The Weeknd អតីតមិត្តប្រុស Selena Gomez បរិច្ចាគលុយ ២ លានដុល្លារដើម្បីផ្តល់នំបុ័ង ១៨ លានដុំដល់គ្រួសារហ្គាហ្សា

តារាចម្រៀង-អ្នកនិពន្ធចម្រៀងជនជាតិកាណាដា ផលិតករ និងជាតួសម្តែង The Weeknd កំពុងសន្យាថានឹងផ្តល់ប្រាក់ចំនួន ២ លានដុល្លារទៀតដើម្បីជួយចិញ្ចឹមគ្រួសារនៅហ្គាហ្សា។ អំណោយនេះបានមកពីមូលនិធិមនុស្សធម៌ XO របស់គាត់ ដែលជួយប្រយុទ្ធប្រឆាំងនឹងភាពអត់ឃ្លានជាសកល។ កម្មវិធីស្បៀងអាហារពិភពលោក (WFP) របស់អង្គការសហប្រជាជាតិ (WFP) បានរាយការណ៍កាលពីថ្ងៃចន្ទថា ទឹកប្រាក់ចំនួន ២ លានដុល្លារនឹងត្រូវប្រើប្រាស់ដើម្បីធ្វើនំប៉័ងជាង ១៨ លានដុំ និងផ្តល់អាហារដល់ប្រជាជនប៉ាឡេស្ទីនជាង ១៥៧,០០០ នាក់សម្រាប់រយៈពេលមួយខែ។

លោក Corinne Fleischer នាយក WFP ប្រចាំតំបន់មជ្ឈិមបូព៌ា អាហ្រ្វិកខាងជើង និងតំបន់អឺរ៉ុបខាងកើត បាននិយាយនៅក្នុងសេចក្តីថ្លែងការណ៍មួយថា “ជាមួយនឹងគ្រោះទុរ្ភិក្សកំពុងកើតមាននៅក្នុងតំបន់ Gaza ការគាំទ្រដ៏សប្បុរសរបស់ Abel នឹងផ្តល់ការសង្គ្រោះយ៉ាងសំខាន់សម្រាប់គ្រួសារប៉ាឡេស្ទីនរាប់ពាន់នាក់ ដែលតស៊ូនឹងភាពអត់ឃ្លានជារៀងរាល់ថ្ងៃ”។ លោកបានបន្តថា «យើងមានអំណរគុណយ៉ាងខ្លាំងចំពោះការរួមចំណែកក្ដីមេត្តា ករុណា និងការតស៊ូមតិឥតងាករេរបស់លោកសម្រាប់ WFP និងប្រជាជនប៉ាឡេស្ទីន»។

The Weeknd ដែលមានឈ្មោះពិតថា Abel Tesfaye ពីមុនបានបរិច្ចាគ $២.៥ លានដុល្លារដល់ Gaza ក្នុងខែធ្នូ ឆ្នាំ២០២៣ ដែលស្មើនឹងអាហារសង្គ្រោះបន្ទាន់ចំនួន ៤ លានសម្រាប់ជនស៊ីវិលដែលរងផលប៉ះពាល់។ មូលនិធិមនុស្សធម៌ XO បានផ្តល់អាហារចំនួន ៨២០ តោន ដែលអាចចិញ្ចឹមប្រជាជនប៉ាឡេស្ទីនជាង ១៧៣,០០០ ដុល្លារក្នុងរយៈពេលពីរសប្តាហ៍។ The Weeknd បានក្លាយជាឯកអគ្គរដ្ឋទូតសុច្ឆន្ទៈរបស់ WFP នៅខែតុលា ឆ្នាំ២០២១ ហើយបានបង្កើតមូលនិធិមនុស្សធម៌ XO របស់គាត់ជាមួយនឹងកម្មវិធីស្បៀងអាហារពិភពលោកសហរដ្ឋអាមេរិកក្នុងខែមីនា ឆ្នាំ២០២២។ មូលនិធិនេះ ដៃគូរបស់ Weeknd និងអ្នកគាំទ្របានរៃអង្គាសប្រាក់បានចំនួន ៦.៥ លានដុល្លាររហូតមកដល់បច្ចុប្បន្ន ដើម្បីផ្តល់ជំនួយសង្គ្រោះដល់មនុស្សដែលមានរងផលប៉ះពាល់ពីសង្គ្រាម។ អ្នកឈ្នះពានរង្វាន់ Grammy បួនសម័យកាលរូបនេះ ក៏បានបរិច្ចាគ ២ លានដុល្លារដល់ស្ត្រី និងកុមារអេត្យូពី ដែលជាផ្នែកនៃកម្មវិធីជំនួយអាហារសង្គ្រោះបន្ទាន់របស់ WFP ផងដែរ។

គួរបញ្ជាក់ថា អ៊ីស្រាអែល និងក្រុមហាម៉ាសបានផ្ទុះសង្គ្រាមតាំងពីថ្ងៃទី ៧ ខែតុលា ដែលបានធ្វើឱ្យមនុស្សជាច្រើននាក់បានទទួលរងផលប៉ះពាល់ជុំវិញការកាត់ផ្តាច់ការផ្គត់ផ្គង់អាហារ ទឹក និងឧស្ម័ន។ បន្ទាប់ពីសង្គ្រាមជិតប្រាំពីរខែមក អាជ្ញាធរសុខាភិបាលប៉ាឡេស្ទីនរបស់ហ្គាហ្សា ឥឡូវនេះមិនអាចគ្រប់គ្រងបាននូវចំនួនអ្នកស្លាប់នោះទេ ខណៈដែលហេដ្ឋារចនាសម្ព័ន្ធដួលរលំ មធ្យោបាយទំនាក់ទំនងមិនស្ថិតស្ថេរ និងមន្ទីរពេទ្យរងនូវការបំផ្លិចបំផ្លាញថែមទៀត។ កាលពីខែមីនា បុគ្គលិកជំនួយផ្ទះបាយកណ្តាលពិភពលោកចំនួន ៧ នាក់ត្រូវបានសម្លាប់ដោយកងកម្លាំងអ៊ីស្រាអែល ហើយកាលពីសប្តាហ៍មុនអង្គការសហប្រជាជាតិបានអំពាវនាវឱ្យមានការស៊ើបអង្កេត “ឯករាជ្យ ប្រសិទ្ធភាព និងតម្លាភាព” បន្ទាប់ពីការរកឃើញផ្នូរដ៏ធំនៅមន្ទីរពេទ្យធំពីរនៅហ្គាហ្សា៕

ប្រភព៖ The Guardian