ចិនចោទប្រកាន់អាមេរិកថាបានជំរិតសួរចម្លើយនិស្សិតចិនដែលកំពុងសិក្សានៅអាមេរិក ហើយគាបសង្កត់ពួកគេឱ្យធ្វើសកម្មភាពចារកម្ម

នៅក្នុងសន្និសីទសារព័ត៌មានកាលពីថ្ងៃទី៣១ ខែមករា អ្នកនាំពាក្យក្រសួងការបរទេសចិន លោក Wang Wenbin បានសម្តែងការព្រួយបារម្ភអំពីការការពារនិស្សិតចិន នៅក្នុងដែននៃការអនុវត្តច្បាប់របស់សហរដ្ឋអាមេរិក ជាពិសេសបានលើកឡើងពីឧប្បត្តិហេតុនៅអាកាសយានដ្ឋានអន្តរជាតិ Washington Dulles ។

យោងតាមលោក Wang យ៉ាងហោចណាស់និស្សិតចិនចំនួនប្រាំបីនាក់ដែលមានលិខិតអនុញ្ញាតធ្វើដំណើរស្របច្បាប់ និងត្រឹមត្រូវត្រូវបានទទួលរងនូវការសួរចម្លើយ ការយាយី និងការនិរទេសជាបន្តបន្ទាប់ដោយអាជ្ញាធរសហរដ្ឋអាមេរិក “ដោយហេតុផលគ្មានមូលដ្ឋាន” ចាប់តាំងពីចុងខែវិច្ឆិកា ឆ្នាំ២០២៣។ ជាមួយគ្នានេះ លោកបានចោទប្រកាន់ថាអាមេរិក បានបញ្ចុះបញ្ចូលសិស្សទាំងនេះឱ្យចូលរួមក្នុងសកម្មភាពដែលអាចប្រឆាំងនឹងផលប្រយោជន៍របស់ប្រទេសចិន។

លោក Wang បាននិយាយថា “មួយរយៈមកនេះ សហរដ្ឋអាមេរិកបានបៀតបៀន សួរចម្លើយ និងនិរទេសនិស្សិតចិនដែលមកដល់សហរដ្ឋអាមេរិកជាញឹកញាប់ ដោយចេតនានយោបាយ” ដែលសកម្មភាពបែបនេះបានរំលោភលើសិទ្ធិស្របច្បាប់របស់និស្សិត រំខានដល់ការផ្លាស់ប្តូរវប្បធម៌រវាងចិន និងសហរដ្ឋអាមេរិក និងផ្ទុយទៅនឹងការឯកភាពរបស់ប្រធានាធិបតីទាំងពីរលើការបង្កើនការផ្លាស់ប្តូររវាងប្រជាជន និងប្រជាជន។ ដោយចោទប្រកាន់សហរដ្ឋអាមេរិកថាមានពុតត្បុត

លោកបានអះអាងថា សហរដ្ឋអាមេរិកកំពុងពង្រីកគោលគំនិតសន្តិសុខជាតិ ដើម្បីគាបសង្កត់ និងធ្វើបាបនិស្សិតចិន ដែលទីបំផុតធ្វើឱ្យប៉ះពាល់ដល់សិទ្ធិមនុស្សជាមូលដ្ឋាន និងសិទ្ធិ និងផលប្រយោជន៍ស្របច្បាប់របស់បុគ្គលទាំងនេះ។

លោក Wang បានព្រមានថា សកម្មភាពដែលអនុវត្តដោយការអនុវត្តច្បាប់របស់សហរដ្ឋអាមេរិកបានបង្កការគំរាមកំហែងផ្ទាល់ដល់សន្តិសុខជាតិរបស់ប្រទេសចិនដោយចំណាត់ការរបស់សហរដ្ឋអាមេរិកគឺ “ការរើសអើង និងជំរុញការអនុវត្តច្បាប់ដោយហេតុផលនយោបាយ ហើយនឹងធ្វើឱ្យខូចមុខមាត់របស់អាមេរិកជាយថាហេតុ”។

លោកក៏បានទាមទារឱ្យបញ្ចប់ការគាបសង្កត់ និងការរឹតត្បិតនិស្សិតចិន ក្រោមលេសនៃសន្តិសុខជាតិ ការការពារសន្តិសុខ និងសិទ្ធិស្របច្បាប់របស់ពួកគេ និងការដកចេញនូវឧបសគ្គចំពោះការផ្លាស់ប្តូររវាងចិន និងសហរដ្ឋអាមេរិក និងការធ្វើដំណើរឆ្លងកាត់ព្រំដែន។ ជាងនេះទៅទៀត លោកក៏បានកត់សម្គាល់ផងដែរថា ប្រទេសចិននឹងចាត់វិធានការ “ម៉ឺងម៉ាត់” ដើម្បីធានាសន្តិសុខជាតិ និងផលប្រយោជន៍របស់ប្រជាពលរដ្ឋរបស់ខ្លួន។

ប្រភព៖ WION