អ្នកនាំពាក្យក្រសួងកសិកម្ម៖ ដំណាំសក្តានុពលខ្លាំងចំនួន៤ នឹងត្រូវរៀបចំចងក្រងឱ្យទៅជាសហគមន៍កសិកម្មទំនើប
អស់រយៈកាលជាង១ខែ ក្រោយពីកម្មវិធីគោលនយោបាយអាទិភាពនៃសហគមន៍កសិកម្មទំនើប ត្រូវបានប្រកាសដាក់ឱ្យអនុវត្តដោយសម្តេចធិបតីនាយករដ្ឋមន្ត្រី កាលពីចុងខែវិច្ឆិកា ឆ្នាំ២០២៣ ក្រុមការងារបានចុះជួបផ្សព្វផ្សាយ ជួបពិភាក្សា និងជំរុញកម្មវិធីគោលនយោបាយនេះដោយផ្ទាល់ជាមួយបងប្អូនកសិករ និងសហគមន៍នានា នៅក្នុងខេត្តសៀមរាប ខេត្តបន្ទាយមានជ័យ ខេត្តពោធិ៍សាត់ ខេត្តតាកែវ ខេត្តបាត់ដំបង ខេត្តកំពង់ចាម ខេត្តត្បូងឃ្មុំ និងខេត្តកណ្តាល បានសរុបចំនួន ៣៦ដង ក្នុងនោះ សហគមន៍ស្រូវ ១១ដង សហគមន៍បន្លែ ១៨ដង និងសហគមន៍ផ្សេងៗទៀត ៧ដង ប៉ុន្តែនេះជាលើកទី១មួយហើយ ដែលបានជួបធ្វើការជាមួយបងប្អូនសហគមន៍ស្វាយចន្ទី។ នេះបើតាមការគូសបញ្ជាក់របស់ លោក ឃឹម ហ្វីណង់ អ្នកនាំពាក្យក្រសួងកសិកម្ម នាព្រឹកថ្ងៃទី១០ ខែមករា ឆ្នាំ២០២៣នេះ នៅលើទំព័រផ្លូវការរបស់លោក។
![](https://media.brandbodia.com/wp-content/uploads/2024/01/photo_2024-01-10_08-52-03-1024x682.jpg)
![](https://media.brandbodia.com/wp-content/uploads/2024/01/photo_2024-01-10_08-52-05-683x1024.jpg)
លោកបានបន្តថា ស្វាយចន្ទីគឺជាកសិផលដែលត្រូវបាននាំចេញច្រើនជាងគេមួយរបស់កម្ពុជា ហើយកម្ពុជាក៏ស្ថិតក្នុងចំណោមប្រទេសដែលផលិតគ្រាប់ស្វាយចន្ទីនាំមុនគេនៅលើពិភពលោក ទាំងផ្នែកបរិមាណ និងគុណភាព ក្នុងនោះជាង៩០%នៃផលិតកម្មសំដៅបម្រើឱ្យទីផ្សារនាំចេញទៅក្រៅប្រទេស។ ហេតុដូច្នេះហើយទើបដំណាំនេះត្រូវបានចាត់ទុកជាដំណាំយុទ្ធសាស្ត្រ និងមានសក្តានុពលខ្លាំងចំនួន៤ ដែលត្រូវបានផ្តល់អាទិភាពមុនគេនៅក្នុងការជំរុញ និងរៀបចំចងក្រងឱ្យទៅជាសហគមន៍កសិកម្មទំនើប រួមមានដំណាំស្រូវ បន្លែ ម្រេច និងស្វាយចន្ទី។
![](https://media.brandbodia.com/wp-content/uploads/2024/01/photo_2024-01-10_08-51-41-1024x682.jpg)
![](https://media.brandbodia.com/wp-content/uploads/2024/01/photo_2024-01-10_08-51-48-1024x682.jpg)
![](https://media.brandbodia.com/wp-content/uploads/2024/01/photo_2024-01-10_08-51-51-1024x682.jpg)
ការលើកឡើងនេះ ស្របពេល លោក ឃឹម ហ្វីណង់ បានបន្តជួបពិភាក្សាការងារជាមួយថ្នាក់ដឹកនាំនៃសហគមន៍កសិកម្មតំបែររុងរឿងក្នុងខេត្តត្បូងឃ្មុំ(សមាជិក ១៥០គ្រួសារ ផ្ទៃដីផលិតកម្ម ៥០០ហិកតា) និងសហគមន៍កសិកម្មសន្ទុករុងរឿងក្នុងខេត្តកំពង់ធំ(សមាជិក ១៤៩គ្រួសារ ផ្ទៃដីផលិតកម្ម ១៦២ហិកតា) ដែលជាសហគមន៍ផលិតស្វាយចន្ទី ដើម្បីផ្សព្វផ្សាយពីទស្សនាទាន និងជំរុញឱ្យទៅក្លាយទៅជាសហគមន៍កសិកម្មទំនើប៕
ប្រភព៖ ឃឹម ហ្វីណង់ – Khim finan