អំពើហិង្សាដ៏អាក្រក់នៅប្រទេសមីយ៉ាន់ម៉ា ជំរុញឱ្យជនជាតិរ៉ូហ៊ីងយ៉ារាប់ពាន់នាក់បានភៀសខ្លួនទៅកាន់ប្រទេសបង់ក្លាដែស ខណៈដែលបង់ក្លាដែសស្រែកថាលែងមានលទ្ធភាពផ្ដល់ជម្រកទៀតហើយ

ជនមូស្លីមរ៉ូហ៊ីងយ៉ាប្រហែល ៨ ០០០ នាក់បានភៀសខ្លួនទៅកាន់ប្រទេសបង់ក្លាដែសក្នុងរយៈពេលប៉ុន្មានខែថ្មីៗនេះ ដោយបានរត់គេចពីអំពើហឹង្សាកាន់តែខ្លាំងឡើងនៅក្នុងរដ្ឋរ៉ាឃីនភាគខាងលិចនៃប្រទេសមីយ៉ាន់ម៉ា នេះបើយោងតាមមន្ត្រីបង់ក្លាដែស។

អំពើហឹង្សាបានកាន់តែខ្លាំងឡើង នៅពេលដែលការប្រយុទ្ធគ្នារវាងរបបយោធាដែលកំពុងកាន់អំណាចរបស់ប្រទេសមីយ៉ាន់ម៉ា និងកងទ័ពអារ៉ាកាន ដែលជាកងជីវពលជនជាតិភាគតិចដ៏មានឥទ្ធិពលដែលទាញចេញពីពុទ្ធសាសនិកភាគច្រើននៅតែបន្តកាន់តែអាក្រក់ទៅៗ។

លោក Mohammad Shamsud Douza មន្ត្រីជាន់ខ្ពស់ទទួលបន្ទុកជនភៀសខ្លួនសម្រាប់រដ្ឋាភិបាលបង់ក្លាដែសបាននិយាយថា “យើងមានព័ត៌មានថាជនជាតិរ៉ូហ៊ីងយ៉ាប្រហែល ៨,០០០ នាក់បានឆ្លងចូលទៅក្នុងប្រទេសបង់ក្លាដែសនាពេលថ្មីៗនេះ ដែលភាគច្រើនក្នុងរយៈពេលពីរខែចុងក្រោយនេះ”។ លោកបានបន្តថា “ប្រទេសបង់ក្លាដែសមានបន្ទុកលើសហើយមិនអាចផ្ទុកជនជាតិរ៉ូហ៊ីងយ៉ាបានទៀតទេ” ។

រដ្ឋមន្ត្រីការបរទេសបង់ក្លាដែស លោក Mohammad Touhid Hossain បានប្រាប់អ្នកយកព័ត៌មានកាលពីយប់ថ្ងៃទី៣ ខែកញ្ញា ថា រដ្ឋាភិបាលនឹងរៀបចំ “ការពិភាក្សាដ៏ធ្ងន់ធ្ងរមួយនៅគណៈរដ្ឋមន្ត្រី” ក្នុងរយៈពេលពីរទៅបីថ្ងៃខាងមុខ ដើម្បីដោះស្រាយវិបត្តិនេះ។

ខណៈពេលដែលសម្តែងការអាណិតអាសូរចំពោះជនជាតិរ៉ូហ៊ីងយ៉ា លោក Hossain បាននិយាយថា ប្រទេសនេះលែងមានលទ្ធភាពផ្តល់ជម្រកមនុស្សធម៌ដល់ជនភៀសខ្លួនបន្ថែមទៀតហើយ។

ជនភៀសខ្លួនរ៉ូហ៊ីងយ៉ារាប់ម៉ឺននាក់នៅក្នុងប្រទេសបង់ក្លាដែសបានប្រមូលផ្តុំគ្នានៅក្នុងជំរុំកាលពីថ្ងៃទី២៥ ខែសីហា ជាការប្រារព្ធខួបលើកទី ៧ នៃការបង្រ្កាបដោយយោធាឆ្នាំ២០១៧ ដែលបានបង្ខំឱ្យពួកគេភៀសខ្លួនចេញពីប្រទេសមីយ៉ាន់ម៉ា ដោយទាមទារឱ្យបញ្ចប់អំពើហិង្សា និងការវិលត្រឡប់ទៅកាន់ស្រុកកំណើតរបស់ពួកគេវិញដោយសុវត្ថិភាព។

បច្ចុប្បន្នជនជាតិរ៉ូហ៊ីងយ៉ាជាងមួយលាននាក់រស់នៅក្នុងជំរុំចង្អៀតនៅភាគខាងត្បូងប្រទេសបង់ក្លាដែស ដោយមានក្តីសង្ឃឹមតិចតួចក្នុងការត្រឡប់ទៅប្រទេសមីយ៉ាន់ម៉ា ជាកន្លែងដែលពួកគេភាគច្រើនត្រូវបានបដិសេធពីភាពជាពលរដ្ឋ និងសិទ្ធិជាមូលដ្ឋានផ្សេងទៀត។

ការកើនឡើងនៃអំពើហិង្សានាពេលថ្មីៗនេះ គឺជារឿងដ៏អាក្រក់បំផុតដែលជនជាតិរ៉ូហ៊ីងយ៉ាបានជួបប្រទះចាប់តាំងពីយុទ្ធនាការដឹកនាំដោយយោធាមីយ៉ាន់ម៉ាឆ្នាំ២០១៧ ដែលអង្គការសហប្រជាជាតិបានពិពណ៌នាថាមានចេតនាប្រល័យពូជសាសន៍។

ប្រភព៖ The straits times