រដ្ឋមន្ត្រីក្រសួងពាណិជ្ជកម្មលើកទឹកចិត្តវិនិយោគិន OIF ឱ្យពិនិត្យមើលសក្ដានុពលពាណិជ្ជកម្មដែលកម្ពុជាមាន ដើម្បីចូលរួមខ្សែច្រវ៉ាក់តម្លៃដែលកំពុងមានឧត្តមភាព

ដោយ៖ ផាត់ គឹមឆែ

កាលពីល្ងាចថ្ងៃទី០៧ ធ្នូ ឆ្នាំ២០២១កន្លងទៅ​ ឯកឧត្តម ប៉ាន សូរស័ក្ត រដ្ឋមន្ត្រីក្រសួងពាណិជ្ជកម្ម បានអញ្ជើញជាអធិបតី ប្រកាសបើកកម្មវិធីជំនួបសេដ្ឋកិច្ច ហ្រ្វង់កូហ្វូន ដែលធ្វើឡើងនៅរាជធានីភ្នំពេញ ក្រោមកិច្ចសហការរៀបចំដោយក្រសួងការបរទេស និងសហប្រតិបត្តិការអន្តរជាតិ និងអង្គការក្រុមប្រទេសនិយាយភាសាបារាំង (OIF)។

បេសកកម្មសេដ្ឋកិច្ច និងពាណិជ្ជកម្មហ្វ្រង់កូហ្វូនី ត្រូវបានផ្ដួចផ្ដើមឡើងដោយអង្គការ OIF ក្នុងគោលបំណងបង្កើតទំនាក់ទំនងសេដ្ឋកិច្ច រវាងប្រទេសប្រើប្រាស់ភាសាបារាំង និងប្រទេសក្នុងតំបន់។ ក្នុងឱកាសនេះ  ឯកឧត្តមរដ្ឋមន្ត្រី បានបង្ហាញពីឆន្ទៈក្នុងការពង្រឹងទំនាក់ទំនងពាណិជ្ជកម្ម សេដ្ឋកិច្ច និងចំណងការទូតជាមួយប្រទេសជាសមាជិកអង្គការOIF ដែលកត្តាទាំងនេះ នឹងផ្ដល់សារៈសំខាន់ដល់កម្ពុជា និងប្រទេសក្នុងតំបន់ ជាពិសេសចំណងសហប្រតិបត្តិការលើពហុវិស័យ រួមមានវប្បធម៌ ទេសចរណ៍ សង្គមកិច្ច និងចូលរួមស្ដារសេដ្ឋកិច្ចឡើងវិញបន្ទាប់ពីទទួលផលប៉ះពាល់ដោយជំងឺរាតត្បាតសកលកូវីដ-១៩។

ឆ្លៀតក្នុងឱកាសនោះ ឯកឧត្តមរដ្ឋមន្ត្រី​ បានលើកទឹកចិត្តដល់ប្រតិបត្តិករសេដ្ឋកិច្ច និងវិនិយោគិនOIF​ មកពីគ្រប់ទ្វីបទាំងអស់ ឱ្យពិនិត្យមើលសក្តានុពលពាណិជ្ជកម្មដែលកម្ពុជាមាន និងកលានុវត្តភាពថ្មីៗ ហើយអាចជ្រើសរើសកម្ពុជា ជាទីតាំងសម្រាប់ពង្រីកសហប្រតិបត្តិការថ្មីក្នុងតំបន់ និងចូលរួមក្នុងខ្សែច្រវ៉ាក់តម្លៃដែលកំពុងមានឧត្តមភាពរីកចម្រើន។

គួរបញ្ជាក់ផងដែរថា ប្រទេសជាសមាជិក និងប្រទេសអង្កេតការទាំងអស់របស់អង្គការ OIF មានសរុបចំនួន៨៨ប្រទេស ហើយនៅឆ្នាំ២០២០ កម្ពុជាសម្រេចបានទំហំពាណិជ្ជកម្មសរុប ៩,៦ប៊ីលានដុល្លាអាម៉េរិកជាមួយប្រទេស OIF ដោយក្នុងនោះ កម្ពុជាបាននាំចេញ ៦,៥ ប៊ីលានដុល្លាអាម៉េរិក កើនឡើងប្រមាណ៤% ធៀបនឹងឆ្នាំ២០១៩៕

កែសម្រួលដោយ៖ BRANDMEDIA

ប្រភព៖ ក្រសួងពាណិជ្ជកម្ម