យោធាមីយ៉ាន់ម៉ា ចោទក្រុមប្រដាប់អាវុធថា ទម្លាក់គ្រាប់បែកកម្ទេចស្ពានប្រវត្តិសាស្ត្រ ដែលធ្លាប់ជាផ្លូវរថភ្លើងខ្ពស់ជាងគេលើពិភពលោក
ស្ពានក្នុងសម័យអាណានិគមក្នុងប្រទេសមីយ៉ាន់ម៉ា ដែលធ្លាប់ជាផ្លូវរថភ្លើងខ្ពស់ជាងគេលើពិភពលោក ត្រូវបានបំផ្លាញកំឡុងពេលប្រយុទ្ធគ្នាក្នុងជម្លោះដែលអូសបន្លាយជាច្រើនឆ្នាំមកនេះ។
សង្គ្រាមស៊ីវិលបានលេបត្របាក់ប្រទេសមីយ៉ាន់ម៉ា ចាប់តាំងពីរដ្ឋប្រហារឆ្នាំ ២០២១ បានទម្លាក់រដ្ឋាភិបាលស៊ីវិល ដោយយោធាកំពុងប្រយុទ្ធជាមួយក្រុមទ័ពព្រៃគាំទ្រលទ្ធិប្រជាធិបតេយ្យ និងអង្គការប្រដាប់អាវុធជនជាតិភាគតិចជាច្រើន។
តំណាងមកពីរបបយោធាដែលកំពុងកាន់អំណាច និងក្រុមប្រដាប់អាវុធប្រឆាំងរដ្ឋប្រហារបានស្តីបន្ទោសគ្នាទៅវិញទៅមកចំពោះការបំផ្លាញស្ពាន Gokteik ដ៏សំខាន់កាលពីថ្ងៃអាទិត្យ។
នៅក្នុងសេចក្តីថ្លែងការណ៍ជាវីដេអូ អ្នកនាំពាក្យរបបយោធាលោក Zaw Min Tun បានអះអាងថា ក្រុមឧទ្ទាម រួមទាំងកងទ័ពរំដោះជាតិតាអុង (TNLA) និងក្រុមកងកម្លាំងការពារប្រជាជនបាន “ទម្លាក់គ្រាប់បែក និងបំផ្លាញ” ស្ពាននេះ។ សេចក្តីថ្លែងការណ៍ដាច់ដោយឡែកមួយដោយរដ្ឋាភិបាលយោធាបាននិយាយថាស្ពាននេះត្រូវបាន«ផ្ទុះដោយគ្រាប់មីន»។
អ្នកនាំពាក្យ TNLA ច្រានចោលការលើកឡើងនេះ ហើយបានចោទប្រកាន់របបយោធាថាបានទម្លាក់គ្រាប់បែកលើស្ពាន។ អ្នកនាំពាក្យ TNLA លោក Lway Yay Oo បាននិយាយថា “កងទ័ពមីយ៉ាន់ម៉ាបានព្យាយាមទម្លាក់គ្រាប់បែកលើមូលដ្ឋានរបស់យើង… នៅព្រឹកនេះដោយប្រើយន្តហោះគ្មានមនុស្សបើក។ ពួកគេបានទម្លាក់គ្រាប់បែកលើកងទ័ពរបស់យើង ប៉ុន្តែគ្រាប់បែករបស់ពួកគេក៏បានបុកស្ពាន Gokteik” ។
ក្នុងប៉ុន្មានសប្តាហ៍ថ្មីៗនេះ ការប៉ះទង្គិចគ្នាបានផ្ទុះឡើងរវាងកងកម្លាំងរដ្ឋាភិបាល និងយុទ្ធជន TNLA នៅទីក្រុង Nawnghkio និង Kyaukme ដែលនៅក្បែរនោះ ទោះបីជារបបយោធាបានអះអាងថាបានដណ្តើមយក Nawnghkio មកវិញក្នុងខែកក្កដាក៏ដោយ។
ស្ពាននេះ មានប្រវែង ៣០០ ម៉ែត្រ និងកម្ពស់ ១០២ ម៉ែត្រពីលើជ្រលងភ្នំ រចនាសម្ព័ន្ធនេះគឺជាស្ពានខ្ពស់បំផុតនៅក្នុងប្រទេសមីយ៉ាន់ម៉ា និងជាផ្លូវរថភ្លើងខ្ពស់បំផុតនៅលើពិភពលោកនៅពេលដែលវាបានបើកនៅឆ្នាំ ១៩០១ ក្នុងសម័យអាណានិគមអង់គ្លេស។ ស្ពាននេះស្ថិតនៅព្រំប្រទល់នៃសង្កាត់ Nawnghkio និង Kyaukme ក្នុងរដ្ឋ Shan ភាគខាងជើង។ វាជាផ្នែកមួយនៃផ្លូវរថភ្លើង Mandalay-Lashio និងទាក់ទាញភ្ញៀវទេសចរមួយចំនួនផងដែរ។
គួរបញ្ជាក់ថា របបយោធាមីយ៉ាន់ម៉ាកំពុងរៀបចំសម្រាប់ការបោះឆ្នោតនៅខែធ្នូ ដែលត្រូវបានធ្វើពហិការដោយក្រុមប្រឆាំង និងរិះគន់ដោយអ្នកឃ្លាំមើលអន្តរជាតិ។ យ៉ាងណាមិញ ក្រុមអ្នកវិភាគបានព្យាករណ៍ថា ក្រុមឧទ្ទាមនឹងធ្វើការវាយលុកជុំវិញការបោះឆ្នោតនោះ ដែលជាសញ្ញានៃក្រុមប្រឆាំងរបស់ពួកគេ។
(ប្រភព៖ The guardians)
