច្ឆិការបស់ Trump មន្ត្រីរដ្ឋបាលជាន់ខ្ពស់ Biden បាននិយាយម្តងហើយម្តងទៀតថាពួកគេនឹងប្រើពេលវេលាដែលនៅសល់ដើម្បីធានាថាអ៊ុយក្រែនអាចប្រយុទ្ធប្រកបដោយប្រសិទ្ធភាពនៅឆ្នាំក្រោយ៕

ប្រភព៖ CNC