រដ្ឋាភិបាលតៃវ៉ាន់ ព្រមានពលរដ្ឋរបស់ខ្លួនកុំឱ្យធ្វើដំណើរទៅកាន់ប្រទេសចិនដីគោក បន្ទាប់ពីទីក្រុងប៉េកាំងគំរាមប្រហារជីវិតអ្នកដែលគាំទ្រឯករាជ្យភាពរបស់កោះនេះ
អ្នកនាំពាក្យក្រុមប្រឹក្សាកិច្ចការដីគោករបស់តៃវ៉ាន់ លោក Liang Wen-chieh បានចេញការព្រមាននេះ ក្នុងអំឡុងសន្និសីទសារព័ត៌មាន។ រដ្ឋាភិបាលចិនបានប្រកាសពីគោលនយោបាយថ្មីមួយដែលផ្តោតលើ “អ្នកបំបែកខ្លួន” កាលពីសប្តាហ៍មុន ហើយបាននិយាយថា ខ្លួននឹងបន្តការកាត់ទោសប្រហារជីវិតសម្រាប់អ្នកគាំទ្រឯករាជ្យរបស់តៃវ៉ាន់។
![](https://media.brandbodia.com/wp-content/uploads/2024/06/photo_2024-06-28_13-43-32-1024x682.jpg)
![](https://media.brandbodia.com/wp-content/uploads/2024/06/photo_2024-06-28_13-43-34-1024x576.jpg)
ប្រធានាធិបតីតៃវ៉ាន់ លោក ឡៃ ឈីងតេ បាននិយាយកាលពីថ្ងៃពុធថា “ខ្ញុំចង់សង្កត់ធ្ងន់ថា លទ្ធិប្រជាធិបតេយ្យមិនមែនជាឧក្រិដ្ឋកម្មទេ វាជាស្វ័យភាពដែលជាអំពើអាក្រក់ពិតប្រាកដ។ ចិនគ្មានសិទ្ធិដាក់ទណ្ឌកម្មប្រជាជនតៃវ៉ាន់ទេ។ ជាងនេះទៅទៀត ចិនក៏គ្មានសិទ្ធិហាមឃាត់សេរីភាពរបស់ប្រជាជនតៃវ៉ាន់ដែរ។
ជាមួយគ្នានេះ លោកក៏បានអំពាវនាវឱ្យប្រទេសចិនប្រឈមមុខនឹងអត្ថិភាព ហើយមានការផ្លាស់ប្តូរ និងការសន្ទនាជាមួយរដ្ឋាភិបាលដែលជាប់ឆ្នោតតាមបែបប្រជាធិបតេយ្យ និងស្របច្បាប់របស់តៃវ៉ាន់ បើពុំនោះទេ ទំនាក់ទំនងរវាងតៃវ៉ាន់ និងចិននឹងកាន់តែមានភាពឃ្លាតឆ្ងាយពីគ្នា”។
គួរបញ្ជាក់ថា ប្រទេសចិនបានចាត់ទុកកោះតៃវ៉ាន់ជាទឹកដីរបស់ខ្លួនជាយូរមកហើយ ហើយប្រធានាធិបតីចិនលោក Xi Jinping បានគំរាមដណ្តើមយកកោះនេះដោយកម្លាំងនៅក្នុងប៉ុន្មានឆ្នាំថ្មីៗនេះ។ ចំណាត់ការនេះ គឺជាការកើនឡើងចុងក្រោយនៃភាពតានតឹងរវាងទីក្រុងតៃប៉ិ និងទីក្រុងប៉េកាំង។ ដោយឡែក ប៉ុន្មានខែថ្មីៗនេះក៏បានឃើញចិនធ្វើសមយុទ្ធយោធាយ៉ាងទូលំទូលាយជុំវិញកោះនេះ ការគម្រាមប្រហារជីវិតរបស់ទីក្រុងប៉េកាំងកើតឡើងតែប៉ុន្មានថ្ងៃប៉ុណ្ណោះ បន្ទាប់ពីសហរដ្ឋអាមេរិកបានយល់ព្រមលក់យន្តហោះគ្មានមនុស្សបើក កាំជ្រួច និងឧបករណ៍ផ្សេងទៀតចំនួន ៣៦០ លានដុល្លារទៅឱ្យតៃវ៉ាន់។
ប្រភព៖ Fox News