លោក Jared Kushner និងលោក Steve Witkoff ដល់មូស្គូ ជួបពិភាក្សាជាមួយលោក ពូទីន ជុំវិញកិច្ចព្រមព្រៀងសន្តិភាពអ៊ុយក្រែន

បេសកជនពិសេសសហរដ្ឋអាម៉េរិក លោក Jared Kushner និងលោក Steve Witkoff បានធ្វើដំណើរមកដល់ទីក្រុងមូស្គូ នៅថ្ងៃព្រហស្បតិ៍ ទី១២ ខែវិច្ឆិកា ឆ្នាំ២០២៦ នេះ ដើម្បីចូលរួមកិច្ចពិភាក្សាជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ដែលជាផ្នែកមួយនៃកិច្ចខិតខំប្រឹងប្រែងចុងក្រោយបំផុត ក្នុងការជំរុញឱ្យមានកិច្ចព្រមព្រៀងសន្តិភាពសម្រាប់ប្រទេសអ៊ុយក្រែន។

ជំនួបនៅវិមានក្រឹមឡាំងនេះ គឺជាការជួបពិភាក្សាដោយផ្ទាល់លើកទី ១០ ហើយរវាងលោក Witkoff និងលោក ពូទីន ហើយវាបានធ្វើឡើងភ្លាមៗបន្ទាប់ពីកិច្ចចរចាសន្តិភាពត្រីភាគីរយៈពេលពីរថ្ងៃនៅទីក្រុង Abu Dhabi ទើបតែបានបញ្ចប់កាលពីថ្ងៃពុធ ដោយទទួលបានត្រឹមដំណឹងនៃការគ្រោងដោះដូរឈ្លើយសឹកទ្រង់ទ្រាយធំមួយទៀតប៉ុណ្ណោះ ប៉ុន្តែពុំទាន់មានរបកគំហើញសំខាន់ណាមួយលើបញ្ហាស្នូលនៅឡើយទេ។ នៅឯព្រលានយន្តហោះ លោក Kirill Dmitriev បេសកជនពិសេសរបស់លោក ពូទីន បានទទួលស្វាគមន៍ប្រតិភូអាម៉េរិកទាំងពីររូប ចំពេលមានធ្លាក់ព្រិលលាយភ្លៀង មុននឹងអមដំណើរឆ្ពោះទៅកាន់កណ្តាលទីក្រុងមូស្គូ។

កិច្ចចរចានៅទីក្រុង Abu Dhabi ក្នុងសប្តាហ៍នេះ គឺជាការចរចាដោយផ្ទាល់លើកដំបូងរវាងរុស្ស៊ី និងអ៊ុយក្រែន ក្រោមការសម្របសម្រួលរបស់សហរដ្ឋអាម៉េរិក ដើម្បីព្យាយាមបញ្ចប់សង្គ្រាមដែលអូសបន្លាយអស់រយៈពេល ៤ឆ្នាំកន្លះមកនេះ។ ទោះបីជាប្រធានាធិបតីអាម៉េរិក លោក ដូណាល់ ត្រាំ បានបង្ហាញសុទិដ្ឋិនិយមជាសាធារណៈក៏ដោយ ក៏ភាគីអាម៉េរិកទទួលស្គាល់ថា នៅមានការខ្វែងគំនិតគ្នាយ៉ាងខ្លាំងលើបញ្ហាធំៗ ជាពិសេសគឺបញ្ហាទឹកដី ខណៈដែលទីក្រុងកៀវបានច្រានចោលយ៉ាងដាច់អហង្ការចំពោះការទាមទាររបស់លោក ពូទីន ដែលចង់ឱ្យអ៊ុយក្រែនប្រគល់តំបន់ Donbas ទាំងមូល ជាថ្នូរនឹងសន្តិភាព។ ដោយសារការចរចារឿងទឹកដីកំពុងជាប់គាំង អ្នកសម្របសម្រួលអាម៉េរិកបានព្យាយាមបង្វែរការពិភាក្សាទៅរកការធានាសន្តិសុខ និងការកសាងប្រទេសឡើងវិញក្រោយសង្គ្រាមជំនួសវិញ។

ប្រភព៖ Reuters