រាជរដ្ឋាភិបាលកម្ពុជា ផ្តល់ឱកាសជាអាទិភាពដល់កូនចៅអតីតយុទ្ធជនបានចូលបម្រើនការងារកងទ័ពបន្តវេនពីឪពុកម្តាយ
ក្នុងឱកាសនៃពិធីអបអរសាទរ ខួបលើកទី១៧ ទិវាអតីតយុទ្ធជនកម្ពុជា ២១ មិថុនា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា ការងាររបស់សមាគមអតីតយុទ្ធជនផ្តោតគោលដៅ៣ចំណុច គឺ កិត្តិយស ជីវភាព និងឱកាស។
![](https://media.brandbodia.com/wp-content/uploads/2024/06/photo_2024-06-26_12-37-54-1024x798.jpg)
![](https://media.brandbodia.com/wp-content/uploads/2024/06/photo_2024-06-26_12-37-29-1024x743.jpg)
កិត្តិយស, គឺការរំលឹកគុណូបការៈរបស់អតីតយុទ្ធជន ដោយរាជរដ្ឋាភិបាលបានកំណត់យកថ្ងៃទី២១ មិថុនា រាល់ឆ្នាំជាទិវាអតីតយុទ្ធជន ដើម្បីជាការរំលឹកដល់យុវជនជំនាន់ក្រោយចងចាំ ជាមួយនិងការធ្វើពិធីជួបជុំសំណេះសំណេសជាមួយអតីតយុទ្ធជននៅតាមគ្រប់រាជធានីខេត្ត។
![](https://media.brandbodia.com/wp-content/uploads/2024/06/photo_2024-06-26_12-37-59-682x1024.jpg)
ទី២ ជីវភាព បើទោះបីជាអតីតយុទ្ធជនបានចូលនិវត្តន៍ទៅហើយក៏រាជរដ្ឋាភិបាលមិនបានទុកចោលនោះដែរ ដោយបានខិតខំដំឡើងប្រាក់សោធន របបសម្រាប់គ្រួសារ ក៏ដូចជាការរៀបចំផ្ទះសំបែងជូនអតីតយុទ្ធជនដែលគ្មានលទ្ធភាពឱ្យគាត់បានបស់នៅសមរម្យ ជាមួយគ្នានេះរាជរដ្ឋាភិបាលក៏បានដាក់ចេញនៅគោលនយោបាយជាច្រើនក្នុងការគាំទ្រដល់សុខុមាលភាព និងជីវភាពរស់នៅ ដូចជាការផ្តល់ប័ណ្ណ ប.ស.ស. ដែលគាត់អាចទទួលបានការថែទាំសុខភាពដោយឥតគិតថ្លៃនៅតាមបណ្តាមន្ទីរពេទ្យរដ្ឋ និងឯកជនមួយចំនួន។
![](https://media.brandbodia.com/wp-content/uploads/2024/06/photo_2024-06-26_12-37-25-1024x829.jpg)
ទី៣ ឱកាស គឺឱកាសរស់នៅដោយមិនកាត់ផ្តាច់ ពោលគឺនៅបន្តប្រទាក់ក្រឡាក្នុងការយកចិត្តទុកដាក់ពីរាជរដ្ឋាភិបាល ដោយផ្តល់ឱកាសអាចចូលរួមក្នុងសង្គម តាមរយៈតួនាទីមួយចំនួនក្នុងមូលដ្ឋាន លើសពីនេះក៏បានផ្តល់ជាអាហារូបករណ៍ និងជាពិសេស ផ្តល់ឱកាសជាអាទិភាពដល់កូនចៅអតីតយុទ្ធជនបានចូលបម្រើនការងារកងទ័ពបន្តវេនពីឪពុកម្តាយផងដែរ។
![](https://media.brandbodia.com/wp-content/uploads/2024/06/photo_2024-06-26_12-38-03-1024x681.jpg)
សម្ដេចធិបតី បានបញ្ជាក់ថា ការប្រារព្ធ ទិវាអតីតយុទ្ធជនកម្ពុជា គឺជាព្រឹត្តិការណ៍ជាតិមួយដែលធ្វើឱ្យប្រជាជនកម្ពុជាគ្រប់រូបចងចាំនូវគុណូបការៈដ៏ឧត្តុង្គឧត្តម និងពលីកម្មដ៏ធំធេងមិនអាចកាត់ថ្លៃបានរបស់យុទ្ធជន យុទ្ធនារី និងអ្នកស្នេហាជាតិគ្រប់ៗជំនាន់ ជាពិសេសលោកតា លោកយាយ អ៊ំ ពូ មីង និងបងប្អូនអតីតយុទ្ធជន ដែលបានបូជាសាច់ស្រស់ ឈាមស្រស់ និងលះបង់អាយុជីវិតដើម្បីបុព្វហេតុជាតិ មាតុភូមិ ដើម្បីនាំមកនូវសុខសន្តិភាពជូនប្រទេសជាតិ និងប្រជាជនកម្ពុជា៕
ប្រភព៖ STPM