ញ៉ាំទុរេនរាល់ដង តិចអត់ដឹងថា ហេតុអ្វីបានជាវាមានក្លិនបែបនេះ?

អត្ថបទដោយ៖ សារិ សៀងហេង

អ្នកស្រាវជ្រាវនៅវិទ្យាស្ថាន Lebiniz នៃជីវសាស្រ្តប្រព័ន្ធចំណីអាហារ (Food System Biology) នៅក្នុងសាកលវិទ្យាល័យបច្ចេកទេសមួយក្នុងទីក្រុង Munich ប្រទេសអាឡឺម៉ង់ (Leibniz-LSB@TUM) បានបញ្ជាក់អំពីវត្តមាននៃអាស៊ីតអាមីនេកម្រអេត្យូនីន (amino acid ethionine) ដែលមាននៅក្នុងរុក្ខជាតិម្យ៉ាង ឬនិយាយឲ្យចំតែម្ដង គឺនៅក្នុងដើមទុរេន (Durian Tree)។

ក្រុមអ្នកវិទ្យាសាស្ត្រខាងលើបានបង្ហាញបន្តទៀតថា អាស៊ីតអាមីនេនេះ គឺដើរតួនាទីយ៉ាងសំខាន់ក្នុងការបង្កើតក្លិននៃផ្លែទុរេននេះ។ នៅពេលដែលផ្លែទុរេនទុំ សាច់របស់វាបានបញ្ចេញក្លិនដ៏ខ្លាំង (ឈ្ងុយ ឬឆួលទៅតាមទស្សនៈរបស់អ្នកទទួលទាន) ដែលស្រដៀងទៅនឹងក្លិនខ្ទឹមបារាំងស្អុយរលួយ ហេតុដូចនេះហើយបានជាផ្លែឈើនេះ ត្រូវបានហាមឃាត់ក្នុងការនាំចូលទៅកាន់តំបន់សាធារណៈក្នុងប្រទេសសាំងហ្គាពួរ (Singapore) និងនៅតាមសណ្ឋាគារជាច្រើនក្នុងប្រទេសថៃ (Thailand)។ ទោះបីជាយ៉ាងណាក៏ដោយ ក៏ទុរេនប្រភេទផ្សេងគ្នាជាច្រើន នៅតែមានការពេញនិយមខ្លាំងនៅតាមបណ្តាប្រទេសអាស៊ីមួយចំនួនផងដែរ ដោយសារតែសាច់របស់វាមានរសជាតិផ្អែមជាប់ចិត្ត ចំណែកឯសាច់នៃផ្លែទៀតសោត ក៏មានលក្ខណៈជាក្រែម មើលទៅគួរឲ្យចង់ទទួលទាន។

អង់ស៊ីមបញ្ចេញក្លិនពីអាស៊ីតអាមីនេ

តាមរយៈការស្រាវជ្រាវដំណាក់កាលមុនៗ ដែលបានប្រព្រឹត្តទៅនៅ Leibniz-LSB@TUM បានបញ្ជាក់ម្តងរួចមកហើយថា ក្លិនឈ្ងុយ ឬឆួលរបស់ទុរេន គឺដោយសារតែក្លិនរបស់អេតានត្យុល (ethanethiol) និងស្រឡាយរបស់វា។ ប៉ុន្តែតាមរយៈចលនការគីមីជីវៈដែលថា រុក្ខជាតិផលិតអេតានត្យុលនៅមិនទាន់មានលក្ខណៈច្បាស់លាស់នៅឡើយទេ។ នៅពេលក្រោយមកទៀត លោក Nadine S. Fischer និង Martin Steinhaus នៅ Leibniz-LSB@TUM ក៏ធ្លាប់បានធ្វើការបកស្រាយជាលើកដំបូងដែរ ក្នុងការសិក្សារបស់ពួកគាត់ថា អេត្យូនីនជាអ្នកដែលបង្កឲ្យមានសារធាតុក្លិនឈ្ងុយ ឬឆួលនេះកើតឡើង។

វេជ្ជបណ្ឌិត Nadine Fischer បានលើកឡើងថា “ផ្អែកលើការសិក្សាស្រាវជ្រាវរបស់យើង ខណៈដែលផ្លែឈើទុំ អង់ស៊ីមរបស់រុក្ខជាតិនឹងធ្វើការជំរុញអេត្យូនីនឱ្យបញ្ចេញក្លិន”។ អ្នកស្រាវជ្រាវរូបនេះបានបន្តទៀតថា “ការអងេ្កតរបស់ពួកយើង នៅកំឡុងពេលដែលផ្លែឈើកំពុងទុំ មិនត្រឹមតែកំហាប់របស់អេត្យូនីនក្នុងសាច់កើនឡើងទេ ប៉ុន្តែនៅពេលជាមួយគ្នានោះដែរ អេតានត្យុលក៏កើនឡើងដែរ។

សម្រាប់ខ្លឹមសារលម្អិតទាក់ទងនឹងផ្លែទុរេន ប្រិយមិត្តអាចចូលទៅអានបន្ថែម តាមរយៈតំណភ្ជាប់នេះ៕