ក្រុមនិស្សិតគម្រោង Re-Five បង្កើតយុទ្ធនាការ៦០ថ្ងៃ ដើម្បីចូលរួមកាត់បន្ថយការប្រើប្រាស់ប្លាស្ទិក
ដោយ៖ សៅ ដាឡែន
ភ្នំពេញ៖ ក្រុមនិស្សិតគម្រោង Re-Five បានប្រកាសអំពីយុទ្ធនាការ «៦០ថ្ងៃ៖ កាន់ដបទឹកដើម្បីទទួលបានការបញ្ចុះតម្លៃ» ដែលនឹងប្រព្រឹត្តទៅចាប់ពីថ្ងៃទី២២ ខែវិច្ឆិកា ឆ្នាំ២០២១ រហូតដល់ថ្ងៃទី២០ ខែមករា ឆ្នាំ២០២២ ដើម្បីចូលរួមលើកកម្ពស់ និងកាត់បន្ថយការប្រើប្រាស់ប្លាស្ទិកនៅកម្ពុជា ។ រាល់អតិថិជនទាំងអស់ នឹងទទួលបានការបញ្ជុះតម្លៃពី 10% រហូតដល់ 50% ពីហាងដែលជាដៃគូក្នុងយុទ្ធនាការនេះ ដោយគ្រាន់តែយកដបទឹកផ្ទាល់ខ្លួនមកទិញភេសជ្ជៈ ជំនួសឲ្យការប្រើប្រាស់កែវនិងថង់ប្លាស្ទិក។
លោក នូ វិរៈ ជាអ្នកសម្របសម្រួលគម្រោងបានឲ្យដឹងថា ៖ « យុទ្ធនាការនេះត្រូវបានបង្កើតឡើងដោយឈរលើគោលដៅធំៗចំនួនពីរ។ ទីមួយ ផ្សព្វផ្សាយ និងលើកទឹកចិត្តឲ្យប្រជាពលរដ្ឋងាកមកប្រើប្រាស់សម្ភារៈដែលអាចប្រើប្រាស់ឡើងវិញបាន ដើម្បីកាត់បន្ថយការប្រើប្រាស់ប្លាស្ទិកមួយដងបោះចោល។ ទីពីរ លើកទឹកចិត្តដល់ហាងលក់ភេសជ្ជៈ និងភោជនីយដ្ឋាន ឲ្យមានការបញ្ចុះតម្លៃជូនរាល់អតិថិជនដែលប្រើប្រាស់ដបទឹកផ្ទាល់ខ្លួន ឬដបទឹកប្រើប្រាស់ឡើងវិញបាន សម្រាប់ការវេចខ្ចប់អាហារ និងភេសជ្ជៈទាំងនោះ»។ លោកបានបន្ថែមថា «បច្ចុប្បន្ននេះមានហាងប្រមាណ ២០ នៅក្នុងរាជធានីភ្នំពេញបានចូលរួមក្នុងយុទ្ធនាការនេះ និងមានហាងភេសជ្ជៈធំៗចូលរួមជាបន្តបន្ទាប់ផងដែរ»។
អតិថិជន អាចស្វែងរកហាងលក់ភេសជ្ជៈដែលជាដៃគូសហការរបស់យុទ្ធនាការ តាមរយៈស្លាកកំណត់សម្គាល់នៃយុទ្ធនាការ ឬស្វែងរកទីតាំងហាងដែលនៅជិតបំផុតតាមរយៈផែនទីនាំផ្លូវក្នុងវេបសាយ www.refivecambodia.com ។ យុទ្ធនាការ «៦០ថ្ងៃ៖ កាន់ដបទឹកដើម្បីទទួលបានការបញ្ចុះតម្លៃ» ក៏មានការរៀបចំសកម្មភាពផ្សព្វផ្សាយបន្ថែមទៀតដូចជា៖ ការផលិតវីដេអូអប់រំ ផ្ទាំងផ្សព្វផ្សាយឌីជីថល (Digital Poster) កម្មវិធីប្រកួតប្រជែងថតរូប (photo competition) និងកម្មវិធីចាប់រង្វាន់ (giveaway) នៅលើបណ្ដាញសង្គមដូចជា ហ្វេសប៊ុក យូធូប Instagram និង Tik Tok ជាដើម។
គួរបញ្ជាក់ផងដែរថា យុទ្ធនាការ «៦០ថ្ងៃ៖ កាន់ដបទឹកដើម្បីទទួលបានការបញ្ចុះតម្លៃ» ជាយុទ្ធនាការគាំទ្រដល់គម្រោង «សំណល់ប្លាស្ទិកក្នុងសមុទ្រ» ក្រោមការគាំទ្រពី ក្រសួងបរិស្ថាន ក្រុមប្រឹក្សាជាតិអភិវឌ្ឍន៍ដោយចីរភាព រដ្ឋាភិបាលប្រទេសជប៉ុន និងអង្គការយូអិនឌីភីប្រចាំកម្ពុជា។ Re-Five គឺជាគម្រោងឌីជីថលដែលផ្តួចផ្តើមដោយនិស្សិតនៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) នៃសាកលវិទ្យាល័យភូមិន្ទភ្នំពេញ ក្នុងគោលបំណងបញ្ជ្រាប និងលើកកម្ពស់ការកាត់បន្ថយការប្រើប្រាស់ប្លាស្ទិកក្នុងជីវភាពរស់នៅប្រចាំថ្ងៃ ដោយអនុវត្តគោលការណ៍ 5Rs (បដិសេធមិនប្រើប្រាស់, កាត់បន្ថយ, ប្រើប្រាស់ឡើងវិញ, រំឭកឡើងវិញ និងកែច្នៃ)៕
កែសម្រួលដោយ៖ BRANDMEDIA
