ចិនចាប់ផ្តើមសម្ញែងកម្លាំងយោធាជុំវិញកោះតៃវ៉ាន់ជាការព្រមានប្រធាធិបតីថ្មីរបស់កោះនេះ ជុំវិញសម្ដីដែលលោកបាននិយាយ កាលពីពេលស្បថចូលកាន់តំណែង

យោងតាមប្រព័ន្ធផ្សព្វផ្សាយរដ្ឋរបស់ចិន បានឱ្យដឹងថា ប្រទេសចិនបានចាប់ផ្តើមសមយុទ្ធយោធានៅក្នុងដែនទឹក និងដែនអាកាសជុំវិញកោះតៃវ៉ាន់ ដែលគ្រប់គ្រងដោយខ្លួនឯង។ បញ្ជាការនៃកងទ័ពរំដោះប្រជាជនចិនបានចាប់ផ្តើមសមយុទ្ទកាលពីព្រឹកថ្ងៃព្រហស្បតិ៍នៅក្នុងច្រកសមុទ្រតៃវ៉ាន់ ភាគខាងជើង ភាគខាងត្បូង និងភាគខាងកើតនៃកោះតៃវ៉ាន់ ក៏ដូចជាតំបន់នានាផងដែរ។ អ្នកនាំពាក្យយោធាលោកវរសេនីយ៍ឯក Li Xi បាននិយាយថា សមយុទ្ធរួមគ្នារយៈពេលពីរថ្ងៃដែលពាក់ព័ន្ធនឹងកងទ័ព កងទ័ពជើងទឹក កងទ័ពអាកាស និងកងកម្លាំងរ៉ុក្កែត គឺជា “ការដាក់ទណ្ឌកម្មយ៉ាងខ្លាំងក្លាចំពោះទង្វើផ្តាច់ខ្លួនរបស់កងកម្លាំង ‘ឯករាជ្យតៃវ៉ាន់’ និងការព្រមានយ៉ាងម៉ឺងម៉ាត់ប្រឆាំងនឹងការជ្រៀតជ្រែក និងការបង្កហេតុដោយកងកម្លាំងខាងក្រៅ។

ការបង្ហាញកម្លាំងនេះ កើតឡើងបីថ្ងៃបន្ទាប់ពីប្រធានាធិបតីថ្មីរបស់តៃវ៉ាន់ លោក William Lai Ching-te បានស្បថចូលកាន់តំណែង ហើយបានអំពាវនាវឱ្យទីក្រុងប៉េកាំងបញ្ឈប់ “ការបំភិតបំភ័យ” លើកោះនេះ ដែលចិនអះអាងថាជារបស់ខ្លួន។

ទីក្រុងប៉េកាំងមិនបានច្រានចោលការប្រើប្រាស់កម្លាំងដើម្បីសម្រេចបាននូវគោលដៅនៃការបង្រួបបង្រួមរបស់ខ្លួនឡើយ ហើយបានប្រតិកម្មយ៉ាងខ្លាំងចំពោះការតែងតាំងលោក Lai ជាប្រធានាធិបតី ខណៈដែលចិនបានចាត់ទុកលោក Lao ថាជា “អ្នកបង្កបញ្ហា”។

ក្រសួងការពារជាតិតៃវ៉ាន់បាននិយាយថា ខ្លួនបានដាក់កម្លាំងយោធាក្នុងការប្រុងប្រយ័ត្នខ្ពស់” ដើម្បីឆ្លើយតបទៅនឹងសមយុទ្ធរបស់ប្រទេសចិន ដែលជា “ការបង្កហេតុ និងសកម្មភាពមិនសមហេតុផលដែលរំខានដល់សន្តិភាព និងស្ថិរភាពក្នុងតំបន់”។ នៅក្នុងសុន្ទរកថាដំបូងរបស់លោក Lai ទៅកាន់សាធារណៈជនបន្ទាប់ពីបានស្បថចូលកាន់តំណែង គាត់បាននិយាយថា “សាធារណរដ្ឋតៃវ៉ាន់ គឺជាប្រទេសដែលមានអធិបតេយ្យភាព ហើយឯករាជ្យដែលមានអធិបតេយ្យភាពគឺស្ថិតនៅលើប្រជាជន”។ លោកបានសង្កត់ធ្ងន់ថា រដ្ឋាភិបាលរបស់លោកនឹងមិនធ្វើសម្បទានលើលទ្ធិប្រជាធិបតេយ្យ និងសេរីភាពរបស់ខ្លួនឡើយ។ ជាមួយគ្នានេះ លោកបានអំពាវនាវដល់ទីក្រុងប៉េកាំងឱ្យ “បញ្ឈប់ការឈ្លានពានរបស់ខ្លួនប្រឆាំងនឹងតៃវ៉ាន់” និងខិតខំដើម្បី “រក្សាសន្តិភាពនិងស្ថិរភាពនៅក្នុងច្រកសមុទ្រតៃវ៉ាន់ផងដែរ។

យ៉ាងណាមិគ រដ្ឋមន្ត្រីក្រសួងការបរទេសចិនបានឆ្លើយតបថា គ្មានអ្វីអាចរារាំងប្រទេសចិនក្នុងការបង្រួបបង្រួមជាមួយតៃវ៉ាន់បាននោះទេ។ “អ្នកផ្តាច់ខ្លួនឯករាជ្យតៃវ៉ាន់ទាំងអស់ នឹងត្រូវជាប់គាំងជាសសរស្តម្ភនៃភាពអាម៉ាស់ក្នុងប្រវត្តិសាស្ត្រ”។

គួរកត់សម្គាល់ថា ប្រទេសចិនបានបង្កើនសកម្មភាពយោធានៅជុំវិញកោះនេះចាប់តាំងពីលោកស្រី Tsai Ing-wen ដែលជាអ្នកស្នងតំណែងមុនរបស់ Lai និងក៏ជាសមាជិកនៃគណបក្សវឌ្ឍនភាពប្រជាធិបតេយ្យ (DPP) ត្រូវបានបោះឆ្នោតជ្រើសរើសសម្រាប់អាណត្តិដំបូងរបស់នាងជាប្រធានាធិបតីក្នុងឆ្នាំ២០១៦ ។ ជារឿយៗចិនបានចាត់វិធានការកាន់តែខ្លាំងនៅពេលដែល មន្ត្រីកោះតៃវ៉ាន់ជួបអ្នកនយោបាយមកពីសហរដ្ឋអាមេរិក ដែលជាសម្ព័ន្ធមិត្តដ៏សំខាន់របស់តៃវ៉ាន់ ហើយបានធ្វើល្បែងសង្គ្រាមជាបន្តបន្ទាប់ដែលមិនធ្លាប់មានពីមុនមក បន្ទាប់ពីប្រធានសភាអាមេរិក Nancy Pelosi បានទៅទស្សនាកោះនេះក្នុងខែសីហា ឆ្នាំ២០២២។ ក្រសួងការពារជាតិតៃវ៉ាន់បាននិយាយថា “សកម្មភាពបែបនេះបានបង្កគ្រោះថ្នាក់យ៉ាងខ្លាំងដល់សន្តិភាព និងស្ថិរភាពពិភពលោក”។

ប្រភព៖ Aljazeera