កម្ពុជា-អង់គ្លេស ពិភាក្សាលើការលើកកម្ពស់កិច្ចសហប្រតិបត្តិការទ្វេភាគី ក្នុងវិស័យពាណិជ្ជកម្ម និងវិនិយោគ

នារសៀលថ្ងៃអង្គារ ទី១៦ ខែកក្តដា ឆ្នាំ២០២៤ នៅទីស្ដីការក្រសួងពាណិជ្ជកម្ម លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានអនុញ្ញាតជូនឯកឧត្តម MARTIN KENT ស្នងការទទួលបន្ទុកកិច្ចការពាណិជ្ជកម្មចក្រភពអង់គ្លេស ប្រចាំតំបន់អាស៊ីប៉ាស៊ីហ្វិក ចូលជួបសម្តែងការគួរសម និងពិភាក្សាការងារ។

ក្នុងជំនួបនាឱកាសនេះ លោកជំទាវរដ្ឋមន្ត្រី និងឯកឧត្តម MARTIN KENT បានពិភាក្សាអំពីវឌ្ឍនភាព និងការលើកកម្ពស់កិច្ចសហប្រតិបត្តិការទ្វេភាគី ក្នុងវិស័យពាណិជ្ជកម្ម និងវិនិយោគរវាងកម្ពុជា និងចក្រភពអង់គ្លេស ព្រមទាំងបានផ្លាស់ប្ដូរមតិយោបល់លើការប្រើប្រាស់ប្រព័ន្ធ​អនុគ្រោះ​ពន្ធ​​សម្រាប់​ប្រទេស​កំពុងអភិវឌ្ឍន៍ ​(DCTS) វឌ្ឍនភាពនៃវេទិកាពាណិជ្ជកម្មនិងវិនិយោគរួមគ្នា និងការចូលរួមរបស់ចក្រភពអង់គ្លេសនៅក្នុងកិច្ចប្រជុំឧត្តមមន្រ្តីសេដ្ឋកិច្ចអាស៊ាន និងកិច្ចប្រជុំពាក់ព័ន្ធជាដើម។